ପୂରା ମାନ୍ଦାରେ ଚାଲିଛି ବିଶ୍ୱ ଷ୍ଟକ୍ ମାର୍କେଟ । ବମ୍ବେ ଷ୍ଟକ ବଜାର ସେନ୍‌ସେକ୍ସରେ ବଡ଼ ଧରଣର ହ୍ରାସ ଘଟିଛି। ସୋମବାର ସେନ୍‌ସେକ୍ସ ୧,୫୬୪ ପଏଣ୍ଟ୍‌ ହ୍ରାସ ପାଇ ୫୬,୯୮୪ ପଏଣ୍ଟ୍‌ରେ ବନ୍ଦ ହୋଇଛି। ଦେଶର ଅନ୍ୟତମ ଷ୍ଟକ ବଜାର ନ୍ୟାସନାଲ୍‌ ଷ୍ଟକ ଏକ୍ସଚେଞ୍ଜ୍‌ରେ ମଧ୍ୟ ସମାନ ସ୍ଥିତି ଦେଖିବାକୁ ମିଳିଛି। ନିଫ୍ଟି ୪୬୮ ପଏଣ୍ଟ୍‌ ହ୍ରାସ ପାଇ ୧୭,୧୪୯ ପଏଣ୍ଟ୍‌ରେ ବନ୍ଦ ହୋଇଛି।

ସୋମବାର ସେନସେକ୍ସର ଇକ୍ୟୁଟି ବେଞ୍ଚ ମାର୍କ ୧୫୪୬ ପଏଣ୍ଟରୁ ୫୮,୦୦୦ ଲିଭେଲକୁ ହ୍ରାସ ଘଟିଛି। ଅନ୍ତର୍ଜାତୀୟ ବଜାରରେ ବେପାର ଘାଟା ଯୋଗୁ ଏଭଳି ପରିସ୍ଥିତି ଉପୁଜି ଥିବା କୁହାଯାଉଛି। ଏଥିସହ ବିଦେଶୀ ପୁଞ୍ଜି ନିବେଶରେ ନିଷ୍କ୍ରିୟତା ଦିନକୁ ଦିନ ବାଣିଜ୍ୟକୁ ପ୍ରବାବିତ କରୁଛି।

ସୋମବାରକୁ ମିଶାଇ ଗତ ପାଞ୍ଚଟି କାରବାର ଦିନରେ ସେନ୍‌ସେକ୍ସରେ ୩୦୦୦ରୁ ଅଧିକ ପଏଣ୍ଟ୍‌ର ହ୍ରାସ ଘଟିଛି। ଫଳରେ ନିବେଶକମାନେ ସେୟାର ବଜାରରେ ପ୍ରାୟ ୧୮ ଲକ୍ଷ କୋଟି ଟଙ୍କା ହରାଇଛନ୍ତି। ସେନ୍‌ସେକ୍ସରେ ହୋଇଥିବା ହ୍ରାସ ଯୋଗୁଁ ନିବେଶକମାନେ ୯.୧୫ ଲକ୍ଷ କୋଟି ଟଙ୍କା ହରାଇଛନ୍ତି। କାରବାର ଆରମ୍ଭ ହେବା ପରଠାରୁ ସେନ୍‌ସେକ୍ସରେ କ୍ରମାଗତ ହ୍ରାସ ଜାରି ରହିଥିଲା। ବହୁ ସଂଖ୍ୟକ ଷ୍ଟକ ସେମାନଙ୍କ ନିମ୍ନ ସର୍କିଟ୍‌ରେ ପହଞ୍ଚିଯାଇଥିଲେ। ଏକ ସମୟରେ ସେନ୍‌ସେକ୍ସରେ ୨,୦୦୦ ପଏଣ୍ଟ୍‌ରୁ ଅଧିକ ହ୍ରାସ ଘଟିଥିଲା। କିନ୍ତୁ କାରବାର ଶେଷ ‌ବେଳକୁ ସେଥିରେ ସାମାନ୍ୟ ସୁଧାର ହୋଇଥିଲା। ଅନ୍ୟଥା ନିବେଶକମାନେ ଆହୁରି ଅଧିକ କ୍ଷତି ସହିଥାନ୍ତେ।

Powered by Froala Editor