ନିଜକୁ ଗାଏବ କରି ରଚିଥିଲେ ଚକ୍ରବ୍ୟୁହ । ହେଲେ ସେ ଚକ୍ରବ୍ୟୁହରେ ନିଜେ ଫସିଛନ୍ତି ନୌସେନା କର୍ମଚାରୀ । ପୂରା ୨୦ ବର୍ଷ ପରେ ତାଙ୍କର ଜାଲରେ ସେ ନିଜେ ଫସିଛନ୍ତି । ଅଭିଯୁକ୍ତ ଜଣକ ହେଉଛନ୍ତି ପୂର୍ବତନ ନୌସେନା କର୍ମଚାରୀ ବଲେଶ କୁମାର। ତାଙ୍କ ବୟସ ୬୦ ବର୍ଷ। ୨୦୦୪ରେ ହୋଇଥିବା ଏକ ହତ୍ୟାର ମୁଖ୍ୟ ଅଭିଯୁକ୍ତ ହେଉଛନ୍ତି ବଲେଶ କୁମାର। ସେ ନିଜ ନାଁ ବଦଳାଇ ଅମନ ସିଂହ ରଖିଥିଲେ। ଆଉ ପ୍ରପର୍ଟି ଡିଲର୍‌ ଭାବେ କାମ କରୁଥିଲେ। ଏବେ ପୁଲିସ ତାଙ୍କୁ ଦିଲ୍ଲୀ ନଜଫଗଡରୁ ଗିରଫ କରିଛି।

ପୁଲିସ କହିବା ମୁତାବକ, ବଲେଶ କୁମାର ହରିୟାଣାର ବାସିନ୍ଦା। ସେ ଅଷ୍ଟମ ଯାଏ ପାଠ ପଢ଼ି ୧୯୮୧ରେ ନୌସେନାରେ ସାମିଲ ହୋଇଥିଲେ। ୧୯୯୬ରେ ନୌସେନାରୁ ସେ ଅବସର ନେଇଥିଲେ। ଏହାପରେ ଦିଲ୍ଲୀର ଉତ୍ତମ ନଗରରେ ଏକ ଟ୍ରାଭେଲ ବିଜନେସ ଆରମ୍ଭ କରିଥିଲେ। ୨୦୦୪ରେ ବଲେଶ ନିଜ ଭାଇ ଓ ରାଜେଶ ନାମକ ଜଣେ ବ୍ୟକ୍ତିଙ୍କ ସହ ମିଶି ମଦ ପିଇଥିଲେ। ରାଜେଶର ପତ୍ନୀଙ୍କ ସହ ବଲେଶର ଅନୈତିକ ସମ୍ପର୍କ ଥିଲା। ଏହା ଜାଣିବାପରେ ଉଭୟଙ୍କ ମଧ୍ୟରେ ଝଗଡା ହୋଇଥିଲା। ଏହାପରେ ବଲେଶ ନିଜ ଭାଇ ସହ ମିଶି ରାଜେଶର ଗଳା ଚିପି ହତ୍ୟା କରିଥିଲେ। ହତ୍ୟାପରେ ବିହାରର ଦୁଇ ଜଣ ଲୋକଙ୍କ ସହ ମିଶି ରାଜସ୍ଥାନ ଫେରାର ହୋଇଯାଇଥିଲେ ବଲେଶ କୁମାର।

ଏହାପରେ ପୁଲିସ ଠାରୁ ବଞ୍ଚିବା ପାଇଁ ଯୋଧପୁରରେ ସେ ରଚିଥିଲେ ନିଜ ନକଲି ମୃତ୍ୟୁର ଚକ୍ରବ୍ୟୁହ। ଏକ ଟ୍ରକ୍‌ ଭିତରେ ଦୁଇ ଜଣ ଶ୍ରମିକ ଥିବା ବେଳେ ବଲେଶ ସେଥିରେ ନିଆଁ ଲଗାଇ ଦେଇଥିଲେ। ଏହାପରେ ନିଜର ପରିଚୟ ପତ୍ର ଓ କିଛି ଡକ୍ୟୁମେଣ୍ଟକୁ ଟ୍ରକ୍‌ ଭିତରେ ଛାଡି ଆସିଥିଲେ। ଟ୍ରକ୍‌ ଭିତରୁ ମିଳିଥିବା ଦୁଇଟି ପୋଡି ଯାଇଥିବା ମୃତଦେହ ଓ ଡକ୍ୟୁମେଣ୍ଟ ମିଳିବା ପରେ ପୁଲିସ ବଲେଶ କୁମାରଙ୍କୁ ମୃତ ଘୋଷିତ କରିଥିଲା। ଶେଷରେ ଏବେ ସେ ପୁଲିସ ପଞ୍ଝାରେ ପଡିଛନ୍ତି। ଗିରଫ ପରେ ୨୦ ବର୍ଷ ତଳର ହତ୍ୟା ଓ ଟ୍ରକ୍‌ରେ ନିଆଁ ଲାଗିଥିବା ମାମଲାକୁ ପୁଣି ଥରେ ରି-ଓପନ୍‌ କରିଛି ଦିଲ୍ଲୀ ପୁଲିସ।

ଏ ଘଟଣାରେ ପୁଲିସ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି । ଟ୍ରକ୍‌ରେ ମିଳିଥିବା ମୃତଦେହର ସଠିକ୍ ଯାଞ୍ଚ ହୋଇନଥିବା ଅଭିଯୋଗ ହୋଇଛି । ଯଦି ଅଭିଯୁକ୍ତ ବଞ୍ଚିଛନ୍ତି ତେବେ ମୃତକଙ୍କ ପରିବାର ଲୋକେ ଏବେବି ଅନ୍ଧାରରେ ରହିଛନ୍ତି ବୋଲି ପ୍ରଶ୍ନ ଉଠିଛି ।

Powered by Froala Editor