ନୃଶଂସ : ୮ ଥର ଯୁବକଙ୍କ ଉପରେ ଟ୍ରାକ୍ଟର ଚଢ଼ାଇ ମାରିଦେଲେ
![ନୃଶଂସ : ୮ ଥର ଯୁବକଙ୍କ ଉପରେ ଟ୍ରାକ୍ଟର ଚଢ଼ାଇ ମାରିଦେଲେ](https://odishanewslens.com/news_gallery/25432_1698264079.jpg)
ରାଜସ୍ଥାନ ଭରତପୁରରେ ବୟନାର ସଦର ପୋଲିସ ଷ୍ଟେସନ ଅଞ୍ଚଳରେ ଜଣେ ଯୁବକଙ୍କୁ ଟ୍ରାକ୍ଟର ଚକା ତଳେ ବାରମ୍ବାର ଦଳି ହତ୍ୟା କରାଯାଇଛି। ଏହି ସମୟରେ ମୃତକଙ୍କ ପରିବାର ଲୋକେ ମଧ୍ୟ ଉପସ୍ଥିତ ଥିଲେ। ଏହାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି। ଏହି ଘଟଣା ଗାଁରେ ଉତ୍ତେଜନା ସୃଷ୍ଟି କରିଥିଲା।
ଭରତପୁର ଜିଲ୍ଲାର ବୟନା ଅଞ୍ଚଳରେ ବାହାଦୁର ଓ ଅତର ସିଂହ ଗୁଜର ଗୋଷ୍ଠୀ ମଧ୍ୟରେ ଦୀର୍ଘ ଦିନ ହେବ ବିବାଦ ଲାଗି ରହିଥିଲା। ପ୍ରାୟ ଚାରି ଦିନ ପୂର୍ବେ ସଦର ପୁଲିସ ଷ୍ଟେସନରେ ଉଭୟ ପକ୍ଷ ପରସ୍ପର ବିରୋଧରେ ମାମଲା ଦାୟର କରିଥିଲେ।
ହେଲେ ବୁଧବାର ସକାଳେ ଉଭୟ ପକ୍ଷର ଲୋକମାନେ ସମାନ ବିବାଦକୁ ନେଇ ପୁଣି ଥରେ ମୁହାଁମୁହିଁ ହୋଇଥିଲେ। ଏହି ବିବାଦରେ ବାହାଦୁର ପକ୍ଷରୁ ଜଣେ ବ୍ୟକ୍ତି ଟ୍ରାକ୍ଟର ନେଇ ବିବାଦୀୟ ଜମିରେ ପହଞ୍ଚିଥିଲେ। ଅତର ସିଂହଙ୍କ ପରିବାର ଲୋକେ ମଧ୍ୟ ଘଟଣାସ୍ଥଳରେ ଥିଲେ।
ତେବେ ବିବାଦ ବଢ଼ି ଚାଲିବା ପରେ ଅତର ସିଂହ ଗୁଜରଙ୍କ ପୁଅ ନିରପତ ଟ୍ରାକ୍ଟରକୁ ଅଟକାଇବା ପାଇଁ ଚକା ତଳେ ଶୋଇ ପଡ଼ିଥିଲେ। କିନ୍ତୁ ନିର୍ଦ୍ଦୟ ଟ୍ରାକ୍ଟର ଡ୍ରାଇଭର ନିରପତ ଉପରେ ସର୍ବସମ୍ମୁଖରେ ଟ୍ରାକ୍ଟର ଚଢ଼ାଇ ଦେଇଥିଲେ। ଥରେ ନୁହେଁ ୮ ଥର ନିରପତଙ୍କୁ ଟ୍ରାକ୍ଟର ଚକା ତଳେ ଚାପି ହତ୍ୟା କରାଯାଇଥିବା ଅଭିଯୋଗ ହୋଇଛି। ଏହି ପୂରା ଘଟଣାର ଭିଡିଓ ସୋଶାଲ ମିଡିଆରେ ଭାଇରାଲ ହେବାରେ ଲାଗିଛି।
Powered by Froala Editor