ଖୋର୍ଦ୍ଧା ଜିଲ୍ଲା ବେଗୁନିଆ ବ୍ଲକ ସାରୁଅ ଶିଳ୍ପାଞ୍ଚଳରେ ଥିବା ଓଡିଶା ଇନ୍‌ଫ୍ରାଟେକ ପ୍ରାଇଭେଟ୍ ସଂସ୍ଥାର ଷ୍ଟୁଡିଓରେ ଭୟାବହ ଅଗ୍ନିକାଣ୍ଡ ଘଟିଛି । ଅଗ୍ନିକାଣ୍ଡ ବେଳେ ମଙ୍ଗଳବାର ବିଳମ୍ବିତ ରାତି ପର୍ଯ୍ୟନ୍ତ ଷ୍ଟୁଡିଓରେ ସିରିଏଲ୍ ସୁଟିଂ ଚାଲିଥିଲା । ସୁଟିଂ ସରିବା ପରେ ଷ୍ଟୁଡିଓ ବନ୍ଦ ହୋଇଥିଲା । ହେଲେ ସକାଳେ ଷ୍ଟୁଡିଓ ଭିତରୁ କଳାଧୂଆଁ ବାହାରିଥିଲା ।

ଷ୍ଟୁଡିଓର ୪ ନମ୍ବର ସେଟ୍ ହୁ ହୁ ହୋଇ ଜଳିବାକୁ ଲାଗିଥିଲା । ଅଗ୍ନିକାଣ୍ଡରେ ସାମଗ୍ରୀ ଓ ବିଭିନ୍ନ ଯନ୍ତ୍ରପାତି ଜଳିଯାଇଛି । କିନ୍ତୁ କେହି ମୃତାହତ ହୋଇ ନଥିବା ଜଣାପଡିଛି । ବିଦ୍ୟୁତ୍ ସର୍ଟସର୍କିଟ୍ ଯୋଗୁ ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି ।  

ବେଗୁନିଆ ଅଗ୍ନିଶମବାହିନୀ ପ୍ରଥମେ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିବାକୁ ଉଦ୍ୟମ କରିଥିଲା । ପରେ ଖୋର୍ଦ୍ଧା ଅଗ୍ନିଶମ ବାହିନୀ କର୍ମଚାରୀ ପହଞ୍ଚି ବେଗୁନିଆ ଅଗ୍ନିଶମ ବାହିନୀ ସହାୟତାରେ ନିଆଁକୁ ଆୟତ୍ତ କରିଥିଲେ । ହେଲେ ସେତେବେଳକୁ ଷ୍ଟୁଡିଓ ଭିତରେ ଥିବା କୋଟି କୋଟି ଟଙ୍କାର ସାମଗ୍ରୀ ଜଳି ପୋଡି ପାଉଁଶ ହୋଇଯାଇଛି ।

ବିଦ୍ୟୁତ୍ ସର୍ଟସର୍କିଟ ଯୋଗୁ ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି । କ୍ଷୟକ୍ଷତିର ପରିମାଣ ଆକଳନ ପାଇଁ ସଂସ୍ଥା ପକ୍ଷରୁ କୌଣସି କାଗଜପତ୍ର ଦିଆଯାଇ ନ ଥିବାବେଳେ କ୍ଷୟକ୍ଷତିର ପରିମାଣ ପ୍ରାୟ ଅଢେଇ କୋଟି ଟଙ୍କା ହେବ ବୋଲି ଅନୁମାନ କରାଯାଉଛି । ତେବେ ବିଳମ୍ବିତ ରାତି ଯାଏ ସୁଟିଂ ଚାଲିଥିବାବେଳେ ସୁଟିଂ ପରେ କେହି ନଥିଲେ । ହୁଏତ ବଡ ଧରଣର ଅଗ୍ନିକାଣ୍ଡରେ ଜୀବନ ଯାଇଥାନ୍ତା ବୋଲି ଲୋକେ କହୁଛନ୍ତି । ଅନ୍ୟ କୋଟି କୋଟି ଟଙ୍କାର ସାମଗ୍ରୀ ଜଳିପୋଡି ଯାଇଥିବାରୁ ଚିନ୍ତା ବଢିଯାଇଛି । 

Powered by Froala Editor