ମୁହାଁମୁହିଁ ହେଲେ କ୍ୟାପିଟାଲ୍ ହସ୍ପିଟାଲ୍ କର୍ତ୍ତୃପକ୍ଷ- ଶିଶୁ ବଦଳ ଅଭିଯୋଗକାରୀ ବାପା
ଭୁବନେଶ୍ବର: କ୍ୟାପିଟାଲ ହସ୍ପିଟାଲରେ ଶିଶୁ ଅଦଳବଦଳ ମାମଲା ଏବେ ନୂଆ ମୋଡ଼ ନେଇଛି। ଡିଏନ୍ଏ ପରୀକ୍ଷାରେ ପୁଅ ନୁହେଁ ବରଂ ଝିଅ ଜନ୍ମ ହୋଇଥିବା ସ୍ପଷ୍ଟ ହେବା ପରେ ହସ୍ପିଟାଲ କର୍ତୃପକ୍ଷ ଏବେ ସଂପୃକ୍ତ ଅଭିଯୋଗକାରୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ପ୍ରସ୍ତୁତ ହେଉଛନ୍ତି। ଅନ୍ୟ ପକ୍ଷରେ ସଂପୃକ୍ତ ଶିଶୁଙ୍କ ବାପା ମଧ୍ୟ ପାଲଟା ଅଭିଯୋଗ କରିବା ସହିତ ଭୁଲ୍ ତଥ୍ୟ ଦେଇଥିବାରୁ ଆଇନର ଆଶ୍ରୟ ନେବି ବୋଲି କହିଛନ୍ତି। ଏସବୁକୁ ନେଇ ରାଜ୍ୟର ସ୍ବାସ୍ଥ୍ୟ ସେବା କ୍ଷେତ୍ରରେ ଏକପ୍ରକାର ଆଲୋଡ଼ନ ସୃଷ୍ଟି ହୋଇଛି।
ଗତମାସ ୨୬ ତାରିଖରେ କ୍ୟାପିଟାଲ ହସ୍ପିଟାଲରେ ପ୍ରାଣକୃଷ୍ଣ ବିଶ୍ବାଳଙ୍କର ଏକ ପୁଅ ଜନ୍ମ ହୋଇଛି ବୋଲି ମହିଳା ଆଟେଣ୍ଡାଣ୍ଟ୍ କହିଥିଲେ। ହେଲେ ତାଙ୍କୁ ଝିଅ ଦିଆଯାଇଥିଲା ବୋଲି ପ୍ରାଣକୃଷ୍ଣ ଅଭିଯୋଗ କରିଥିଲେ। ଠିକ୍ ଏହି ସମୟରେ ଅନ୍ୟ ଜଣେ ମହିଳା ପୁଅ ଜନ୍ମ ଦେଇଥିବାରୁ ଏହାକୁ ନେଇ ବିବାଦ ଆରମ୍ଭ ହୋଇଥିଲା। ମହିଳା ଆଟେଣ୍ଡାଣ୍ଟ୍ଙ୍କ କଥାକୁ ଧରି ଅଡ଼ି ବସିଥିଲେ ପ୍ରାଣକୃଷ୍ଣ। ପରେ ଏହାକୁ ନେଇ କ୍ୟାପିଟାଲ ଥାନାର ଦ୍ବାରସ୍ଥ ହୋଇଥିଲେ। ଡିଏନ୍ଏ ପରୀକ୍ଷା କରିବା ପାଇଁ ଜିଦ୍ ଧରିଥିଲେ। ଡିଏନ୍ଏ ପରୀକ୍ଷା ପାଇଁ କୋର୍ଟ ଅନୁମତି ଦେବା ପରେ ଗତ ସୋମବାର ମା’ ଓ ନବଜାତ ଶିଶୁର ରକ୍ତ ନମୁନା ସଂଗ୍ରହ ହୋଇଥିଲା। ଡିଏନ୍ଏ ରିପୋର୍ଟରେ ପ୍ରାଣକୃଷ୍ଣଙ୍କ ଝିଅ ହୋଇଥିବା ସ୍ପଷ୍ଟ ହୋଇଥିଲା। ଅନ୍ୟପକ୍ଷରେ ଶିଶୁ ଅଦଳବଦଳ ଅଭିଯୋଗ ପରେ ହସ୍ପିଟାଲ କର୍ତୃପକ୍ଷ ମଧ୍ୟ ମହିଳା ଆଟେଣ୍ଡାଣ୍ଟ୍ଙ୍କୁ ତରବରିଆ ଭାବେ ନିଲମ୍ବିତ କରିଥିଲେ।
