କ୍ରୁରତା । ନିଷ୍ଠୁରତା । ପଶୁଠୁ ହୀନ । ଏଭଳି ଶବ୍ଦ ବି କମ୍ ପଡିବ ଏ ଲୋକ ପାଇଁ । ଯିଏ ଛୋଟ କୁକୁର ପିଲାଟିକୁ ଅତି ଅମାନୁଷିକ ଭାବେ ହତ୍ୟା କରିଛି । ଗୋଟିଏ କୁକୁର ପିଲାକୁ ଜଣେ ବ୍ୟକ୍ତି ରାସ୍ତାରେ ଛେଚିବା ସହ ତାକୁ ଗୋଡ଼ରେ ଅତ୍ୟନ୍ତ ଭୟଙ୍କର ଢଙ୍ଗରେ ଦଳି ହତ୍ୟା କରିଛି। ମଧ୍ୟପ୍ରଦେଶର ଗୁନା ଜିଲ୍ଲାରେ ଘଟିଥିବା ଏହି ଲୋମହର୍ଷଣକାରୀ ଘଟଣା ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭିରେ ମଧ୍ୟ କଏଦ ହୋଇଛି।

ଡିସେମ୍ବର ୯ ତାରିଖ ଘଟଣା । ଭାଇରାଲ ହେଉଥିବା ଭିଡିଓରେ ପ୍ରଥମେ ବ୍ୟକ୍ତି ଜଣକ କୁକୁର ଛୁଆକୁ ବହୁତ ଜୋରରେ ରାସ୍ତାରେ ଧରି ଛେଚି ଦେଇଥିଲା। ସେ ତଳେ ପଡ଼ି ବିକଳ ହେଉଥିବା ବେଳେ ଗୋଡ଼ରେ ତାକୁ ଦଳି ହତ୍ୟା କରିଥିଲା।

ଭିଡିଓରେ ଏପରି କାଣ୍ଡ ଘଟାଇଥିବା ବ୍ୟକ୍ତି ଜଣକ ହେଲେ ମୃତ୍ୟୁଞ୍ଜୟ ଜାଦାଉନ। ତା’ ଘର ଗୁନାର ରାଧାପୁର କୋଲନୀରେ। ଘଟଣା ଦିନ ମୃତ୍ୟୁଞ୍ଜୟ ଗୋଟିଏ ଦୋକାନ ବାହାରେ ବସି କିଛି ଖାଉଥିବା ବେଳେ ଦୁଇଟି କୁକୁର ଛୁଆ ତା’ ପାଖରେ ପହଞ୍ଚିଥିଲେ। ଏହି ସମୟରେ ସେ ଗୋଟିଏ କୁକୁର ଛୁଆକୁ ଧରିଥିଲା। ଅତ୍ୟନ୍ତ ଅମାନୁଷିକ ଢଙ୍ଗରେ ସେ କୁକୁର ଛୁଆଟିକୁ ରାସ୍ତାରେ ଛେଚି ଦେଇଥିଲା। ମୃତ୍ୟୁଞ୍ଜୟର ଜଣେ ମାନସିକ ରୋଗୀ ମଧ୍ୟ କିଛି ଲୋକ କହୁଛନ୍ତି। ଘଟଣାର ଭିଡିଓ ଭାଇରାଲ ହେବା ପରେ ପୁଲିସ୍‌ ତା’କୁ ଗିରଫ କରିଛି।

ଏହି ଘଟଣା ସାମ୍ନାକୁ ଆସିବା ପରେ କେନ୍ଦ୍ରମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଓ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି। ଦୋଷୀ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ନେଇ ପ୍ରତିଶ୍ରୁତି ଦେଇଛନ୍ତି।

Powered by Froala Editor