କାର୍ ସଫା କରି ଟଙ୍କା ମାଗୁଥିବା ଯୁବକକୁ ଟ୍ରକ୍ ଆଗରେ ଠେଲିଦେଲେ ସରକାରୀ ବାବୁ
ମାନବିକତା ଭୁଲିଗଲେ ସରକାରୀ କର୍ମଚାରୀ । କାର୍ ସଫା କରି ଟଙ୍କା ମାଗୁଥିବା ଜଣେ ଯୁବକଙ୍କୁ ମୃତ୍ୟୁ ମୁହଁକୁ ଠେଲିଦେଲେ । ଅଳ୍ପ କିଛି ଟଙ୍କା ପାଇଁ ସରକାରୀ କର୍ମଚାରୀଙ୍କ ଏଭଳି ହୀନ କାର୍ଯ୍ୟକୁ ସବୁଠି ନିନ୍ଦା କରାଯାଉଛି । ଏପରିକି ପୁଲିସ ସିସିଟିଭି ଯାଞ୍ଚ କରିବା ସହ ତାଙ୍କ ବିରୋଧରେ ଏତଲା ଦାଏର କରିଛି । ଏ ଘଟଣା ଘଟିଛି ତେଲେଙ୍ଗାନାର ନିଜାମାବାଦ ଜିଲ୍ଲାରେ ।
ଶନିବାର ଏହି ଘଟଣା ସମ୍ପର୍କରେ ପୋଲିସ ସୂଚନା ଦେଇଛି । ଗୁରୁବାର ସନ୍ଧ୍ୟାରେ ଅରମୁର ଅଞ୍ଚଳରେ ଟ୍ରାଫିକ ସିଗନାଲରେ ଜଣେ ଯୁବକ ସରକାରୀ କର୍ମଚାରୀଙ୍କ କାର୍ର ଝରକା ସଫା କରିବା ଆରମ୍ଭ କରିବା ପରେ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । କାର୍ ସଫା କରିବାକୁ ମନା କରିଥିଲେ ସରକାରୀ ଅଫିସର୍ । ଯୁକ୍ତିତର୍କ ସମୟରେ ଅଧିକାରୀ ଜଣକ ତାଙ୍କ କାର୍ରୁ ବାହାରି ଯୁବକଙ୍କୁ ପିଟାପିଟି କରିବା ସହ ଟ୍ରକ୍ ଆଗକୁ ଠେଲି ଦେଇଥିଲେ । ଫଳରେ ଯୁବକର ମୃତ୍ୟୁ ଘଟିଥିଲା ।
ପୋଲିସ କହିଛି ଯେ ମୃତ ବ୍ୟକ୍ତିଙ୍କ ସମ୍ପର୍କୀୟଙ୍କ ଅଭିଯୋଗକୁ ଭିତ୍ତି କରି ଭାରତୀୟ ପେନାଲ କୋଡ ଧାରା ୩୦୪ ଅନୁଯାୟୀ କାର ଚଳାଉଥିବା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ ହୋଇଛି।
Powered by Froala Editor
