ନୂଆଦିଲ୍ଲୀ : ଦୁଇଟି ରାଷ୍ଟ୍ରାୟତ୍ତ ବ୍ୟାଙ୍କର ଘରୋଇକରଣକୁ ବିରୋଧ କରି ଚଳିତ ମାସ ୧୬ରୁ ଦୁଇଦିନିଆ ଧର୍ମଘଟ କରିବାକୁ ୟୁନାଇଟେଡ ଫୋରମ୍ ଅଫ ବ୍ୟାଙ୍କ ୟୁନିୟନ୍ସ (ୟୁଏଫବିୟୁ) ପକ୍ଷରୁ ଧମକ ଦିଆଯାଇଛି । କେନ୍ଦ୍ର ସରକାର ୨୦୧୯ରେ ଆଇଡିବିଆଇ ବ୍ୟାଙ୍କର ଅଧିକାଂଶ ଅଂଶଧନ ଏଲଆଇସିକୁ ବିକ୍ରି କରି ତାହାର ଘରୋଇକରଣ କରିସାରିଥିବା ବେଳେ ଗତ ଚାରି ବର୍ଷରେ ୧୪ଟି ସରକାରୀ ବ୍ୟାଙ୍କ ମଧ୍ୟରେ ମିଶ୍ରଣ କରିଛନ୍ତି । ଦୁଇଟି ରାଷ୍ଟ୍ରାୟତ୍ତ ବ୍ୟାଙ୍କ ଓ ଗୋଟିଏ ବୀମା କଂପାନିର ଘରୋଇକରଣ କରାଯିବ ବୋଲି ଚଳିତ ଆର୍ଥôକ ବର୍ଷର ବଜେଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଥିଲେ । 

ପ୍ରସ୍ତାବିତ ଘରୋଇକରଣକୁ ବିରୋଧ କରିବାକୁ ୟୁବିଏଫୟୁ ନିଷ୍ପତ୍ତି ନେଇଛି ବୋଲି ସର୍ବଭାରତୀୟ ବ୍ୟାଙ୍କ କର୍ମଚାରୀ ସଂଘର ସାଧାରଣ ସମ୍ପାଦକ ସି ଏଚ ଭେଙ୍କଟଚେଲମ୍ କହିଛନ୍ତି । ୟୁନିୟନ୍ ପକ୍ଷରୁ ଭାରତୀୟ ବ୍ୟାଙ୍କ ସଂଘ (ଆଇବିଏ)କୁ ଧର୍ମଘଟ ନୋଟିସ ପଠାଇ ଦିଆଯାଇଛି । ସେ କହିଛନ୍ତି ଯେ ଭାରତ ଭଳି ବିକାଶଶୀଳ ଦେଶରେ ଅର୍ଥନୈତିକ ବିକାଶରେ ବ୍ୟାଙ୍କଗୁଡ଼ିକ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରୁଛନ୍ତି । ଏଭଳି ସମୟରେ ରାଷ୍ଟ୍ରାୟତ୍ତ ବ୍ୟାଙ୍କର ଆବଶ୍ୟକତା ରହିଛି । ବ୍ୟାଙ୍କିଙ୍ଗ ସଂସ୍କାର ନାମରେ ସରକାରୀ ବ୍ୟାଙ୍କଗୁଡ଼ିକୁ ଦୁର୍ବଳ କରିବା ଲାଗି ଅଣାଯାଉଥିବା ନୀତିଗୁଡ଼ିକୁ ଆମେ ୟୁବିଏଫୟୁ ଅଧୀନରେ ଦୀର୍ଘ ୨୫ ବର୍ଷ ଧରି ବିରୋଧ କରିଆସୁଛୁ ବୋଲି ସେ କହିଛନ୍ତି ।

Powered by Froala Editor