ଓକିଲ ଓ ସିଏଏସ୍ଆଇଙ୍କୁ ଲୁହାଛଡ଼ରେ ଆକ୍ରମଣ କଲେ ଅଙ୍ଗନଓ୍ବାଡି କର୍ମୀ
ଝରିଗାଁ: ନବରଙ୍ଗପୁର ଜିଲା ଝରିଗାଁ ବ୍ଲକ ସଦର ମହକୁମାସ୍ଥିତ ଜେଏମ୍ଏଫ୍ସି କୋର୍ଟ ପରିସରରେ ଶନିବାର ଜଣେ ଅଙ୍ଗନଓ୍ବାଡି କର୍ମୀ ପଶି ସରକାରୀ ଓକିଲ ଓ ସିଏଏସ୍ଆଇଙ୍କୁ ଲୁହାଛଡ଼ରେ ଆକ୍ରମଣ କରିଥିବା ଜଣାପଡ଼ିଛି। ଏଥିରେ ସରକାରୀ ଓକିଲ ପ୍ରଦୀପ କୁମାରଙ୍କ ମୁଣ୍ଡରେ ଗଭୀର ଆଘାତ ଲାଗିଥିବାବେଳେ ସିଏଏସ୍ଆଇ ମୀନକେତନ ଗନ୍ତାୟତଙ୍କ ମୁଣ୍ଡ ମଧ୍ୟ ଫାଟିଯାଇଥିବା ଜଣାପଡ଼ିଛି। ତେବେ ଏହି ସମୟରେ ବିଚାରପତି ସ୍ମିତା ଲାକ୍ରା ମଧ୍ୟ ଆକ୍ରମଣର ଶିକାର ହୋଇଥିବା କୁହାଯାଉଥିବାବେଳେ ଏ ନେଇ କୌଣସି ସ୍ପଷ୍ଟ ସୂଚନା ମିଳିପାରିନାହିଁ। ଏଭଳି କାଣ୍ଡ ଘଟାଇଥିବା କରସାହାଣ୍ଡି ଗ୍ରାମର ଅଙ୍ଗନଓ୍ବାଡି କର୍ମୀ ସନମତୀ ମାଝୀ(୩୦)ଙ୍କୁ ଝରିଗାଁ ପୋଲିସ ଗିରଫ ପରେ କୋର୍ଟ ଚାଲାଣ କରିଛି।
ସୂଚନାନୁଯାୟୀ, ସନମତୀ ବ୍ୟାଗ୍ ଧରି ପ୍ରଥମେ ବିଚାରପତିଙ୍କ କୋର୍ଟ ହଲ୍ ମଧ୍ୟକୁ ପ୍ରବେଶ କରିବାକୁ ଚେଷ୍ଟା କରିଥିଲା। କିନ୍ତୁ ସେହି ଭିତରକୁ ବିନା ଅନୁମତିରେ ପ୍ରବେଶ ନିଷେଧ ନେଇ ବାରଣ କରାଯାଇଥିଲା। ଏହାପରେ ସେ ସରକାରୀ ଓକିଲ ପ୍ରଦୀପ କୁମାର ପଟ୍ଟନାୟକଙ୍କ ନିକଟକୁ ଯାଇଥିଲେ। ପାଖରେ ଥିବା ଚେୟାରରେ ସନମତୀଙ୍କୁ ବସିବାକୁ କହି ପ୍ରଦୀପ ଫୋନ୍ରେ କଥା ହେଉଥିଲେ। ଇତି ମଧ୍ୟରେ ସନମତୀ ବ୍ୟାଗ୍ରୁ ଲୁହାଛଡ଼ ବାହାର କରି ସରକାରୀ ଓକିଲ ପ୍ରଦୀପଙ୍କ ମୁଣ୍ଡକୁ ପିଟି ଦେଇଥିଲେ। ଅଚାନକ ଆକ୍ରମଣ ପରେ ପ୍ରଦୀପ ପାଟି କରିବାରୁ ଚାମ୍ବରରେ ବସିଥିବା ବିଚାରପତି ସ୍ମିତା ଲାକ୍ରା, ସିଏଏସ୍ଆଇ ମୀନକେତନ ଗନ୍ତାୟତ, ଅଦାଲତରେ କାର୍ଯ୍ୟରତ କର୍ମଚାରୀ ଆସି