ଭୁବନେଶ୍ୱର : ଉତ୍କଳ ବିଶ୍ୱବିଦ୍ୟାଳୟ ହଷ୍ଟେଲରେ ରହୁଥିବା ଛାତ୍ରୀଙ୍କୁ ଜଣ୍ଡିସ୍ । ଏକାଧିକ ଛାତ୍ରୀ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଏହାକୁ ନେଇ କ୍ୟାମ୍ପସରେ ଭୟର ବାତାବରଣ ସୃଷ୍ଟି ହୋଇଛି । ସୋମବାର କର୍ତ୍ତୃପକ୍ଷ ମେଡିକାଲ୍ ଟିମ୍ ସହାୟତାରେ ୨୦ରୁ ଅଧିକ ଛାତ୍ରଛାତ୍ରୀଙ୍କର ରକ୍ତ ନମୁନା ସଂଗ୍ରହ କରିଛନ୍ତି । କିଛି ଛାତ୍ରାବାସରେ ୨ରୁ ୪ଜଣଙ୍କ ଜ୍ୱର ସହ ଝାଡ଼ାବାନ୍ତି ହେଉଥିବାର ମଧ୍ୟ ଅଭିଯୋଗ ଆସିଛି । ଦୂଷିତ ପାଣି ପାଇଁ ଛାତ୍ରୀମାନେ ରୋଗାକ୍ରାନ୍ତ ହୋଇଥିବା ବେଳେ ବିଶ୍ୱବିଦ୍ୟାଳୟ ଅନ୍ତେବାସୀଙ୍କ ସ୍ୱାସ୍ଥ୍ୟ ସୁରକ୍ଷାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଅନ୍ୟପଟେ ବାଣୀବିହାର କ୍ୟାମ୍ପସ୍‌ରେ ଜଣ୍ଡିସ୍ ବ୍ୟାପିଥିବାରୁ ମିଡ୍ ସେମିଷ୍ଟର ପରୀକ୍ଷାକୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ସ୍ଥଗିତ ରଖାଯାଇଛି । ଏ ସମ୍ପର୍କରେ ପିଜି କାଉନସିଲ ଚେୟାରମେନଙ୍କ ପକ୍ଷରୁ ନୋଟିସ୍ ଜାରି କରାଯାଇଛି । ନୋଟିସ୍ ଅନୁଯାଇ ଉତ୍କଳ ବିଶ୍ୱବିଦ୍ୟାଳୟର ସମସ୍ତ ପରୀକ୍ଷାକୁ ବର୍ତ୍ତମାନ ସ୍ଥଗିତ ରଖାଯାଇଛି ।
ସୂଚନାଯୋଗ୍ୟ, ବିଶ୍ୱବିଦ୍ୟାଳୟର ୬ ଓ ୭ ନମ୍ବର ଛାତ୍ରୀ ନିବାସରେ ୨୦ରୁ ଅଧିକ ଛାତ୍ରୀ ଅସୁସ୍ଥ ହୋଇଥିବାର ଅଭିଯୋଗ । ପେଟ ଯନ୍ତ୍ରଣା ହେବା ସହ ଝାଡ଼ାବାନ୍ତି ହୋଇଥିବାର ଅଭିଯୋଗ ଆଣିଛନ୍ତି । ଦୂଷିତ ପାଣି ପାଇଁ ରୋଗ ବ୍ୟାପିଥିବା ନେଇ ଅଭିଯୋଗ ହୋଇଛି । ଜଣେ ଛାତ୍ରୀ ଅଭିଯୋଗ ଆଣିଛନ୍ତି, ଛାତ୍ର ସଂସଦ ନିର୍ବାଚନ ସମୟରେ ଜଣେ ଦୁଇ ଜଣ ଛାତ୍ରୀଙ୍କର ଝାଡ଼ା, ବାନ୍ତି ହେଉଥିବାରୁ ଛୁଟି ନେଇ ଘରକୁ ଯାଇଥିଲେ । ଏହାପରେ ଦଶହରା ପାଇଁ ବିଶ୍ୱବିଦ୍ୟାଳୟ ଛୁଟି ହୋଇଥିଲା । ମାତ୍ର ଛୁଟି ଖୋଲିବା ପରେ କିଛି ପିଲାଙ୍କ ପାଖେ ଏପରି ଅବସ୍ଥା ଦେଖିବାକୁ ମିଳିଥିଲା । ଝାଡ଼ାବାନ୍ତି ସହ ଜ୍ୱର ଥିବା ଲକ୍ଷଣ ଦେଖିବାକୁ ମିଳିଥିଲା । ଦୁଇ ଜଣ ଛାତ୍ରୀ ନିଜ ଖର୍ଚ୍ଚରେ ଘରୋଇ ହସ୍ପିଟାଲରେ ଭର୍ତ୍ତି ହୋଇ ଚିକିତ୍ସିତ ହେଉଛନ୍ତି ।

କ୍ୟାମ୍ପସରେ ରହୁଥିବା ଛାତ୍ରୀଙ୍କ ଅଭିଯୋଗ, ପ୍ରତିବର୍ଷ ଏପରି ଘଟଣା ଦେଖିବାକୁ ମିଳୁଛି । ବିଭିନ୍ନ ସ୍ଥାନରେ ଜଳଯୋଗାଣ ପାଇପ ଫାଟି ପାଣି ଲିକ୍ ହେଉଛି । ଦୁର୍ଗନ୍ଧ ବାହାରୁଛି। ହଷ୍ଟେଲ ଖାଦ୍ୟ ମଧ୍ୟ ଅପରିଷ୍କାର ପରିବେଶରେ ପ୍ରସ୍ତୁତ କରାଯାଉଛି । ଏଥିପ୍ରତି ବିଶ୍ୱବିଦ୍ୟାଳୟ କର୍ତ୍ତୃପକ୍ଷ କୌଣସି ପଦକ୍ଷେପ ନେଉନାହାନ୍ତି ।8 ଅନ୍ୟ ହଷ୍ଟେଲ୍‌କୁ ନ ବ୍ୟାପିବା ପାଇଁ ଏବଂ ଏପରି କାହିଁକି ହେଲା ତାର ସମୀକ୍ଷା କରିବା ଲାଗି କର୍ତ୍ତୃପକ୍ଷ ସଜାଗ ଅଛନ୍ତି । ତ୍ୱରିତ ପଦକ୍ଷେପ ଗ୍ରହଣ କରିଛନ୍ତି ।

Powered by Froala Editor