ପରୀକ୍ଷାବେଳେ ସ୍କୁଲ ଛାତ ଭୁଶୁଡ଼ିଲା : ୨୫ ଛାତ୍ରଙ୍କ ସମେତ ୩ ଶ୍ରମିକ ଆହତ
ହରିୟାଣାର ସୋନିପତ ଗନ୍ନୌରରେ ପରୀକ୍ଷା ଚାଲୁଥିବା ବେଳେ ହଠାତ୍ ସ୍କୁଲର ଛାତ ଭୁଶୁଡ଼ିବାରୁ ୨୫ଜଣ ଛାତ୍ରଛାତ୍ରୀ ଆହତ ହୋଇଥିବା ଜଣାପଡ଼ିଛି। ଆହତ ଛାତ୍ରଙ୍କୁ ଡାକ୍ତରଖାନା ପଠାଯାଇଛି। ଦୁର୍ଘଟଣାରେ ତିନି ଜଣ ଶ୍ରମିକ ମଧ୍ୟ ଗୁରୁତର ଆହତ ହୋଇଛନ୍ତି।
ସୂଚନା ଅନୁଯାୟୀ, ପ୍ରବଳ ବର୍ଷା ହେତୁ ହରିୟାଣାର ଜିଭାନନ୍ଦ ମଡେଲ୍ ପବ୍ଲିକ୍ ସ୍କୁଲର ଛାତ ବହୁତ ଖରାପ ହୋଇଯାଇଥିଲା। ଏହି କାରଣରୁ, ଛାତ ମରାମତି ପାଇଁ ବିଦ୍ୟାଳୟ ପ୍ରଶାସନ ଶ୍ରମିକଙ୍କୁ ଡ଼ାକି କାମ କରାଉଥିଲେ। ସକାଳ ୧୧ଟା ସମୟରେ ଶ୍ରମିକମାନେ ସ୍କୁଲ ହଲ ଛାତରେ କାମ କରୁଥିଲେ। ଏହି ସମୟରେ ସେହି ହଲରେ ତୃତୀୟ ଏବଂ ଚତୁର୍ଥ ଶ୍ରେଣୀର ପିଲାମାନେ ପରୀକ୍ଷା ଦେଉଥିଲେ। ପରୀକ୍ଷା ସରିବା ପରେ ଛାତ୍ରଛାତ୍ରୀ ନିଜର ବ୍ୟାଗ ନେବାକୁ ଯିବା ବେଳେ ହଠାତ୍ ଛାତ ଭୁଶୁଡ଼ି ପଡ଼ିଥିଲା। ଦୁର୍ଘଟଣାରେ ତିନି ଜଣ ଶ୍ରମିକ ମଧ୍ୟ ଗୁରୁତର ଆହତ ହୋଇଛନ୍ତି। ଆହତ ଛାତ୍ରଛାତ୍ରୀମାନଙ୍କୁ ଗନ୍ନୌର କମ୍ୟୁନିଟି ହସ୍ପିଟାଲକୁ ପଠାଯାଇଥିବା ବେଳେ ୫ଜଣ ଛାତ୍ରଛାତ୍ରୀଙ୍କ ଅବସ୍ଥା ସଙ୍କଟାପନ୍ନ ଥିବାରୁ ସେମାନଙ୍କୁ ଖାନପୁରର ପିଜିଆକୁ ପଠାଯାଇଛି। ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି।
Powered by Froala Editor
