ଗୁଜରାଟ ଉପକୂଳ ନିକଟ ଆନ୍ତର୍ଜାତିକ ସାମୁଦ୍ରିକ ସୀମା ନିକଟରେ ଭାରତୀୟ ଧୀବରଙ୍କ ବୋଟ୍‌ (ଡଙ୍ଗା) ଜଲପରୀ ଉପରକୁ ଗୁଳି ଚଳାଇ ତାଙ୍କୁ ହତ୍ୟା କରିଥିବା ଯୋଗୁଁ ‘ପାକିସ୍ତାନୀ ସାମୁଦ୍ରିକ ନିରାପତ୍ତା ଏଜେନ୍‌ସି’ (ପିଏମ୍‌ଏସ୍‌ଏ) ବିରୋଧରେ ମାମଲା ରୁଜୁ କରାଯାଇଛି। ଘଟଣାରେ ଆହତ ହୋଇଥିବା ଆଉ ଜଣେ ଧୀବର ଦୀଲିପ ନାଟୁ ସୋଲାଙ୍କିଙ୍କ ଅଭିଯୋଗ ପରେ ୧୦ ପାକିସ୍ତାନ ନୌସେନା ଅଧିକାରୀଙ୍କ ବିରୋଧରେ ହତ୍ୟା ମାମଲା ରୁଜୁ କରାଯାଇଛି।

ମିଳିଥିବା ସୂଚନା ଅନୁଯାୟୀ, ମହାରାଷ୍ଟ୍ରର ଥାଣେରେ ରହୁଥିବା ୩୨ ବର୍ଷୀୟ ଧୀବର ଶ୍ରୀଧର ରମେଶ ଜଳପରି ବୋଟରେ ଅନ୍ୟମାନଙ୍କ ସହ ମାଛ ଧରିବାକୁ ଯାଇଥିଲେ। ଏଥିରେ ମୋଟ ୭ ଜଣ ସଦସ୍ୟ ଥିଲେ। ଭାରତୀୟ ସୀମାରେ ବୋଟଟି ରହିଥିବା ବେଳେ ନଭେମ୍ବର ୭ ସନ୍ଧ୍ୟାରେ ହଠାତ୍‌ ପାକିସ୍ତାନ ନୌସେନା ସେମାନଙ୍କ ଉପରକୁ ଗୁଳିମାଡ଼ କରିଥିଲା।ଏଥିରେ ଶ୍ରୀଧରଙ୍କ ମୃତ୍ୟୁ ଘଟିଥିବା ବେଳେ ଆଉ ଜଣେ ସାମାନ୍ୟ ଆହତ ହୋଇ ଗୁଜରାଟର ଓକାରେ ଚିକିତ୍ସିତ ହେଉଛନ୍ତି।

ବର୍ତ୍ତମାନ ଘଟଣାର ତଦନ୍ତ ଜାରି ରହିଛି। ପାକିସ୍ତାନ ଅଧିକାରୀଙ୍କୁ କୂଟନୀତିକ ସ୍ତରରେ ଯୋଗାଯୋଗ କରି ଭାରତ ପ୍ରତିବାଦ ମଧ୍ୟ ଜଣାଇଥିଲା। ଧୀବରଙ୍କ ଉପରେ ଗୁଳି ଚଳାଇ ପାକିସ୍ତାନ ଜାତିସଂଘ ଜାରି କରିଥିବା ଆଇନର ଉଲ୍ଲଙ୍ଘନ କରିଥିବା କୁହାଯାଉଛି। ‘ପାକିସ୍ତାନୀ ସାମୁଦ୍ରିକ ନିରାପତ୍ତା ଏଜେନ୍‌ସି’ର ୧୦ଜଣ ସଦସ୍ୟଙ୍କ ବିରୋଧରେ ପୋରବନ୍ଦର ନୱିବନ୍ଦର ପୁଲିସ ନରହତ୍ୟା ମାମଲା ରୁଜୁ କରିଛି।

Powered by Froala Editor