ଛଡ଼ାଇଥିଲେ। ଏହି ସମୟରେ ମୀନକେତନଙ୍କ ମୁଣ୍ଡରେ ମଧ୍ୟ ମାଡ଼ ବାଜିଥିଲା। ରକ୍ତାକ୍ତ ଅବସ୍ଥାରେ ପ୍ରଦୀପ ଏବଂ ମୀନକେତନଙ୍କୁ ଝରିଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଖବରପାଇ ଝରିଗାଁ ଆଇଆଇସି ରଚିତା ମାଡକାମୀ ପହଞ୍ଚି ସନମତୀଙ୍କୁ ଗିରଫ କରିଥିଲେ। ଚିକିତ୍ସା ପରେ ପ୍ରଦୀପ ଝରିଗାଁ ଥାନାରେ ଲିଖିତ ଅଭଯୋଗ କରିଥିଲେ। ପୋଲିସ କେସ୍ ନମ୍ବର୨୧୯/୨୦୨୬ ରେ ମାମଲା ରୁଜୁ କରିଛି। ଆଇଆଇସି ମାଡକାମୀ ଘଟଣା ତଦନ୍ତ କରୁଛନ୍ତି। ପୂର୍ବରୁ ସନମତୀଙ୍କ ଯୌତୁକ ନିର୍ଯାତନା ମାମଲା କୋର୍ଟରେ ବିଚାରାଧୀନ ରହିଛି। କେସ ସମ୍ପର୍କରେ ପୂର୍ବରୁ ଆଲୋଚନା କରିଥିଲେ। ସ୍ବାମୀଙ୍କଠାରୁ ଭରଣପୋଷଣ ଆଣିବା ଦିଗରେ ସହାୟତା କରିବା ନେଇ କଥା ହୋଇଥିଲେ। ତେବେ ହଠାତ୍ ଏପରି ଆସି ଆକ୍ରମଣ କରିବେ ବୋଲି ଜାଣି ନ ଥିବା ପ୍ରଦୀପ କହିଛନ୍ତି। ଘଟଣା ପରେ ଚିଫ୍ ଜୁଡିସିଆଲ ମାଜିଷ୍ଟ୍ରେଟ୍ ସୀମା ତ୍ରିପାଠୀ, ଜିଲା ଏବଂ ଦୌରା ଜଜ୍ ସଂଗ୍ରାମ କେଶରୀ ପଟ୍ଟନାୟକ, ଏଏସ୍ପି ଆଦିତ୍ୟ କୁମାର ସେନ୍, ଉମରକୋଟ ଏସ୍ଡିପିଓ ଶୁଭେନ୍ଦୁ ଶବର ଝରିଗାଁରେ ପହଞ୍ଚି ବିଚାରପତି ସ୍ମିତା ଲାକ୍ରାଙ୍କ ସହ ଆଲୋଚନା କରିଛନ୍ତି। ସେମାନଙ୍କ ବ୍ୟତୀତ ଉମରକୋଟ ବାର୍ ଆସୋସିଏଶନ ସମ୍ପାଦକ କୃଷ୍ଣଚନ୍ଦ୍ର ନନ୍ଦ, ପୂର୍ବତନ ସଭାପତି ପ୍ରଶାନ୍ତ ସାହୁ, ପୂର୍ବତନ ସମ୍ପାଦକ ଶାନ୍ତନୁ ବାହିନୀପତି, କାଳିପ୍ରସାଦ ନନ୍ଦ ମଧ୍ୟ ଘଟଣାସ୍ଥଳରେ ପହଞ୍ଚି ଥିଲେ। ପୂର୍ବତନ ଓକିଲ ସଂଘ ସଭାପତି ପ୍ରଶାନ୍ତ କୁମାର ସାହୁ ଘଟଣାକୁ ନିନ୍ଦା କରିବା ସହ ଓକିଲମାନେ ସୁରକ୍ଷିତ ନାହାନ୍ତି ବୋଲି କହିଛନ୍ତି।
Powered by Froala Editor
