ପାଟନା:  ଲ୍ୟାଣ୍ଡ୍ ଫର୍ ଜବ ସ୍କାମ ମାମଲାରେ ଯାଦବ ପରିବାରର ଅଡ଼ୁଆ ବଢିଚାଲିଛି । ଏନଡିଏ ସରକାର ଗଠନ ହେବାର ୨୪ ଘଣ୍ଟା ନପୁରୁଣୁ ତେଜସ୍ୱୀ ଯାଦବଙ୍କୁ ଇଡିରୁ ଡାକରା ଆସିଛି । ବିହାରର ପୂର୍ବ ଉପମୁଖ୍ୟମନ୍ତ୍ରୀ ତେଜସ୍ୱୀ ଯାଦବଙ୍କୁ ଲ୍ୟାଣ୍ଡ୍ ଫର୍ ଜବ୍ ସ୍କାମ୍ ମାମଲାରେ ପଚରାଉଚରା ପାଇଁ ପ୍ରବର୍ତ୍ତନ ନିର୍ଦ୍ଦେଶାଳୟ କାର୍ୟ୍ୟାଳୟରେ ହାଜର ହେବାକୁ ପକ୍ଷରୁ ସମନ ଜାରି କରାଯାଇଛି । ତେବେ ଆଜି ତେଜସ୍ୱୀ ଯାଦବ ଇଡି କାର୍ୟ୍ୟାଳୟରେ ହାଜର ହୋଇନପାରନ୍ତି ବୋଲି ଚର୍ଚ୍ଚା ହେଉଛି । ଅନ୍ୟପଟେ ଇଡି କାର୍ୟ୍ୟାଳୟରେ ଲାଲୁ ଯାଦବ ପହଞ୍ଚିଛନ୍ତି । ଲ୍ୟାଣ୍ଡ ଫର ଜବ ସ୍କାମ୍ ମାମଲାରେ ତାଙ୍କୁ ପଚରାଉଚରା କରିବା ପାଇଁ ଇଡି ପୂର୍ବରୁ ସମନ ଜାରି କରିଥିଲା ।
ପାଟନା ସ୍ଥିତ ଇଡି କାର୍ୟ୍ୟାଳୟରେ ଲାଲୁ ଯାଦବ । ଲ୍ୟାଣ୍ଡ ଫର ଜବ ସ୍କାମ୍ ମାମଲାରେ ପୂର୍ବରୁ ଇଡି ସମନ ଜାରି କରିଥିବା ବେଳେ ଆଜି ୧୧ଟା ସୁଦ୍ଧା ଇଡି କାର୍ୟ୍ୟାଳୟରେ ହାଜର ହୋଇଛନ୍ତି ଲାଲୁ ଯାଦବ । ଲାଲୁ ଯାଦବ କାର୍ୟ୍ୟାଳୟରେ ପହଞ୍ଚିବା ପୂର୍ବରୁ ଶତାଧିକ ଆରଜେଡି କର୍ମକର୍ତ୍ତା କାର୍ୟ୍ୟାଳୟ ବାହାରେ କେନ୍ଦ୍ର ସରକାରଙ୍କ ବିରୋଧରେ ନାରାବାଜି କରିବା ସହ ବିରୋଧ ପ୍ରଦର୍ଶନ କରିଛନ୍ତି ।
ସୂଚନା ଯୋଗ୍ୟ, ବିହାର ଚାକିରି ବଦଳରେ ଜମି ଘୋଟାଲା ମାମଲା ୧୪ ବର୍ଷ ପୁରୁଣା ଅଟେ । ୨୦୦୪ ମସିହାରୁ ୨୦୦୯ ପର୍ୟ୍ୟନ୍ତ ରେଳମନ୍ତ୍ରୀ ଥିଲେ ଲାଲୁ ଯାଦବ । ଏହି ସମୟରେ ରେଲଓ୍ୱେ ଚାକିରିରେ ବ୍ୟାପକ ଘୋଟାଲା ହୋଇଥିବା ଅଭିଯୋଗ ହୋଇଛି । ରେଳ ବିଭାଗରେ ଚାକିରି ଦେବା ନାଁରେ ଜମି ନେଉଥିବା ଅଭିଯୋଗ ହୋଇଥିଲା । ସିବିଆଇ ଏହି ମାମଲା ଲାଲୁ ଯାଦବ, ତାଙ୍କ ପରିବାର ଓ ସମ୍ପର୍କୀୟମାନଙ୍କୁ ପଚରାଉଚରା କରିଛି । ଲାଲୁ ଯାଦବଙ୍କ ଅତି ଘନିଷ୍ଠ କୁହାଯାଉଥିବା ଭୋଲା ଯାଦବ ଏହି ମାମଲାରେ ଗିରଫ ହୋଇଛି ।

Powered by Froala Editor