ଘରୁ ଗୋଡ଼ କାଢିଲେ କୋଭିଡ୍ ଟେଷ୍ଟିଂ କରିବ ବିଏମସି
ଭୁବନେଶ୍ୱର:ଏଥର ଅମାନିଆଙ୍କୁ ଆଉ ଫାଇନ୍ ନୁହେଁ । ଘରୁ ଗୋଡ଼ କାଢିଲେ କୋଭିଡ୍ ଟେଷ୍ଟିଂ କରିବ ବିଏମସି । ଯଦି ରିପୋର୍ଟ ପଜିଟିଭ ଆସିଲା ରାସ୍ତାରୁ ଆମ୍ବୁଲାନ୍ସ ଯୋଗେ ସିଧା ହସ୍ପିଟାଲ ପଠାଇ ଦିଆଯିବ । ପରୀକ୍ଷା ମୂଳକ ଭାବେ ଉତ୍ତର ଜୋନ୍ ପକ୍ଷରୁ ନିଆଯାଇଛି ଏମିତି ଏକ ନିଆରା ପଦକ୍ଷେପ । ପ୍ରଥମ ଦିନରେ ପ୍ରାୟ ୩ ଶହ ଆମାନିଆଙ୍କର କୋଭିଡ୍ ଆଣ୍ଟିଜେନ୍ ଟେଷ୍ଟ କରାଯାଇଛି ।
ରବିବାର ସଟଡାଉନ୍ ଥିବାରୁ ସକାଳ ସମୟରେ ଗଜପତି ନଗର ରାସ୍ତାରେ ବ୍ଲକିଂ କରାଯାଇ ଚେକିଂ କରାଯାଇଥିଲା । ଯେଉଁମାନେ ଆଇ କାର୍ଡ କିମ୍ବା ଜରୁରୀ କାଗଜପତ୍ର ଦେଖାଇଥିଲେ ସେମାନଙ୍କୁ ଛଡା ଯାଇଥିଲା । ଆଉ ଯେଉଁମାନେ ବିନା କାରଣରେ ବାହାରେ ବୁଲୁଥିଲେ ସେମାନଙ୍କୁ ଅଟକ ରଖାଯାଇ କୋଭିଡ ଟେଷ୍ଟିଂ କରାଯାଇଥିଲା । ରାସ୍ତା ମଝିରେ ପୁଲିସ ଓ ବିଏମସି କର୍ମଚାରୀ ଅଟକାଇ କୋଭିଡ୍ ଆଣ୍ଟିଜେନ୍ କିଟ୍ରେ ସେମାନଙ୍କର ସ୍ୱାବ ପରୀକ୍ଷା କରାଯାଇଥିଲା । ପ୍ରଥମ ଦିନରେ ୩ ଶହ ଅମାନିଆଙ୍କ ଟେଷ୍ଟ ହୋଇଥିବା ବେଳେ ସୌଭାଗ୍ୟବଶତଃ କେହି ଜଣେ ବି ପଜିଟିଭ୍ ଆସିନଥିଲେ । ଆଗାମୀ ଦିନରେ ଅନ୍ୟ ସ୍ଥାନ ମାନଙ୍କରେ ଏମିତି ଟେଷ୍ଟିଂ କରାଯିବ ବୋଲି ବିଏମସି ଉତ୍ତର ଜୋନ୍ ଜେଡିସି ପୁରନ୍ଦର ନନ୍ଦ କହିଛନ୍ତି । ବିଏମସିର ଏହି ପଦକ୍ଷେପକୁ ଲୋକେ ସ୍ୱାଗତ କରିଛନ୍ତିି।
Powered by Froala Editor
