ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ଏବେ ଜଳବନ୍ଦୀ ସମସ୍ୟା ଏକ ପ୍ରମୁଖ ସମସ୍ୟାଭାବେ ଉଭା ହୋଇଛି । ସାମାନ୍ୟ ବର୍ଷାରେ ରାଜଧାନୀ ଉବୁଟୁବୁ ହେଉଛି । କେଉଁଠି ରାସ୍ତା ଉପରେ ପାଣି ଜମି ଗାଡ଼ି ଭାସିଲାଣି ତ କେଉଁଠି ଲୋକଙ୍କ ଘରେ ପାଣିପଶିଲାଣି । ତେବେ ରାଜଧାନୀରେ ଜଳବନ୍ଦୀ ସମସ୍ୟା ପଛର କାରଣ କହିଛନ୍ତି ମେୟର ସୁଲୋଚନା ଦାସ ।

ସେ କହିଛନ୍ତି ଯେ ବିଭିନ୍ନ ବିଭାଗ ଭିତରେ ସମନ୍ୱୟ ରହୁନି । ସମନ୍ୱୟ ଅଭାବରୁ ହିଁ ଜଳବନ୍ଦୀ ସମସ୍ୟା ଉପୁଜୁଛି । କେହି କାହା କାମ ସଠିକଭାବେ ନକରିବାରୁ ଜଳବନ୍ଦୀ ସମସ୍ୟା ହେଉଛି । ତେବେ ସମ୍ବେଦନଶୀଳ ସ୍ଥାନରେ ପମ୍ପସେଟ ରହିଛି । ପାଣି ଜମା ହେଉଥିବା ୧୨ଟି ମୁଖ୍ୟସ୍ଥାନ ଚିହ୍ନଟ ହୋଇଛି । ଜଳବନ୍ଦୀ ହେଉଥିବା କିଛି ସ୍ଥାନର ସ୍ଥାୟୀ ସମାଧାନ ଏକ ଲମ୍ବା ପ୍ରକ୍ରିୟା । ଜବରଦଖଲ ଉଚ୍ଛେଦ ସହ ନାଳ ସଫା, ୱାଲ ମେଣ୍ଟେନ କରାଯାଉଛି ବୋଲି ମେୟର ସୁଲୋଚନା ଦାସ କହିଛନ୍ତି । 

ପ୍ରକାଶ ଯେ ବୁଧବାର ଅସରାଏ ବର୍ଷାରେ ବେହାଲ୍‌ ହୋଇଯାଇଥିଲା ରାଜଧାନୀ ଭୁବନେଶ୍ୱର। ବର୍ଷା ପାଣି ଡ୍ରେନ୍‌ରେ ପାସ୍‌ କରିନପାରିବାରୁ ରାସ୍ତାରେ ଲହଡି ମାରୁଥିଲା। ସେପଟେ ୧୬ ନମ୍ୱର ଜାତୀୟ ରାଜପଥର ଇସ୍କନ୍‌ ସମ୍ମୁଖର ଅବସ୍ଥା କଥା ନକହିବା ଭଲ। ଏଠି ଆଣ୍ଠୁଏ ଉଚ୍ଚର ପାଣି ପ୍ରବାହିତ ହେଉଥିଲା। ଯେଉଁଥିପାଇଁ ଗାଡ଼ି ଚଳାଚଳ ଏକ ପ୍ରକାର ଠପ୍‌ ହୋଇଯାଇଥିଲା।ରାଜଧାନୀର ଅଧିକାଂଶ ସ୍ଥାନରେ ବର୍ଷାର କୋପ ଦେଖିବାକୁ ମିଳିଥିଲା। ପଟିଆ, ଚନ୍ଦ୍ରଶେଖର, କଳାରାହାଙ୍ଗ, ମଞ୍ଚେଶ୍ୱର, ଲକ୍ଷ୍ମୀସାଗର, ଆଇଆର୍‌ସି ଭିଲେଜ, ବମିଖାଲ୍‌, ଓଲଡ୍‌ ଟାଉନ୍‌ ପ୍ରମୁଖ ଅଞ୍ଚଳରେ ପ୍ରବଳ ବର୍ଷା ହୋଇଥିବା ଦେଖିବାକୁ ମିଳିଥିଲା।

Powered by Froala Editor