ଶନିବାର ଦିଲ୍ଲୀର କରୋଲ ବାଗରେ ଏକ ହୃଦୟବିଦାରକ ଘଟଣା ଘଟିଛି। ବିଚ୍‌ ରାସ୍ତାରେ ଚାଲି ଯାଇଛି ଜଣେ ୧୮ ବର୍ଷୀୟ ଯୁବକଙ୍କ ଜୀବନ। ସ୍କୁଟି ଉପରେ ବସିଥିବା ବେଳେ ହଠାତ୍‌ ଯୁବକଙ୍କ ମୁଣ୍ଡ ଉପରେ ଖସି ପଡ଼ିଛି ଗୋଟିଏ ବିରାଟ କାୟ ଏସି।

ଦିଲ୍ଲୀର ଦେଶ ବନ୍ଧୁ ଗୁପ୍ତା ରୋଡ ଠାରେ ଥିବା ଡୋରିୱାଲା ଅଞ୍ଚଳରେ ଘଟିଥିବା ଘଟଣାର ଭିଡିଓ ଭାଇରାଲ ହେବାରେ ଲାଗିଛି। ସାମ୍ନାକୁ ଆସିଥିବା ଭିଡିଓରେ ଦେଖିବାକୁ ମିଳୁଛି ଯେ ଗୋଟିଏ ଛୋଟିଆ ଗଳିରେ ୧୮ ବର୍ଷୀୟ ଜିତେଶ ସ୍କୁଟିରେ ବସିଛନ୍ତି। ସେ ତାଙ୍କ ସାଙ୍ଗ ୧୭ ବର୍ଷୀୟ ପ୍ରଂଶୁଙ୍କ ସହ କଥା ହେଉଛନ୍ତି। ଉଭୟ କଥା ହେବା ପରେ ପରସ୍ପରକୁ ଆଲିଙ୍ଗନ କରିଥିଲେ। ଏହାପରେ ଜିତେଶ ସ୍କୁଟି ଷ୍ଟାର୍ଟ କରିବାକୁ ବାହାରୁ ଥିବା ବେଳେ ହଠାତ ଘଟିଥିଲା ଅଘଟଣ। ହଠାତ ଦ୍ୱିତୀୟ ମହଲାରୁ ୱିଣ୍ଡୋ ଏସି ସିଧା ଖସି ପଡ଼ି ତାଙ୍କ ମୁଣ୍ଡରେ ପଡ଼ିଥିଲା। କେହି କିଛି ବୁଝିବ‌ା ପୂର୍ବରୁ ହିଁ ଘଟଣାସ୍ଥଳରେ ଜିତେଶଙ୍କର ମୃତ୍ୟୁ ହୋଇ ଯାଇଥିଲା।

ମୃତ ଜିତେଶ ଦିଲ୍ଲୀର ଡୋରିୱାଲାରେ ରହୁଥିବା ବେଳେ ମୃତକଙ୍କ ସାଙ୍ଗ ପ୍ରଂଶୁ ପଟେଲ ନଗରରେ ବସବାସ କରନ୍ତି। ପ୍ରଂଶୁ ଏହି ଘଟଣା ସମ୍ପର୍କରେ ପୁଲିସକୁ ଖବର ଦେବା ପରେ ପୁଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏହି ଭିଡିଓ ସାମ୍ନାକୁ ଆସିବା ପ‌ରେ ଲୋକେ ପ୍ରତିକ୍ରିୟା ଦେଇ କହିଛନ୍ତି, ‘ମୃତ୍ୟୁ ଏମିତି ବି ଆସେ!’

Powered by Froala Editor