ବିହାରର ଛପରା ଜିଲାରୁ ଏକ ଆଶ୍ଚର୍ଯ୍ୟ ଖବର ଆସିଛି। ଗଲ୍ ବ୍ଲାଡର ଷ୍ଟୋନ୍ ଅପରେସନ ସମୟରେ ଜଣେ ୧୫ ବର୍ଷୀୟ ନାବାଳକର ମୃତ୍ୟୁ ଘଟିଛି। ନକଲି ଡାକ୍ତର ୟୁଟ୍ୟୁବ୍ ଦେଖି ଅପରେସନ କରୁଥିବା ସମୟରେ ମୃତ୍ୟୁ ଘଟିଥିବା ଅଭିଯୋଗ ହୋଇଛି।

ପୀଡିତଙ୍କ ନାମ ଗୋଲୁ ଶାହା, ତାଙ୍କର ବୟସ ୧୫ ବର୍ଷ। ସେ ଚାପରା ଜିଲାର ଭୁୱାଲପୁର ଗାଁର ବାସିନ୍ଦା ଥିଲେ। ପରିବାର ସଦସ୍ୟମାନେ କହିଛନ୍ତି ଯେ ଆରମ୍ଭରୁ ଗୋଲୁଙ୍କ ଗଲ ବ୍ଲାଡରରେ ଷ୍ଟୋନ ଥିଲା। ଯେତେବେଳେ ତାଙ୍କର ପେଟରେ ଯନ୍ତ୍ରଣା ବଢିଗଲା, ଆମେ ତାଙ୍କୁ ଅଜିତ କୁମାର ପୁରୀଙ୍କ ଦ୍ୱାରା ପରିଚାଳିତ ନର୍ସିଂହୋମ ଗଣପତି ସେବା ସଦନକୁ ନେଇଗଲୁ । ଶୁକ୍ରବାର ରାତିରେ ପେଟ ଯନ୍ତ୍ରଣା ସହିତ ସେ ବାନ୍ତି ମଧ୍ୟ କରୁଥିଲେ। ଯନ୍ତ୍ରଣାକୁ କମାଇବା ପାଇଁ ଆମେ ତାଙ୍କୁ ଔଷଧ ଦେବାକୁ ଡାକ୍ତରଙ୍କୁ କହିଥିଲୁ କିନ୍ତୁ ଡାକ୍ତର ବିନା ଅନୁମତିରେ ଏହି ଅପରେଶନ କରିଥିଲେ। ଡାକ୍ତର ପୁରୀ ବିନା ପରୀକ୍ଷା ନୀରିକ୍ଷା କିମ୍ବା ପରିବାର ବର୍ଗଙ୍କ ଅନୁମତି ନନେଇ ଅପରେସନ ଆରମ୍ଭ କରି ଦେଇଥିଲେ।

ଜେଜେବାପା କହିଛନ୍ତି ଯେ ଡିଜେଲ ଆଣିବା ପାଇଁ ଡାକ୍ତର ଗୋଲୁଙ୍କ ପିତାଙ୍କୁ କମ୍ପାଉଣ୍ଡର ସହିତ ପଠାଇଥିଲେ। ଏହା ପରେ ସେ ୟୁଟ୍ୟୁବ ଦେଖିବା ପରେ ଅସ୍ତ୍ରୋପଚାର କରିବା ଆରମ୍ଭ କଲେ । ଭିଡିଓର ଶବ୍ଦ ବାହାରକୁ ଆସୁଥିଲା। ୟୁଟ୍ୟୁବରେ ଏହାକୁ ଦେଖି ସେ ପେଟରେ ଅପରେଶନ କରୁଥିଲେ । ପ୍ରତିବାଦ କରିବାରୁ ପୁରୀ ସେମାନଙ୍କ ଉପରେ ପାଟିତୁଣ୍ଡ କରି 'ମୁଁ ଡାକ୍ତର ନା ତୁମେ?' କହିଥିଲେ।

ଯେତେବେଳେ ଗୋଲୁଙ୍କ ସ୍ବାସ୍ଥ୍ୟ ଖରାପ ହେବାକୁ ଲାଗିଲା, ଡାକ୍ତର ଆମ୍ବୁଲାନ୍ସକୁ ଡାକି ଜଣେ କର୍ମଚାରୀ ଏବଂ ତାଙ୍କ ଜେଜେମାଙ୍କୁ ପାଟନାକୁ ପଠାଇଲେ। କିନ୍ତୁ ପାଟନାରେ ପହଞ୍ଚିବା ପୂର୍ବରୁ ତାଙ୍କର ମୃତ୍ୟୁ ହୋଇଥିଲା। କିଶୋରଙ୍କ ମୃତ୍ୟୁ ହେତୁ ନର୍ସିଂହୋମର ଡାକ୍ତର ଭୟଭୀତ ହୋଇ ପଳାଇ ଯାଇଥିଲେ।

ପୋଷ୍ଟମର୍ଟମ ସହ ଜଡିତ ଜଣେ ଡାକ୍ତର କହିଛନ୍ତି ଯେ ଗୋଲୁଙ୍କ ବ୍ଲାଡର ନିକଟରେ ଏକ ଶିରା କାଟି ଦିଆଯାଇଛି। ସିଲେଇଗୁଡିକ ଭୁଲ ଭାବରେ କରାଯାଇଥିଲା, ଯାହା ଫୁସଫୁସରେ ଲାଗିଥିଲା। ଆଭ୍ୟନ୍ତରୀଣ ରକ୍ତସ୍ରାବ ଯୋଗୁଁ ତାଙ୍କର ମୃତ୍ୟୁ ହୋଇଥିଲା।

Powered by Froala Editor