ଭୁବନେଶ୍ବର: ରାଜ୍ୟରେ ସୃଷ୍ଟି ହେବ ସୁରକ୍ଷିତ 'ଏଆଇ' ଭିତ୍ତିଭୂମି । ଓଡ଼ିଆରେ ହେବ 'ଏଆଇ ଆପ୍ଲିକେସନ' । ଭିଜନ-୨୦୩୬ ଓ ୨୦୪୭କୁ ଦୃଷ୍ଟିରେ ରଖି ରାଜ୍ୟରେ ଏକ ସୁସ୍ଥ ଓ ସୁରକ୍ଷିତ କୃତ୍ରିମ ବୁଦ୍ଧିମତା ବା ଏଆଇ ବାତାବରଣ ସୃଷ୍ଟି କରିବାକୁ ଚେଷ୍ଟା କରୁଛନ୍ତି ସରକାର । ଏଥିପାଇଁ ଦେଶର ପ୍ରମୁଖ ଏଆଇ କମ୍ପାନୀ ସର୍ଭମର ଅଧିକାରୀଙ୍କ ଆଲୋଚନା କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ ଅନ୍ୟ ବରିଷ୍ଠ ଅଧିକାରୀ । ଲୋକସେବା ଭବନରେ ଅନୁଷ୍ଠିତ ବୈଠକରେ ଦୀର୍ଘକାଳୀନ ସାଧାରଣ ଲୋକଙ୍କ ଦକ୍ଷତା ବୃଦ୍ଧି ସହ ରାଜ୍ୟର ନିଜସ୍ଵ ସାର୍ବଭୌମ୍ୟ ଭିତ୍ତିଭୂମି ସୃଷ୍ଟି କରିବା ନେଇ ଆଲୋଚନା ହୋଇଛି । ବୈଠକରେ ରାଜ୍ୟ ସରକାର ରାଜ୍ୟରେ ଏକ ସୁରକ୍ଷିତ ଏଆଇ ଭିତ୍ତିଭୂମି ସୃଷ୍ଟି ସହ ରାଜ୍ୟର ଡାଟା ପରିଚାଳନା ଓ ସାଧାରଣ ଲୋକଙ୍କ ପାଇଁ ଉପଯୋଗୀ ଏଆଇ ପରିବେଶ ସୃଷ୍ଟି ଉପରେ ଗୁରୁତ୍ବ ଦିଆଯାଇଛି ।
ରାଜ୍ୟରେ ଶିକ୍ଷା, କୃଷି, ସ୍ୱାସ୍ଥ୍ୟ ସେବା, ଇ-ଗଭର୍ଣ୍ଣାନ୍ସ ଓ ସର୍ବସାଧାରଣ ସୁରକ୍ଷା ନେଇ ସ୍ଵର ପରିଚାଳିତ ବା ଭଏସ ଏନବୁଲ ଏଆଇ ଆପ୍ଲିକେସନର ବିକାଶକୁ ମଧ୍ୟ ପ୍ରାଧାନ୍ୟ ଦିଆଯାଇଛି । ଏହି ଆପ୍ଲିକେସନ ଦ୍ୱାରା ରାଜ୍ୟର ତୃଣମୂଳସ୍ତର ପର୍ଯ୍ୟନ୍ତ ସରକାରଙ୍କ ବିକାଶମୂଳକ ଯୋଜନାର ସୁଫଳ ଓ ବାର୍ତ୍ତା ପହଞ୍ଚିପାରିବ । ବିଶେଷକରି ଗ୍ରାମାଞ୍ଚଳ ଓ ଆଦିବାସୀ ଅଧ୍ୟଷିତ ଅଞ୍ଚଳରେ ରହୁଥିବା ଅଳ୍ପଶିକ୍ଷିତ ଲୋକଙ୍କ ପାଇଁ ଏହା ଲାଭଦାୟକ ହୋଇପାରିବ । ଏହା ଦ୍ୱାରା ସାଧାରଣ ଗ୍ରାମୀଣ ଲୋକେ ଯୋଜନାର ସୁଫଳ ନେବା ସହ ନିଜ ଅଭିଯୋଗ ମଧ୍ୟ ସହଜରେ ଦାଖଲ କରିପାରିବେ ।
ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି,"ଓଡ଼ିଶା କେବଳ ଟେକ୍ନୋଲୋଜିକୁ ଅନୁକରଣ କରିବ ନାହିଁ । ବରଂ ନୂଆ ଟେକ୍ନୋଲୋଜିକୁ ଆପଣାଇବାରେ ଅନ୍ୟମାନଙ୍କ ପାଇଁ ମାର୍ଗଦର୍ଶକ ସାଜିବ । ପ୍ରଶାସନିକ ବ୍ୟବସ୍ଥାରେ ଓଡ଼ିଶାର ଏଆଇ ଅନ୍ୟ ରାଜ୍ୟ ପାଇଁ ମାଇଲଖୁଣ୍ଟ ହେବ । ଏହା ଦ୍ବାରା ଲୋକଙ୍କୁ ସେବା ପ୍ରଦାନ ସହଜ ହେବ ।" ମୁଖ୍ୟମନ୍ତ୍ରୀ ସହ ରାଜ୍ୟ ବୈଷୟିକ ଓ ଆଇଟି ମନ୍ତ୍ରୀ ମୁକେଶ ମହାଲିଙ୍ଗ, ମୁଖ୍ୟ ଶାସନ ସଚିବ ଅନୁ ଗର୍ଗ, ବିଭାଗୀୟ ପ୍ରମୁଖ ଶାସନ ସଚିବ ଓ ଅନ୍ୟ ବରିଷ୍ଠ ଅଧିକାରୀ କମ୍ପାନୀ ଅଧିକାରୀଙ୍କ ସହ ଏଆଇର ଉପଯୋଗ ଏବଂ ରାଜ୍ୟ ଆବଶ୍ୟକତା ସମ୍ପର୍କରେ ଆଲୋଚନା କରିଛନ୍ତି । "

Powered by Froala Editor