ଏହି ଘଟଣାକୁ ନେଇ ଏବେ ହସ୍ପିଟାଲ କର୍ତୃପକ୍ଷ କ୍ଷୁବ୍ଧ ହୋଇଛନ୍ତି। କ୍ୟାପିଟାଲ ହସ୍ପିଟାଲ ନିର୍ଦେଶକ ଡା.ଲକ୍ଷ୍ମୀଧର ସାହୁ କହିଛନ୍ତି, ହସ୍ପିଟାଲ ଗୁଣବତ୍ତା ଅକ୍ଷୁର୍ଣ୍ଣ ରଖିବା ଲାଗି ସବୁପ୍ରକାର ବ୍ୟବସ୍ଥା କରାଯାଉଛି। ଏଥିପାଇଁ ହସ୍ପିଟାଲକୁ ଏନ୍କ୍ବାସ୍, ଲକ୍ଷ୍ୟ ଓ କାୟାକଳ୍ପ ସାର୍ଟିଫିକେଟ୍ ମିଳିଛି। ପ୍ରତ୍ୟେକ ଦିନ ୩୦ଟି ଓ ମାସକୁ ୧ହଜାର ଶିଶୁଙ୍କ ପ୍ରସବ କରାଯାଉଛି। ଏଥିପାଇଁ ସମସ୍ତ ପଦକ୍ଷେପ ନିଆଯାଉଛି। ମହିଳା ଆଟେଣ୍ଡାଣ୍ଟ୍ ଜଣକ ମଧ୍ୟ ଶିଶୁଙ୍କ ବାପାଙ୍କୁ ଝିଅ ଜନ୍ମ ହୋଇଥିବା କହିଥିଲେ। ମାତ୍ର ଲୋକ ଜଣକ ଠିକ୍ ଭାବେ ଶୁଣି ନାହାନ୍ତି କିମ୍ବା ମାନସିକ ଭାବେ ପୁଅ ଜନ୍ମ ହେବ ବୋଲି ଭାବିଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଥିଲା। ଝିଅ ଜନ୍ମ ହେବାର ଅଧ ଘଣ୍ଟା ପରେ ପୁଅ ଜନ୍ମ ହୋଇଥିଲା। ଶିଶୁଟିଏ ଜନ୍ମ ହେବା ପରେ ତାଙ୍କ ମା’ଙ୍କୁ ସୂଚନା ଦିଆଯାଏ, ଫୁଟ୍ ପ୍ରିଣ୍ଟ ରଖାଯିବା ସହିତ ଉପସ୍ଥିତ ଷ୍ଟାଫ୍ମାନେ ଆବଶ୍ୟକ କାଗଜପତ୍ରରେ ଉଲ୍ଲେଖ କରିଥାନ୍ତି। ଯଦି ଶିଶୁଟି ଗୁରୁତର ନ ଥାଏ ତାହାଲେ ଏକ ଟ୍ୟାଗ୍ ଲଗାଯିବ। ହସ୍ପିଟାଲରେ ଏଭଳି ଭୁଲ୍ କେବେ ହେବନାହିଁ। ଏହା ଏକ ବ୍ୟାବସାୟିକ ସେଣ୍ଟର ନୁହେଁ। ତେଣୁ ସରକାରଙ୍କୁ ଅସୁବିଧାରେ ପକାଉଥିବା ଓ ହସ୍ପିଟାଲକୁ ବଦନାମ କରୁଥିବା ବ୍ୟକ୍ତିଙ୍କୁ ଦୃଢ଼ ହସ୍ତରେ ଦମନ କରାଯିବାର ଆବଶ୍ୟକତା ରହିଛି। ଏ ଦୃଷ୍ଟିରୁ ସଂପୃକ୍ତ ବ୍ୟକ୍ତିଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ।
ଅପରପକ୍ଷରେ ନବଜାତକଙ୍କ ବାପା ପ୍ରାଣକୃଷ୍ଣ ବିଶ୍ବାଳ ମଧ୍ୟ କ୍ୟାପିଟାଲ ହସ୍ପିଟାଲ ବିରୋଧରେ ମାମଲା ଦାୟର କରିବେ ବୋଲି ଧମକ ଦେଇଛନ୍ତି। ପାଣକୃଷ୍ଣ କହିଛନ୍ତି, ହସ୍ପିଟାଲର ଭୁଲ୍ ତଥ୍ୟ ପାଇଁ ତାଙ୍କ ସମୟ ବରବାଦ ହୋଇଛି। ଅନେକ ଦିନ ହେବ ସେ ହଇରାଣ ହେଉଛନ୍ତି। ତେଣୁ ଆଇନର ଆଶ୍ରୟ ନେବି ବୋଲି ସେ ସୂଚନା ଦେଇଛନ୍ତି। ତେବେ ଏସବୁ ଭିତରେ ନିଲମ୍ବିତ ହୋଇଥିବା ମହିଳା ଆଟେଣ୍ଡାଣ୍ଟଙ୍କ ନିଲମ୍ବନ ଆଦେଶକୁ ହସ୍ପିଟାଲ କର୍ତୃପକ୍ଷ ହଟାଇ ଦେଇଛନ୍ତି। ତାଙ୍କୁ ପୁନର୍ବାର କାର୍ଯ୍ୟରେ ଯୋଗଦେବା ପାଇଁ କୁହାଯାଇଛି। ଖୁବ୍ଶୀଘ୍ର ସେ ହସ୍ପିଟାଲକୁ ଫେରିବେ ବୋଲି ସୂଚନା ମିଳିଛି।
Powered by Froala Editor
