ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋର ନୂଆ ମହାନିର୍ଦ୍ଦେଶକ ଭାବେ ଦାୟିତ୍ୱ ଗ୍ରହଣ କରିଛନ୍ତି ଓଡ଼ିଆ ପୁଅ
ଭୁବନେଶ୍ୱର: ନାର୍କୋଟିକ୍ସ କଣ୍ଟ୍ରୋଲ ବ୍ୟୁରୋ (ଏନସିବି)ର ନୂଆ ମହାନିର୍ଦ୍ଦେଶକ (ଡିଜି) ଭାବେ ଦାୟିତ୍ୱ ଗ୍ରହଣ କରିଛନ୍ତି ଓଡ଼ିଆ ଆଇପିଏସ୍ ସତ୍ୟନାରାୟଣ ପ୍ରଧାନ । ଏନଡିଆରଏଫ ଡିଜି ଦାୟିତ୍ୱରେ ଥିବାବେଳେ ଏନସିବି ଭଳି ଗୁରୁତ୍ୱପୂର୍ଣ୍ଣ ଦାୟିତ୍ୱ ମିଳିବା ନେଇ ଶ୍ରୀ ପ୍ରଧାନ କହିଛନ୍ତି, ସାରା ଭାରତରେ ନିଶା କାରବାର ରୋକିବା ପାଇଁ ଭାରତ ସରକାର ମେଗା ଯୋଜନା ପ୍ରସ୍ତୁତ କରୁଛନ୍ତି । ପ୍ରସ୍ତାବିତ ଯୋଜନା ଅନୁଯାୟୀ ପ୍ରତି ରାଜ୍ୟରେ ଆଞ୍ଚଳିକ କାର୍ୟ୍ୟାଳୟ ଖୋଲିବ ଏନ୍ସିବି । ଏନ୍ସିବିର ମାନବ ସମ୍ବଳକୁ ୪୦୦ରୁ ୧୧୦୦କୁ ବୃଦ୍ଧି କରାଯିବ । ଓଡ଼ିଶାରେ ଏନ୍ସିବି ନେଟୱର୍କକୁ ଆହୁରି ସୁଦୃଢ଼ କରାଯିବ । ମାନବ ସମ୍ବଳ ବୃଦ୍ଧି କରାଯିବା ସହ ଗୁଇନ୍ଦା ନେଟୱର୍କକୁ ସଶକ୍ତ କରାଯିବ । କେନ୍ଦ୍ର ଓ ରାଜ୍ୟର ଗୁଇନ୍ଦା ସଂସ୍ଥା ସହ ଏନସିବି ନିଜର ଗୁଇନ୍ଦା ବିଭାଗକୁ ଆହୁରି ସୁଦୃଢ଼ କରିବ । ନିଶା କାରବାର ଧରିବାକୁ ଟେକ୍ନୋଲୋଜିର ବ୍ୟବହାର ବଢ଼ାଯିବ । ନିଶା କେଉଁଠୁ ଆସୁଛି, ତା’ର ମୂଳସ୍ଥଳକୁ ଖୋଜାଯିବ । ଏନ୍ଡିଆରଏଫ ସହ କେନ୍ଦ୍ର ସରକାର ଏନସିବି ଭଳି ଯେଉଁ ଗୁରୁ ଦାୟିତ୍ୱ ଦେଇଛନ୍ତି, ଦକ୍ଷତାର ସହ ତାହାକୁ ତୁଲାଇବି ବୋଲି ଶ୍ରୀ ପ୍ରଧାନ କହିଛନ୍ତି।
Powered by Froala Editor
