ଗୁଜରାଟରେ ଏକ ନକଲି ଅଦାଲତ ପଦାକୁ ଆସିଛି। ଦୀର୍ଘ ୫ ବର୍ଷ ଧରି ଘରେ କୋର୍ଟ ଚଳାଇଥିବା ଜଣେ ଓକିଲକୁ ଗିରଫ କରିଛି ପୁଲିସ। ଏଭଳି ଏକ ଅଜବ ଘଟଣା ସାମ୍ନାକୁ ଆସିଛି ଗୁଜରାଟର ଗାନ୍ଧୀନଗରରୁ। 

ଗିରଫ ଯୁବକଙ୍କ ନାମ ମୋରିସ୍ ସାମୁଏଲ୍ ଖ୍ରୀଷ୍ଟିଆନ୍, ଯିଏ କି ବୃତ୍ତିରେ ଜଣେ ଓକିଲ ବୋଲି ପୁଲିସ କହିଛି। ସିଭିଲ୍ କୋର୍ଟରେ ଯେଉଁମାନଙ୍କ ଜମି ସମ୍ବନ୍ଧୀୟ ମାମଲା ବିଚାରାଧୀନ ଥିଲା, ସେମାନଙ୍କୁ ସେ ପ୍ରାୟତଃ ଫସାଇ ଦେଉଥିଲେ। ଖ୍ରୀଷ୍ଟିଆନ ତାଙ୍କ କ୍ଲାଏଣ୍ଟମାନଙ୍କୁ କୋର୍ଟ ନଯାଇ ମାମଲାର ସମାଧାନ ପାଇଁ ପ୍ରଲୋଭନ ଦେଖାଇଥିବା ଅଭିଯୋଗ ହୋଇଛି। ଏଥିପାଇଁ ସେ ଏକ ନିର୍ଦ୍ଦିଷ୍ଟ ଟଙ୍କା ମଧ୍ୟ ନେଉଥିଲେ। ତାଙ୍କ ସପକ୍ଷରେ ୧୧ରୁ ଅଧିକ ମାମଲା ରୁଜୁ କରିଥିବା ଅଭିଯୋଗ ହୋଇଛି। ସେ ତାଙ୍କ ନାମରେ ପ୍ରାୟ ୧୦୦ ଏକର ସରକାରୀ ଜମି ମଧ୍ୟ ନେଇଥିବା ଅଭିଯୋଗ ହୋଇଛି।

ଯେଉଁ ଲୋକମାନଙ୍କର ଜମିଜମା ସମ୍ବନ୍ଧୀୟ ମାମଲା ସହରର ସିଭିଲ କୋର୍ଟରେ ପଡ଼ି ରହିଥିଲା, ସେହିମାନଙ୍କୁ ଟାର୍ଗେଟ କରି ମୋରିସ ଫସାଉଥିଲା ବୋଲି ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି। ଏଭଳି ଲୋକଙ୍କୁ ସେ ଗାନ୍ଧୀନଗରସ୍ଥିତ କାର୍ଯ୍ୟାଳୟକୁ ଡକାଉଥିଲା, ଯାହାକୁ ସେ ଏକ ଅଦାଲତ ପରି ସଜାଇଥିଲା। ସେ ନିଜ ମହକିଲମାନଙ୍କୁ ସେମାନଙ୍କର ପଡ଼ି ରହିଥିବା ଜମିଜମା ସମ୍ବନ୍ଧୀୟ ମାମଲାର ସମାଧାନ କରିବାର ଆଶା ଦେଖାଇ ତାଙ୍କଠାରୁ ମୋଟା ଅଙ୍କର ଟଙ୍କା ମଧ୍ୟ ନେଉଥିଲା। କେବଳ ସେତିକି ନୁହେଁ, ସେ ଟ୍ରିବ୍ୟୁନାଲ ଅଧିକାରୀ ଭଳି ଆଦେଶ ମଧ୍ୟ ପାରିତ କରୁଥିଲା। ନିଜର ନକଲି ଅଦାଲତକୁ ଅସଲି ଅଦାଲତର ରୂପ ଦେବା ପାଇଁ ସେ ନିଜର ସହଯୋଗୀମାନଙ୍କୁ ଅଦାଲତର କର୍ମଚାରୀ ଏବଂ ଓକିଲ ରୂପରେ ବସାଉଥିଲା।

Powered by Froala Editor