ପୁଲିସ ବର୍ଦ୍ଦିରେ ଥିଲେ କ’ଣ ହେଲା? ସେ ବି ଜଣେ ମା’ । ୪ ମାସ  ପିଲାର କାନ୍ଦ କେମିତି ସହିବ? । ଜଣେ ମହିଳାଙ୍କ ୪ ମାସର ଛୁଆକୁ ସ୍ତନ୍ୟପାନ କରାଇ ଚର୍ଚ୍ଚାରେ ଅଛନ୍ତି ଜଣେ ପୁଲିସ ଅଧିକାରୀ । ଏହାର ଭିଡିଓ ଭାଇରାଲ ହେବା ପରେ ପୁଲିସ ଅଧିକାରୀଙ୍କୁ ପ୍ରଶଂସାର ସୁଅ ଛୁଟୁଛି ।

ରିପୋର୍ଟ ମୁତାବକ, ଭିଡିଓରେ ଦେଖିବାକୁ ମିଳୁଥିବା ୪ମାସର ଶିଶୁର ବାପା ଜେଲ୍‌ରେ ଥିବା ବେଳେ ମା’ ହସ୍ପିଟାଲରେ ମୃତ୍ୟୁ ସହ ସଂଘର୍ଷ କରୁଛି। ଏହି ପରିବାର ବିହାରର ବାସିନ୍ଦା ହୋଇଥିବା ବେଳେ କିଛି ବର୍ଷ ହେବ ବାପାମା’ ଓ ୪ମାସ ଶିଶୁ ସମେତ ୩ ଭାଇଭଉଣୀ କୋଚିରେ ରହୁଛନ୍ତି।

ମା’ ହସ୍ପିଟାଲ ବିଛଣାରେ ପଡ଼ିଥିବା ବେଳେ ୪ଜଣ ଶିଶୁ ବାହାରେ ଭୋକଉପବାସରେ ପଡ଼ି ରହିଥି‌ଲେ। ଏଥିମଧ୍ୟରୁ ୪ମାସର ଶିଶୁ ମା’ କ୍ଷୀର ପାଇଁ ଆଉଟୁ ପାଉଟୁ ହୋଇ ରାହା ଧରି କାନ୍ଦୁଥିଲା। ଏହି ଘଟଣା ବିଷୟରେ ଖବର ପାଇ ପୁଲିସ୍‌ ଡାକ୍ତରଖାନାରେ ପହଞ୍ଚି ଅସୁସ୍ଥ ମା’ର ସମସ୍ତ ପିଲାଙ୍କୁ ଉଦ୍ଧାର କରି ପୁଲିସ୍‌ ଥାନାକୁ ଆଣିଥିଲା।

ଏଥିମଧ୍ୟରୁ ତିନିଜଣ ଛୁଆଙ୍କୁ ପୁଲିସ୍‌ କିଛି ଖାଇବାକୁ ଦେଇ ରଖିଥିବା ବେଳେ ୪ମାସ ଶିଶୁ ରାହା ଧରି କାନ୍ଦୁଥିଲା। ଜଣେ ପୁଲିସ ଅଧିକାରୀ ମା’ ଛୁଆଟି ପାଖକୁ ଧାଇଁ ଆସିଥିଲେ। କାହାକୁ କିଛି ନକହି ଶିଶୁକୁ କୋଳରେ ଧରି ସ୍ତନ୍ୟପାନ କରାଇଥିଲେ।

ତେବେ ପୁଲିସ ଅଧିକାରୀ ଆର୍ଯ୍ୟଙ୍କର ୯ମାସର ସନ୍ତାନ ଅଛି। କିଛି ସମୟ ପରେ ଶିଶୁ ପୁଲିସ ଅଧିକାରୀଙ୍କ ଠାରୁ  ସ୍ତନ୍ୟପାନ କରି ଶୋଇପଡ଼ିଥିଲା। ଶିଶୁ ଶୋଇ ପଡ଼ିବା ପରେ ୪ଜଣ ପିଲାଙ୍କ ଅଧିକ ଯତ୍ନ ନିମନ୍ତେ ଚାଇଲ୍ଡ କେୟାର ସେଣ୍ଟରକୁ ପଠାଇ ଦିଆଯାଇଥିଲା।

ପୁଲିସ ଅଧିକାରୀଙ୍କ ଏଭଳି ମହାନତା ପାଇଁ ତାଙ୍କୁ ପ୍ରଶଂସା କରାଯାଉଛି । ଶିଶୁଟିକୁ ଚାହିଁଥିଲେ ସେ ବୋତଲରେ ବି କ୍ଷୀର ଦେଇପାରିଥାନ୍ତେ । ହେଲେ ଶିଶୁକୁ ଚୁପ କରାଇବା ପାଇଁ ମା’ର ସ୍ନେହ ସହ ସ୍ତନ୍ୟପାନ କରାଇଥିଲେ ।

Powered by Froala Editor