ମୁମ୍ବାଇ: ଆଜି ମୁମ୍ବାଇ ଆକ୍ରମଣକୁ ୧୩ ବର୍ଷ ପୁରିଛି । ହେଲେ ଲିିଭିନି ଲୁହ, ହଜିନି ଦୁଃଖ । ଆଜିବି ଥରି ଉଠୁଛି ହୋଟେଲ ତାଜ୍ । ଆଜକୁ ଠିକ୍ ୧୩ ବର୍ଷ ତଳେ ଅର୍ଥାତ ୨୦୦୮ ମସିହା ଆଜିର ଦିନରେ ସୀମା ଅତିକ୍ରମ କରି ମାୟାନଗରୀକୁ ଦୋହଲାଇ ଦେଇଥିଲେ ଆତଙ୍କବାଦୀ । ମୁମ୍ବାଇରେ ତାଣ୍ଡବ ରଚିଥିଲେ ଆତଙ୍କୀ । ଚାରିଆଡେ ପଡି ରହିଥିଲା ଖାଲି ମୃତଦେହ । ସେହି ଛାତିଥରା ଘଟଣା ଆଜି ପ୍ରତିଟି ଲୋକଙ୍କ ମନରେ ତାଜା ହୋଇ ରହିଛି।

ସମୟ ୨୦୦୮, ୨୬ ନଭେମ୍ବର ସନ୍ଧ୍ୟା ।  ପାକିସ୍ତାନର ଆତଙ୍କୀ ସଂଗଠନ ଲସ୍କର-ଏ-ତୋଏବାର ୧୦ ଆତଙ୍କୀ ମୁମ୍ବାଇ ଛାତିରେ ଛିଡ଼ା ହୋଇ ପାଖାପାଖି ୪ ଦିନ ଧରି ୧୨ଟି ଭୟଙ୍କର ହମଲା କରିଥିଲେ। ମୁମ୍ବାଇର ତାଜମହଲ ହୋଟେଲ ପ୍ୟାଲେସ୍, ନରୀମନ୍ ହାଉସ୍, ମେଟ୍ରୋ ସିନେମା ଓ ଛତ୍ରପତି ଶିବାଜୀ ଟର୍ମିନାଲ ସମେତ ଅନ୍ୟ ସ୍ଥାନରେ ହୋଇଥିବା ଏହି ଆକ୍ରମଣରେ ୧୫ ଦେଶର ୧୬୬ ଜଣ ପ୍ରାଣ ହରାଇଥିବାବେଳେ ୩୦୦ ଜଣ ଆହତ ହୋଇଥିଲେ ।

ଏହି ବିସ୍ଫୋରଣରେ ଏକମାତ୍ର ଆତଙ୍କୀ ଭାବେ କସାବକୁ ଗିରଫ କରାଯାଇଥିଲା। ସେ ଆତଙ୍କୀ ସମ୍ବନ୍ଧିତ କିଛି ଗୁରୁତ୍ବପୂର୍ଣ୍ଣ ଖୁଲାସା କରିଥିଲା। ପାକିସ୍ତାନରେ ଥିବା ଲସ୍କର ଓ ଅନ୍ୟ ମଡ୍ୟୁଲ୍ ଏହି ଆକ୍ରମଣର ଯୋଜନା, ସଂଯୋଜନା ଓ ଅପରେସନ୍ ପ୍ରସ୍ତୁତ ହୋଇଥିବା କହିଥିଲା କସାବ। ଦେଶର ଗୁଇନ୍ଦା ସଂସ୍ଥାକୁ ଦିଆଯାଇଥିବା ତଥ୍ୟରେ କସାବ କହିଥିଲା ଯେ ସମସ୍ତ ଆକ୍ରମଣକାରୀ ପାକିସ୍ତାନରୁ ଆସିଥିଲେ ।

ଏହି ଦିନରେ ଅନେକ ଲୋକ ନିଜ ପରିବାର ପ୍ରିୟଜନକୁ ହରାଇବା ସହ ସୁରକ୍ଷାକର୍ମୀମାନେ ନିଜ ଜୀବନକୁ ବାଜି ଲଗାଇଥିଲେ । ଏହି ଦିନକୁ କେବେ ଭୁଲି ହେବନାହିଁ ।

Powered by Froala Editor