ବାଲେଶ୍ୱର : ବାତ୍ୟାକାଳୀନ ରିଲିଫ ପାଇବା ଦାବିରେ ବାଲେଶ୍ୱର ଜିଲ୍ଲା ରେମୁଣା ବ୍ଲକ ତୁଣ୍ଡରା ପଞ୍ଚାୟତରେ ଶନିବାର ସଂଧ୍ୟାରେ ତୁମୁଳକାଣ୍ଡ ଦେଖିବାକୁ ମିଳିଛି । ଗୋଟିଏ ଗୋଷ୍ଠୀ କିଛି ଲୋକଙ୍କୁ ମତାଇ ପଞ୍ଚାୟତ ଗୋଦାମର ତାଲା ଭାଙ୍ଗିବା ସହ ତା ଭିତରୁ ଶତାଧିକ କୁ୍ୟଣ୍ଟାଲ ଚାଉଳ, ଗହମ, ଗୋରୁଖାଦ୍ୟ ସମେତ କିରାସିନି ଆଦି ବୋହି ନେଇଥିବା ବେଳେ ପଞ୍ଚାୟତ ଗୃହର ବିଭିନ୍ନ ଆସବାବପତ୍ର ରାସ୍ତା ଉପରେ ପକାଇ ନିଆଁ ଲଗାଇ ଦେଇଥିବା ଅଭିଯୋଗ ହୋଇଛି । ସୂଚନା ମୁତାବକ, ତୁଣ୍ଡରା ପଞ୍ଚାୟତକୁ ଆସିଥିବା ବାତ୍ୟାକାଳୀନ ରିଲିଫ ସାମଗ୍ରୀ ବଣ୍ଟା ସରିଥିବା ବେଳେ କିଛି ଲୋକ ସେଥିରୁ ବାଦ ପଡ଼ିଥିବା ଅଭିଯୋଗ ହୋଇଥିଲା । ଏନେଇ ସେମାନେ ୨ଦିନ ପୂର୍ବରୁ ପଞ୍ଚାୟତ ଗୃହ ସମ୍ମୁଖରେ ଧାରଣାରେ ମଧ୍ୟ ବସିଥିଲେ । ରେମୁଣା ବିଡିଓ ଏବଂ ତହସିଲଦାର ସେଠାରେ ପହଞ୍ଚି ବୁଝାସୁଝା କରିବା ସହ ସେମାନଙ୍କ ତାଲିକା ଦେବା ପାଇଁ ସରପଞ୍ଚଙ୍କ ସହ କଥା ହୋଇ ଯାଇଥିଲେ । ତେବେ ଶନିବାର ସଂଧ୍ୟାରେ ସ୍ଥାନୀୟ ଅଞ୍ଚଳର କିଛି ଯୁବକ କିଛି ଗାଁଲୋକଙ୍କୁ ଏକାଠି କରି ସଂଧ୍ୟା ସମୟରେ ପଞ୍ଚାୟତ ଗୃହ ସମ୍ମୁଖରେ ପହଞ୍ଚିଥିଲେ । ଏହାପରେ ଗୋଦାମଗୃହର ତାଲା ଭାଙ୍ଗି ସବୁ ବୋହିନେବାକୁ ଲୋକମାନଙ୍କୁ ମତାଇଥିଲେ । ତେବେ ରିଲିଫ ପାଇଁ ଆସିଥିବା ଚାଉଳ ବଣ୍ଟା ସରିଥିବା ବେଳେ ସେମାନେ ଗୋଦାମରେ ଥିବା ୨୧୮ କୁ୍ୟଣ୍ଟାଲ ଚାଉଳ, ୩୮ କୁ୍ୟଣ୍ଟାଲ ୫୦ କେଜିର ଗହମ, ୪୦ ବସ୍ତା ଗୋରୁଖାଦ୍ୟ ଓ ୩୦୦ରୁ ଊର୍ଦ୍ଧ୍ୱ ଲିଟର କିରାସିନି ବୋହିନେବା ସହ ଗୋଦାମରେ ଥିବା ବିଭିନ୍ନ ଆସବାବପତ୍ର ରାସ୍ତାରେ ପକାଇ ତା ଉପରେ କିରାସିନି ଢାଳି ନିଆଁ ଲଗାଇ ଦେଇଥିଲେ । ଏହାପରେ ନିକଟରେ ଥିବା ରାଜୀବଗାନ୍ଧୀ ସେବା ସଦନର ତାଲା ଭାଙ୍ଗି ସେଠାରେ ଥିବା ପଞ୍ଚାୟତ କାର୍ଯ୍ୟାଳୟର ବିଭିନ୍ନ ସରକାରୀ କାଗଜପତ୍ର, କମ୍ପୁ୍ୟଟର ସମେତ ୩୦ରୁ ଉର୍ଦ୍ଧ୍ୱ ଚେୟାରକୁ ମଧ୍ୟ ନିଆଁ ଲଗାଇ ଦେଇଥିଲେ ।

Powered by Froala Editor