ଭୁବନେଶ୍ୱର:  ଅର୍ଣ୍ଣବ ପରେ ମୁରାସୁ ଆସିଲା । ମୁରାସୁ ଯିବା ପରେ ବଙ୍ଗୋପସାଗରରେ ପୁଣି କିଛି ହେଲା ଭଳି ସଙ୍କେତ ମିଳିଲାଣି । ଆନ୍ତର୍ଜାତିକ ପାଣିପାଗ ମଡେଲ୍ ଜିଏଫଏସ୍‌ ପ୍ରାକ୍ ଆକଳନ ଅନୁସାରେ ୧୬-୧୭ ତାରିଖବେଳକୁ ଆଉ ଲଘୁଚାପ ଭାରତ ଉପକୂଳ ପାଖକୁ ଆସିପାରେ । ସମ୍ଭବତଃ ଓଡ଼ିଶା-ପଶ୍ଚିମବଙ୍ଗ ଉପକୂଳରେ ଘଷି ହୋଇ ବାଂଲାଦେଶ ଆଡ଼କୁ ଯାଇପାରେ । ମାତ୍ର ଏହା କେବଳ ପ୍ରାକ୍ ଆକଳନ । ଏଥିରେ ଅନେକ କିଛି ପରିବର୍ତ୍ତନ ବି ଘଟିପାରେ । ଯଦି ଏହି ସିଷ୍ଟମ ଓଡ଼ିଶା ଉପକୂଳ ପାଖକୁ ଆସେ, ତେବେ ରାଜ୍ୟରେ ପୁଣି ବଡ଼ ବର୍ଷା ସମ୍ଭାବନା ରହିଛି ।
ଆନ୍ତର୍ଜାତିକ ପାଣିପାଗ ପୂର୍ବାନୁମାନ ସଂସ୍ଥା ଆକ୍ୟୁୱେଦରର ବରିଷ୍ଠ ପାଣିପାଗ ବିଜ୍ଞାନୀ ଜାସନ ନିକୋଲ୍ସ ବଙ୍ଗୋପସାଗରରେ ନିକଟରେ ଆସିଥିବା ବାତ୍ୟାକୁ କେତେକ ସୂଚନା ଜାରି କରିଛନ୍ତି । ତେବେ ଆସନ୍ତା ୧୨ରୁ ୧୬ ତାରିଖ ଭିତରେ ବଙ୍ଗୋପସାଗରରେ କିଛି ସିଷ୍ଟମ ସୃଷ୍ଟି ହେବା ନେଇ ସେ ସଙ୍କେତ ଦେଖାଇଛନ୍ତି । ଆଉ କେତେକ ମଡେଲ୍ ଏବେ କିଛି ସ୍ପଷ୍ଟ ସୂଚନା ଦେଇନାହାନ୍ତି । ଭାରତୀୟ ପାଣିପାଗ ବିଜ୍ଞାନ ବିଭାଗ (ଆଇଏମଡି) ବର୍ତ୍ତମାନ ଏ ବାବଦରେ କୌଣସି ସୂଚନା ଦେଇନାହିଁ । ତେଣୁ ଏହାକୁ ନେଇ ଆତଙ୍କିତ ହେବାର କୌଣସି କାରଣ ନାହିଁ ।

ଇତିମଧ୍ୟରେ ବାତ୍ୟା ମୁରାସୁ ସୋମବାର ରାତିରେ ଆନ୍ଧ୍ର ଉପକୂଳରେ ଲ୍ୟାଣ୍ଡଫଲ୍ କରିଛି । ଏଯାବତ୍ ଓଡ଼ିଶାରେ ଏହାର ବଡ଼ ଧରଣର ପ୍ରଭାବ ପରିଲକ୍ଷିତ ହୋଇନାହିଁ । କେତେକ ଜିଲ୍ଲାରେ ପାଗ ଆଂଶିକ ମେଘୁଆ ଥିବାବେଳେ କିଛି ସ୍ଥାନରେ ହାଲୁକା ବର୍ଷା ହୋଇଛି । ଦିନ ଭିତରେ କାଁ ଭାଁ ବର୍ଷା ହୋଇଛି । ଆଜି ବିଳମ୍ବିତ ରାତି ଭିତରେ ମୁରାସୁ ଗଭୀର ଅବପାତ ହେବା ସହ ଏହାର ବଳ କ୍ରମଶଃ କମିବ । ବୁଧବାର ସକାଳ ଭିତରେ କୋରାପୁଟ, ମାଲକାନଗିରିର ସ୍ଥାନେ ସ୍ଥାନେ ପ୍ରବଳ ବର୍ଷା ହୋଇପାରେ । ପବନ ବେଗ ୪୦-୫୦ କିମି ରହିପାରେ । ଝଟକା ପବନ ୬୦ କିମି ପର୍ୟ୍ୟନ୍ତ ଯାଇପାରେ । ଏହାବାଦ୍ ଉପକୂଳ ଓଡ଼ିଶା ଓ ସଂଲଗ୍ନ ଜିଲ୍ଲାଗୁଡ଼ିକରେ ଘଡ଼ଘଡ଼ି ସହ ୩୦-୪୦ ପବନ ରହିପାରେ । ବଡ଼ ବର୍ଷା ନେଇ କୌଣସି ସୂଚନା ନାହିଁ । ୭ରୁ ପାଗ ଶୁଖିଲା ରହିବ । ଦୀପାବଳିକୁ ପାଗ ଭଲ ରହିପାରେ ।

Powered by Froala Editor