କୋଭିଡ ପଜିଟିଭ ଚିହ୍ନଟ ପରେ ପାରାଦୀପ କୋଭିଡ ହସ୍ପିଟାଲରେ ଭର୍ତ୍ତି ହୋଇଥିଲେ । ଇତିମଧ୍ୟରେ ୧୬ ଦିନ ବିତିଗଲାଣି । ପରିବାର ଲୋକେ ତାଙ୍କ ଖୋଜ ଖବର ପାଉନାହାନ୍ତି । ହସ୍ପିଟାଲ କର୍ତ୍ତୃପକ୍ଷ ଓ ଫାଣ୍ଡି ଦୌଡୁଛନ୍ତି ପରିବାର ଲୋକେ । କେହି ବି ସନ୍ତୋଷ ଜନକ ଉତ୍ତର ଦେଉନାହାନ୍ତି । ଖବର ନେବାରୁ ଜଣାପଡିଛି ଯେ, ଜଗତସିଂହପୁର ଜିଲ୍ଲା କୁଜଙ୍ଗ ଥାନା ଜହ୍ନାପାଳ ଗାଁର ଗନ୍ଧର୍ବ ଜେନା କରୋନାରେ ଆକ୍ରାନ୍ତ ହୋଇଥିବା ନେଇ ମେ' ୧୪ ତାରିଖରେ ଜଣାପଡ଼ିଥିଲା। ସେହି ମାସ ୧୮ ତାରିଖରେ ସେ ପାରାଦୀପ କୋଭିଡ୍‌ ହସ୍‌ପିଟାଲ୍‌ରେ ଭର୍ତ୍ତି ହୋଇଥିଲେ। ମେ' ୨୧ ତାରିଖରେ ତାଙ୍କୁ କଟକ ଏସସିବି କୋଭିଡ ହସ୍‌ପିଟାଲ୍‌କୁ ରେଫର କରାଯାଇଥିଲା। ତେବେ ତାଙ୍କୁ ଏସ୍‌ସିବିକୁ ରେଫର କରାଯିବା ପରଠୁ ପରିବାର ଲୋକେ ତାଙ୍କ ବିଷୟରେ କିଛି ସୂଚନା ପାଇପାରି ନଥିଲେ। ଏନେଇ ଗନ୍ଧର୍ବଙ୍କ ପରିବାର ଥାନାରେ ଏତଲା ଦେଇଥିଲେ ମଧ୍ୟ କୌଣସି ପଦକ୍ଷେପ ନିଆଯାଉନଥିବା ପରିବାର ଲୋକେ ଅଭିଯୋଗ କରିଛନ୍ତି। 

ଗନ୍ଧର୍ବଙ୍କ ଝିଅ କହିଛନ୍ତି, 'ଆଜକୁ ୧୬ ଦିନ ହୋଇଗଲାଣି ମୋ ବାପାଙ୍କ କିଛି ଖୋଜ ଖବର ମିଳୁନାହିଁ। ମୋ ବାପା କୁଆଡ଼େ ଗଲେ ? ଆମେ କେମିତି ଜାଣିବୁ।' ଗ୍ରାମବାସୀ ଓ ସଂପର୍କୀୟ ମାନେ ଗନ୍ଧର୍ବଙ୍କ ସଂପର୍କରେ ଜାଣିବା ପାଇଁ କଟକ ବି ଯାଇଛନ୍ତି। ଏସ୍‌ସିବିରୁ ସିଏମ୍‌ସି, ସିଏମ୍‌ସିରୁ ମଙ୍ଗଳାବାଗ ଥାନା, ମଙ୍ଗଳାବାଗ ଥାନାରୁ ଏସ୍‌ସିବି ଫାଣ୍ଡି, ଫାଣ୍ଡିରୁ କୁଜଙ୍ଗ ଥାନା, କୁଜଙ୍ଗ ଥାନାରୁ ମଙ୍ଗଳାବାଗ ଥାନା- ଏମିତି ଚକ୍କର କାଟିଛନ୍ତି। କିନ୍ତୁ କିଛି ଲାଭ ହୋଇନି। କେହି ଗନ୍ଧର୍ବ ବିଷୟରେ ସେମାନଙ୍କୁ ସୂଚନା ଦେବାରେ ସାହାଯ୍ୟ କରି ନାହାନ୍ତି ବୋଲି ଅଭିଯୋଗ ହୋଇଛି।

ଅନ୍ୟପକ୍ଷେ ଏନେଇ ପୋଲିସ ପ୍ରଶାସନ କି ମେଡିକାଲ କର୍ତ୍ତୃପକ୍ଷଙ୍କ ପ୍ରତିକ୍ରିୟା ମିଳିପାରିନାହିଁ। ଏନେଇ ଆବଶ୍ୟକ ପଦକ୍ଷେପ ନେବାକୁ କଟକ ଜିଲ୍ଲାପାଳଙ୍କୁ ଅନୁରୋଧ କରିଥିବା ନେଇ ଜଗତସିଂହପୁର ଜିଲ୍ଲାପାଳ ସୂଚନା ଦେଇଛନ୍ତି।

Powered by Froala Editor