୧୧ ଦିନରେ ଟଙ୍କା ଡବଲ କରିବା ଆଶା ଜଣେ ଡାକ୍ତରଙ୍କୁ ସର୍ବସ୍ୱାନ୍ତ କରିଦେଇଛି । ପୁଣେର ଜଣେ ୭୫ ବର୍ଷୀୟ ଡାକ୍ତରଙ୍କଠାରୁ ସାଇବର ଠକମାନେ ୧୨.୩୧ କୋଟି ଟଙ୍କା ଠକି ନେଇଛନ୍ତି। ସେମାନେ ଷ୍ଟକ୍ ବଜାରରେ ନିବେଶ କରି ମାତ୍ର ୧୧ ଦିନ ମଧ୍ୟରେ ତାଙ୍କ ଟଙ୍କା ଦୁଇଗୁଣ କରିବାର ପ୍ରତିଶ୍ରୁତି ଦେଇଥିଲେ। ୭ ମାର୍ଚ୍ଚରୁ ୧୮ ମାର୍ଚ୍ଚ ମଧ୍ୟରେ ଡାକ୍ତରଜଣକ ୮ଟି ଆର୍ଥିକ କାରବାର କରିଥିଲେ । ଠକମାନଙ୍କ ଦ୍ୱାରା ପ୍ରଦାନ କରାଯାଇଥିବା ଭିନ୍ନ ଭିନ୍ନ ବ୍ୟାଙ୍କ ଆକାଉଣ୍ଟକୁ ମୋଟ ୧୨.୩୧ କୋଟି ଟଙ୍କା ସ୍ଥାନାନ୍ତର କରିଥିଲେ।

ପୋଲିସ କହିଛି ଯେ ଯେତେବେଳେ ବ୍ୟକ୍ତି ଜଣକ ଅଧିକ ଟଙ୍କା ନିବେଶ କରିବାକୁ ମନା କଲେ, ଅଭିଯୁକ୍ତ ତାଙ୍କ ସମ୍ପତ୍ତି ଜବତ କରିବାକୁ ଧମକ ଦେଇ ତାଙ୍କୁ ଟଙ୍କା ସ୍ଥାନାନ୍ତର ଜାରି ରଖିବାକୁ ବାଧ୍ୟ କରିଥିଲେ।

ପ୍ରାୟ ତିନି ମାସ ଧରି ସେ ପ୍ରତିଶ୍ରୁତି ଅନୁଯାୟୀ ଫେରି ପାଇବାର ଆଶାରେ ଟଙ୍କା ସ୍ଥାନାନ୍ତର କରି ଚାଲିଥିଲେ। କିନ୍ତୁ ଯେତେବେଳେ କୌଣସି ଟଙ୍କା ଫେରସ୍ତ ହେଲାନାହିଁ ଏବଂ ଠକମାନେ ଅଧିକ ଟଙ୍କା ଦାବି କରିବା ଜାରି ରଖିଲେ, ସେ ଜାଣିପାରିଲେ ଯେ ସେ ଠକାମୀର ଶିକାର ହୋଇଛନ୍ତି ।  ତା'ପରେ ସେ ପୋଲିସ ନିକଟକୁ ଯାଇ ଅଭିଯୋଗ କରିଥିଲେ। ଚଳିତ ବର୍ଷ ଜାନୁଆରୀ ମାସରେ ଠକେଇ ଆରମ୍ଭ ହୋଇଥିଲା ଯେତେବେଳେ ଡାକ୍ତରଜଣକ ଏକ ଅଜଣା ନମ୍ବରରୁ ଷ୍ଟକ୍ ବଜାର ନିବେଶ ମାଧ୍ୟମରେ ହାଇ ରିଟର୍ଣ୍ଣ ପ୍ରଦାନ କରୁଥିବା ଏକ ମେସେଜ୍ ପାଇଥିଲେ।

ସେ ଆଗ୍ରହ ଦେଖାଇବା ପରେ ସାଇବର ଠକମାନେ ତାଙ୍କୁ "VIP Stock 24" ନାମକ ଏକ WhatsApp ଗ୍ରୁପରେ ଯୋଡିଲେ। ଏହି ଗ୍ରୁପ ମାଧ୍ୟମରେ ଅଭିଯୁକ୍ତମାନେ ଆକର୍ଷଣୀୟ ଏବଂ ଲାଭଦାୟକ ଦେଖାଯାଉଥିବା ନିବେଶ ଯୋଜନା ସେୟାର କରିଥିଲେ। ଅଭିଯୋଗ ଆଧାରରେ ସାଇବର ପୋଲିସ ଷ୍ଟେସନରେ ଏକ ଏଫଆଇଆର ରୁଜୁ କରାଯାଇଛି। ଅଭିଯୁକ୍ତଙ୍କୁ ଖୋଜିବା ଏବଂ ଟଙ୍କା କାରବାର ଟ୍ରାକ୍ କରିବା ପାଇଁ ପୋଲିସ ତଦନ୍ତ ଆରମ୍ଭ କରିଛି ।

Powered by Froala Editor