ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ରାଜ୍ୟ କ୍ୟାବିନେଟର ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ । ବୈଠକରେ ବିଭିନ୍ନ ବିଭାଗର ୨୪ଟି ଗୁରୁତ୍ବପୂର୍ଣ୍ଣ ପ୍ରସ୍ତାବରେ ମୋହର ମାରିଛି କ୍ୟାବିନେଟ ।

କ୍ୟାବିନେଟରେ ଇଲେକ୍ଟ୍ରୋନିକ୍ସ ଏବଂ ଆଇଟି, ଅର୍ଥ, କୃଷି ଏବଂ କୃଷକ ସଶକ୍ତିକରଣ, ସାଧାରଣ ପ୍ରଶାସନ ଏବଂ ଜନ ଅଭିଯୋଗ, ପଞ୍ଚାୟତରାଜ ଏବଂ ପାନୀୟ ଜଳ ସମ୍ବନ୍ଧୀୟ ୨୪ଟି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି ।ଜଳ ସମ୍ପଦ, ସହଯୋଗ, ଗୃହ, ଶିଳ୍ପ, ଆଇନ ରାଜସ୍ୱ ଏବଂ ବିପର୍ୟ୍ୟୟ ପରିଚାଳନା, ଗ୍ରାମୀଣ ବିକାଶ, ଇସ୍ପାତ ଏବଂ ଖଣି, କାର୍ୟ୍ୟ ଏବଂ ସଂସଦୀୟ କାର୍ୟ୍ୟର ପ୍ରସ୍ତାବକୁ ମୋହର ମାରିଛି କ୍ୟାବିନେଟ । ଓଡ଼ିଶା ଇଲେକ୍ଟ୍ରୋନିକ୍ସ ନୀତି ୨୦୨୧କୁ କ୍ୟାବିନେଟର ମଞ୍ଜୁରି ଦେଇଛି ।
ପାର୍ବତୀଗିରି ମେଗାଲିଫ୍ଟ ଜଳସେଚନ ପ୍ରକଳ୍ପ, ଲୋୟର ସୁକେତେଲ ନଦୀରେ ବ୍ୟାରେଜ ନିର୍ମାଣ, କଳାହାଣ୍ଡି, ମାଲକାନଗିରି, ବାଲେଶ୍ଵର, ଗଜପତି, କନ୍ଧମାଳ ଏବଂ କୋରାପୁଟ ଜିଲ୍ଲାର ପ୍ରାୟ ୧୨ ମେଗା ପାଇପ୍ ଜଳ ଯୋଗାଣ ଯୋଜନା ନିର୍ମାଣକୁ କ୍ୟାବିନେଟ ଅନୁମୋଦନ କରିଛି । ଏହି ୧୨ ମେଗା ପାଇପ୍ ଜଳ ଯୋଗାଣ ଯୋଜନାରେ ପ୍ରାୟ ୧୨୦୦ କୋଟି ଟଙ୍କା ବିନିଯୋଗ ହେବ । ଯାହା ଦ୍ୱାରା ୧୨ ଲକ୍ଷରୁ ଅଧିକ ଜନସଂଖ୍ୟା ଉପକୃତ ହେବେ ।
ଅନ୍ୟ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ମଧ୍ୟରେ ରହିଛି ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ଏବଂ କ୍ୟାପିଟାଲ୍ ହସ୍ପିଟାଲରେ ଗବେଷଣା ଏବଂ ସର୍ଜରୀ କମ୍ପ୍ଲେକ୍ସ, ଇଲେକ୍ଟ୍ରୋନିକ୍ସ ନୀତି ୨୦୨୧, ମେଗା ଇଣ୍ଡଷ୍ଟ୍ରି ପାଇଁ ସ୍ୱତନ୍ତ୍ର ପ୍ରୋତ୍ସାହନ, ଓଡ଼ିଶାର କାରିଗର ଗ୍ରେଡ୍ ପଥର ନୀତି, ୩୮୭ ନୂତନ ରାସ୍ତା ନିର୍ମାଣ ପାଇଁ ୨୦୦୦ କୋଟି ଟଙ୍କା ବ୍ୟବସ୍ଥା, ମୁଖ୍ୟମନ୍ତ୍ରୀ ସଡ଼କ ଯୋଜନା ଅଧୀନରେ ଚାଲିଥିବା ୧୫୭ଟି ରାସ୍ତା ନିର୍ମାଣ ଲାଗି ୪୮୪ କୋଟି ଟଙ୍କା ଯୋଗାଣ ପ୍ରସ୍ତାବ, କୃଷି ଏବଂ ସହଯୋଗୀ କ୍ଷେତ୍ରରେ ନୂତନ ଉଦ୍ୟୋଗଗୁଡିକର ପ୍ରୋତ୍ସାହନ ଲାଗି ଆସିଥିବା ପ୍ରସ୍ତାବକୁ ମଞ୍ଜୁର କରାଯାଇଛି ।

Powered by Froala Editor