ମୁଣ୍ଡରେ ବନ୍ଧୁକ ଲଗାଇ ମହିଳାଙ୍କ ବେକରୁ ଝାମ୍ପି ନେଲେ ସୁନା ଚେନ୍
ଗୋପାଳପୁର: ପ୍ରାତଃ ଭ୍ରମଣ ବେଳେ ମହିଳାଙ୍କ ବେକରୁ ଝାମ୍ପି ନେଲେ ସୁନା ଚେନ୍। ଏଭଳି ଏକ ଅଭାବନୀୟ ଘଟଣା ମଙ୍ଗଳବାର ଘଟିଛି। ଗୋପାଳପୁର ଥାନା ନିକଟରେ ଆଜି ସକାଳେ ଆମ୍ବପୁଆ ଅଞ୍ଚଳର ମହିଳା ଭି ପଦ୍ମାବତୀ ପ୍ରାତଃ ଭ୍ରମଣ କରୁଥିବା ବେଳେ ଇନକମ ଟ୍ୟାକ୍ସ ଅଫିସ ସମ୍ମୁଖରେ ହଠାତ ଦୁଇ ଜଣ ଯୁବକ ଏକ ମୋଟରସାଇକେଲରେ ପଦ୍ମାବତୀଙ୍କ ନିକଟକୁ ଆସିଥିଲେ। ତାଙ୍କ ମୁଣ୍ଡରେ ବନ୍ଧୁକ ଲଗାଇ ବେକରେ ପିନ୍ଧିଥିବା ସୁନା ଚେନକୁ ଲୁଟି ନେଇ ଫେରାର ହୋଇ ଯାଇଥିଲେ। ଘଟଣା ନେଇ ପଦ୍ମାବତୀ ଗୋପାଳପୁର ଥାନାରେ ଅଭିଯୋଗ କରିଛନ୍ତି। ଅଭିଯୋଗ ପାଇ ଗୋପାଳପୁର ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ଆଖପାଖ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରୁଛି।
ଅନ୍ୟପଟେ ଗୋପାଳପୁର ଥାନାରେ ଆବଶ୍ୟକ ସଂଖ୍ୟକ ପୁଲିସ କର୍ମଚାରୀ ଅଭାବରୁ ଅନେକ ସମୟରେ ସଠିକ ଭାବେ ପାଟ୍ରୋଲିଂ ହେଉନଥିବା ସହ ଅପରାଧ ବଢି ଚାଲିଛି ବୋଲି କୁହାଯାଉଛି। ଏହାସହ ଗୋପାଳପୁର ଥାନା ଅଧିନରେ ଆସୁଥିବା ଅନେକ ଅଞ୍ଚଳ ପ୍ରାୟ ୧୦ ରୁ ୧୫ କିମି ମଧ୍ୟରେ ଆସୁଥିବା ବେଳେ ଏପରି ଘଟଣାମାନ ଘଟିବା ପରେ ପୁଲିସ ପହଞ୍ଚିବାରେ ବିଳମ୍ବ ହେଉଥିବାରୁ ଚୋରମାନେ ଘଟଣା ଘଟାଇ ଫେରାର ହେବାକୁ ସକ୍ଷମ ହେଉଥିବା ଅଭିଯୋଗ ରହିଛି। ଏଣୁ ପୁଲିସ ପକ୍ଷରୁ ପାଟ୍ରୋଲିଂ ବ୍ୟବସ୍ଥା କଡାକଡି କରିବାକୁ ସାଧାରଣରେ ଦାବି ହେଉଛି।
Powered by Froala Editor
