ଗୁଣପୁର: ରାୟଗଡା ଜିଲା ପଦ୍ମପୁର ବ୍ଲକ ଅନ୍ତର୍ଗତ ଗୁଲୁଗୁଡା ଉଚ୍ଚ ପ୍ରାଥମିକ ବିଦ୍ୟାଳୟରେ ଏକ ଦୁଃଖଦ ଘଟଣା ଘଟିଛି। ଛାତ୍ରାବାସରେ ରହି ପାଠ ପଢୁଥିବା ଏକ ଚତୁର୍ଥ ଶ୍ରେଣୀର ଛାତ୍ରର ଅକାଳ ବିୟୋଗ ଘଟିଛି। ମଙ୍ଗଳବାର ଘଟିଥିବା ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ବିଦ୍ୟାଳୟ କର୍ତ୍ତୃପକ୍ଷଙ୍କ ଦାୟିତ୍ୱହୀନତାକୁ ନେଇ ଅନେକ ପ୍ରଶ୍ନବାଚୀ ସୃଷ୍ଟି ହୋଇଛି।

ଗତ କିଛିଦିନ ହେବ ଅନିମେଶ(ଛଦ୍ମନାମ) ଅସୁସ୍ଥତା ଅନୁଭବ କରୁଥିଲା। ପରବର୍ତ୍ତୀ ସମୟରେ ସେ ‘ମୂର୍ଚ୍ଛା ରୋଗରେ ଆକ୍ରାନ୍ତ ହୋଇଥିଲା। ବିଳମ୍ବରେ ହେଲେ ମଧ୍ୟ ବିଦ୍ୟାଳୟ କର୍ତ୍ତୃପକ୍ଷ ତାକୁ ପ୍ରଥମେ ତେମ୍ବାଗୁଡା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ତାକୁ ପ୍ରାଥମିକ ଚିକିତ୍ସା କରାଯାଇଥିଲା। ଡାକ୍ତର ତାକୁ ଉତ୍ତମ ଚିକିତ୍ସା ପାଇଁ ପଦ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର ପାଇଁ ପରାମର୍ଶ ଦେଇଥିଲେ। ଛାତ୍ରଜଣକ ଗୁରୁତର ଥିବା ସତ୍ତ୍ୱେ ବିଦ୍ୟାଳୟ କର୍ତ୍ତୃପକ୍ଷ ତାଙ୍କୁ ଉତ୍ତମ ଚିକିତ୍ସା କରାଇବା ପରିବର୍ତ୍ତେ ପରିବାର ଲୋକଙ୍କୁ ହସ୍ତାନ୍ତର କରିଥିଲେ। ଅନିମେଶଙ୍କ ବାପା-ମାଆ ପୁଅକୁ ଚେରମୂଳି ଚିକିତ୍ସା କରାଇବା ପାଇଁ କର୍ତ୍ତୃପକ୍ଷଙ୍କୁ ଜଣାଇଥିଲେ। ସେଠାରେ ଉପସ୍ଥିତ ସ୍କୁଲ କର୍ତ୍ତୃପକ୍ଷ ଡାକ୍ତରୀ ଚିକିତ୍ସାର ଗୁରୁତ୍ୱ ବିଷୟରେ ସେମାନଙ୍କୁ ବୁଝାଇନଥିଲେ। ଜଣେ ଗୁରୁତର ଅସୁସ୍ଥ ଛାତ୍ରଙ୍କୁ ଅନ୍ଧବିଶ୍ୱାସ ଭରସାରେ କିପରି ଛାଡ଼ି ଦେଲେ ତାହାକୁ ନେଇ ପ୍ରଶ୍ନ ଉଠିଛି। ଉଚିତ ସମୟରେ ଉପଯୁକ୍ତ ପରାମର୍ଶ ଓ ଚିକିତ୍ସା ମିଳିନଥିବାରୁ ଶେଷରେ ଘରେ ହିଁ ପିଲାଟିର ମୃତ୍ୟୁ ଘଟିଛି। 

ହଷ୍ଟେଲରେ ରହୁଥିବା ଅନ୍ତେବାସୀଙ୍କର ନିୟମିତ ସ୍ୱାସ୍ଥ୍ୟ ପରୀକ୍ଷା କରାଯାଉଛି କି ନାହିଁ ଏବଂ ଜଣେ ଅସୁସ୍ଥ ଛାତ୍ରଙ୍କ ଜୀବନ ପ୍ରତି ଏତେ ଅବହେଳା କିପରି କରାଗଲା, ତାହା ତଦନ୍ତ ସାପେକ୍ଷ। ଖବର ପାଇ ମଙ୍ଗଳବାର ପଦ୍ମପୁର ମଙ୍ଗଳ ସମ୍ପ୍ରସାରଣ ଅଧିକାରୀ ଅର୍ଚ୍ଚନା ପଣ୍ଡା ଏବଂ ଅତିରିକ୍ତ ଶିକ୍ଷା ଅଧିକାରୀ ଚନ୍ଦ୍ରସେନ ଲିମା ଗୁଲୁଗୁଡା ଗସ୍ତ କରି ଘଟଣାର ପ୍ରାଥମିକ ଅନୁଧ୍ୟାନ କରିଥିଲେ।

Powered by Froala Editor