୧୩ ଦିନ ପୂର୍ବେ ଇରାନ, ଇସ୍ରାଏଲ ଏବଂ ଆମେରିକା ମଧ୍ୟରେ ଏକ ସାମରିକ ସଂଘର୍ଷ ହର୍ମୁଜ୍ ପ୍ରଣାଳୀ ଦେଇ ଯାତାୟାତ ମାର୍ଗ ବନ୍ଦ କରିଦେଇଥିଲା। ଏହି ମାର୍ଗ ଦେଇ ବିଶ୍ୱର ୨୦ ପ୍ରତିଶତ ଅଶୋଧିତ ତୈଳ, ୨୦ ପ୍ରତିଶତ ପ୍ରାକୃତିକ ବାଷ୍ପ ଏବଂ ୨୦ ପ୍ରତିଶତ ଏଲପିଜି ପ୍ରବାହିତ ହୋଇଥାଏ। ଯଦିଓ ଏହି ସଂଘର୍ଷ ସୃଷ୍ଟି କରିବାରେ ଭାରତର କୌଣସି ଭୂମିକା ନାହିଁ। ତଥାପି ଅନେକ ଦେଶ ପରି, ଭାରତକୁ ଏହାର ପରିଣାମ ସହ ମୁକାବିଲା କରିବାକୁ ପଡ଼ିବ। ଏଲପିଜି ସଙ୍କଟ ମଧ୍ୟରେ ବଡ ଆଶ୍ୱସନା ଦେଇଛନ୍ତି ପେଟ୍ରୋଲିୟମ୍ ଏବଂ ପ୍ରାକୃତିକ ଗ୍ୟାସ୍ ମନ୍ତ୍ରୀ ହରଦୀପ ସିଂହ ପୁରି। ଗୁରୁବାର ମନ୍ତ୍ରୀ କହିଛନ୍ତି ଯେ ଦେଶରେ କୌଣସି ଇନ୍ଧନ ଅଭାବ ନାହିଁ। ଭାରତରେ ପର୍ଯ୍ୟାପ୍ତ ଅଶୋଧିତ ତୈଳ ଅଛି। ଭାରତର ଅଶୋଧିତ ଯୋଗାଣ ସ୍ଥିତି ସୁରକ୍ଷିତ ବୋଲି ଦାବି କରି ମନ୍ତ୍ରୀ ଲୋକଙ୍କୁ ଗୁଜବ ପ୍ରଚାର ନକରିବା ଏବଂ ମିଥ୍ୟା କାହାଣୀ ସୃଷ୍ଟି କରିବାରୁ ଦୂରେଇ ରହିବାକୁ ଅନୁରୋଧ କରିଛନ୍ତି।

ମନ୍ତ୍ରୀ କହିଛନ୍ତି, ଆମର ଗୋଟିଏ ପଡ଼ୋଶୀ ଦେଶ ଦୁଇ ସପ୍ତାହ ପାଇଁ ସବୁ ସ୍କୁଲ ବନ୍ଦ କରିଦେଇଛି, ସରକାରୀ କାର୍ଯ୍ୟାଳୟରେ ଚାରି ଦିନିଆ କାର୍ଯ୍ୟ ସପ୍ତାହ ଲାଗୁ କରିଛି। ୫୦ ପ୍ରତିଶତ ସରକାରୀ କର୍ମଚାରୀଙ୍କୁ ଘରୁ କାମ କରିବାକୁ ନିର୍ଦ୍ଦେଶ ଦେଇଛି। ସରକାରୀ ଯାନବାହନ ପାଇଁ ଇନ୍ଧନ ଭତ୍ତା ଅଧା କରିଦେଇଛି ଏବଂ ୬୦ ପ୍ରତିଶତ ସରକାରୀ ଯାନବାହାନ ରାସ୍ତାରୁ ବାହାର କରିଦେଇଛି। ଏହି ଦେଶ ନିଜ ଇତିହାସରେ ସବୁଠାରୁ ବଡ଼ ଇନ୍ଧନ ମୂଲ୍ୟ ବୃଦ୍ଧି ଦେଖିଛି, ଗୋଟିଏ ସପ୍ତାହ ମଧ୍ୟରେ ପେଟ୍ରୋଲ ପ୍ରାୟ ୨୦ ପ୍ରତିଶତ ମହଙ୍ଗା ହୋଇଛି। ଅନ୍ୟ ଏକ ପଡ଼ୋଶୀ ଦେଶ ଇନ୍ଧନ ସଞ୍ଚୟ କରିବା ପାଇଁ ବିଶ୍ୱବିଦ୍ୟାଳୟଗୁଡ଼ିକୁ ଶୀଘ୍ର ବନ୍ଦ କରିଦେଇଛି ଏବଂ ଇଦ୍ ଅଲ୍-ଫିତର ଛୁଟିକୁ ସ୍ଥଗିତ ରଖିଛି। 

Powered by Froala Editor