ବାଣ-ବାଇକ୍-ଷ୍ଟଣ୍ଟ୍ : ଭିଡିଓ ଭାଇରାଲ ପରେ ଯୁବକକୁ ଧରିଲା ପୁଲିସ
ଦୀପାବଳିରେ ତାମିଲନାଡୁର ଜଣେ ଯୁବକ ନିଆଁ ସହ ବାଇକ୍ ଷ୍ଟଣ୍ଟ ମାରି ଗିରଫ ହୋଇଛନ୍ତି । ଭିଡିଓରେ ଦେଖାଯାଉଛି ଯେ, ଜଣେ ଯୁବକ ବାଇକରେ ଏକାଧିକ ବାଣ ଖଞ୍ଜୁଛନ୍ତି। ଏହାପରେ ଅନ୍ୟ ଜଣେ ଯୁବକ ସେହି ବାଇକକୁ ଚଲାଉଛନ୍ତି। ବାଇକ୍ ଚାଲିବା ପରେ ଗୋଟିଏ ପରେ ଗୋଟିଏ ବାଣ ଫୁଟୁଛି ଏବଂ ସେ ବିପଦପୂର୍ଣ୍ଣ ଷ୍ଟଣ୍ଟ୍ ପ୍ରଦର୍ଶନ କରୁଛନ୍ତି।
ଯାହାର ଭିଡିଓ ଭାଇରାଲ୍ ହେବା ପରେ ଆକ୍ସନ୍ ନେଇଛି ପୁଲିସ। ଏହି ଭିଡିଓ ନଭେମ୍ବର 10ରେ 'ଡେଭିଲ୍ ରାଇଡର୍' ଇନଷ୍ଟାଗ୍ରାମ ଆଇଡିରେ ପୋଷ୍ଟ୍ କରାଯାଇଥିଲା। ତାମିଲନାଡୁ ପୁଲିସ ବାଇକ୍ ଚାଳକଙ୍କୁ ଗିରଫ କରିଛି। ଅଭିଯୁକ୍ତଙ୍କ ବିରୋଧରେ ଭାରତୀୟ ଦଣ୍ଡବିଧି ଆଇନର ଧାରା 279 (ଅବହେଳିତ ଢଙ୍ଗରେ ଗାଡି ଚଲାଇବା), 286 (ବିସ୍ଫୋରକ ପଦାର୍ଥ ପ୍ରତି ଅବହେଳା ଆଚରଣ) ଏବଂ 336 (ଅନ୍ୟମାନଙ୍କ ବ୍ୟକ୍ତିଗତ ସୁରକ୍ଷା ପ୍ରତି ବିପଦ) ଅନୁଯାୟୀ ମାମଲା ରୁଜୁ କରାଯାଇଛି।
ପ୍ରଥମତଃ ବାଇକ୍ ପେଟ୍ରୋଲରେ ଚାଲୁଥିବାରୁ ନିଆଁଠୁ ଦୂରେଇ ରହିବାକୁ ପରାମର୍ଶ ଦିଆଯାଏ। ଦ୍ୱିତୀୟତଃ ବିନା ଅନୁମତିରେ ସର୍ବ ସାଧାରଣରେ ବିପଦପୂର୍ଣ୍ଣ ଷ୍ଟଣ୍ଟ୍ ପ୍ରଦର୍ଶନକୁ ବାରଣ କରାଯାଇଛି। ତଥାପି ଯୁବକ ଜଣକ ଏପରି ଷ୍ଟଣ୍ଟ ପ୍ରଦର୍ଶନ କରିଛନ୍ତି। ତେଣୁ ପୁଲିସ ନିଜ ଆଡୁ ମାମଲା ରୁଜୁ କରି ଯୁବକଙ୍କୁ ଗିରଫ କରିଛି ।
Powered by Froala Editor
