ଡିପ୍ରେସନ୍ରୁ ଆତ୍ମହତ୍ୟା କରିଦେଲେ ପୂର୍ବତମ ମିସ୍ ପଡୁଚେରୀ
ପୂର୍ବତନ ମିସ୍ ପୁଡୁଚେରୀ ତଥା ଫ୍ୟାସନ୍ ଇଣ୍ଡଷ୍ଟ୍ରିରେ ଅନ୍ତର୍ଭୁକ୍ତୀକରଣର ପ୍ରବକ୍ତା ସାନ୍ ରେଚାଲ ଗାନ୍ଧୀଙ୍କର ଶନିବାର ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ମାତ୍ର ୨୬ ବର୍ଷ ହୋଇଥିଲା । ଏତେ କମ୍ ବୟସରୁ ସେ ଆତ୍ମହତ୍ୟା କରିବା ଘଟଣା ସମସ୍ତଙ୍କୁ ମର୍ମାହତ କରିଛି।
ପୁଲିସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ନିକଟରେ ବିବାହ କରିଥିବା ରେଚାଲ ଡିପ୍ରେସନରେ ଥିଲେ। ଜୁଲାଇ ୫ ତାରିଖରେ ସେ ଅତ୍ୟଧିକ ନିଦ୍ରା ବଟିକା ଖାଇଥିଲେ। ତାଙ୍କ ବାପା ତାଙ୍କୁ ପ୍ରଥମେ ପୁଡୁଚେରୀ ସରକାରୀ ଡାକ୍ତରଖାନାକୁ ନେଇଥିଲେ। ପରେ ତାଙ୍କୁ ଏକ ଘରୋଇ ହସ୍ପିଟାଲ ଓ ପରେ ଜେଆଇପିଏମ୍ଇଆର୍କୁ ସ୍ଥାନାନ୍ତର କରାଯାଇଥିଲା, ଯେଉଁଠାରେ ତାଙ୍କର ମୃତ୍ୟୁ ହୋଇଛି। ଉରୁଲାଇଆଁପେଟ୍ଟାଇ ପୁଲିସ ତଦନ୍ତ ଆରମ୍ଭ କରିଛି।
ସୂଚନା ଅନୁଯାୟୀ, ରେଚାଲ ଫ୍ୟାସନ ଇଣ୍ଡଷ୍ଟ୍ରିରେ ଜଣାଶୁଣା ଥିଲେ। କମ୍ ବୟସରେ ମା’ଙ୍କୁ ହରାଇଥିବା ରେଚାଲଙ୍କୁ ତାଙ୍କ ବାପା ଗାନ୍ଧୀ ବଡ଼ କରିଥିଲେ। ନିଜର କଳା ଚେହେରାକୁ ନେଇ ଶିଳ୍ପର ପକ୍ଷପାତିତାକୁ ସମାଲୋଚନା କରି ରେଚାଲ ରଙ୍ଗଭେଦ ବିରୋଧରେ ଏକ ଦୃଢ଼ ସ୍ୱର ଉଠାଇଥିଲେ । ସେ ୨୦୧୯ରେ ମିସ୍ ଡାର୍କ କୁଇନ୍ ତାମିଲନାଡୁ ଟାଇଟଲ ଜିତି ନିଜର ପରିଚୟ ସୃଷ୍ଟି କରିଥିଲେ ଏବଂ ପରେ ୨୦୨୧ରେ ମିସ୍ ପୁଡୁଚେରୀ ଜିତିଥିଲେ।
Powered by Froala Editor
