ରଥରେ କନାପକା ଆରମ୍ଭ
ପୁରୀ : ରଥରେ ଆରମ୍ଭ ହୋଇଛି କନାପକା। ଦୁଆର ବେଢାରେ ପ୍ରଥମେ କନା ପକାଯାଉଛି। ଗୁରୁବାର ତାଳଧ୍ବଜ ଓ ନନ୍ଦିଘୋଷ ରଥର ଦୁଆର ବେଢାରେ କୋଠ ସୁଆଁସିଆ ସେବକ କନା ପକାଇଛନ୍ତି। ତିନିରଥ ପାଇଁ ନାଲି, ହଳଦିଆ, ନେଳି ଓ କଳା ରଙ୍ଗର କନାରେ ମଣ୍ଡଣି (ଆବରଣ) ପ୍ରସ୍ତୁତ କରାଯାଇଛି। ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥପାଇଁ ନାଲି ଓ ହଳଦିଆ, ଶ୍ରୀବଳଭଦ୍ରଙ୍କ ତାଳଧ୍ବଜ ରଥପାଇଁ ନାଲି ଓ ନେଳି ଏବଂ ଦେବୀ ସୁଭଦ୍ରାଙ୍କ ଦର୍ପଦଳନ ରଥପାଇଁ ନାଲି ଓ କଳା କନା ବ୍ୟବହାର କରାଯାଉଛି। ଏହାଛଡା ଦରଜି ସେବକମାନେ ତିନିରଥ ପାଇଁ କନକମୁଣ୍ଡି ଚାନ୍ଦୁଆ, ଉଡା ଚାନ୍ଦୁଆ ଏବଂ ସାରଥିଙ୍କ ପୋଷାକ ସମେତ ରଥ ସିଂହାସନ ପାଇଁ ଚକା ଅପସର ତକିଆ ପ୍ରସ୍ତୁତ କରିଛନ୍ତି। ରଥ କନକମୁଣ୍ଡିରେ ଶୁକ୍ରବାର ପିତଳ ଚଦର ପକାଯିବ। ତିନିରଥରେ ପ୍ରଭା ଲଗାଯିବ। ମହାରଣା ସେବକ ରଥର ବିଭିନ୍ନ ସ୍ଥାନ ଯାଞ୍ଚ କରିବା ସହ ଅବଶିଷ୍ଟ କାର୍ଯ୍ୟ ଶେଷପାଇଁ ଉଦ୍ୟମ ଚଳାଇଛନ୍ତି। ରଥର ବିଭିନ୍ନ ଅଂଶ ରଙ୍ଗ କରାଯାଇଛି।
Powered by Froala Editor
