ସେପ୍ଟେମ୍ବର ୧୮ରୁ ସଂସଦର ସ୍ବତନ୍ତ୍ର ଅଧିବେଶନ
![ସେପ୍ଟେମ୍ବର ୧୮ରୁ ସଂସଦର ସ୍ବତନ୍ତ୍ର ଅଧିବେଶନ](https://odishanewslens.com/news_gallery/24019_1693504678.jpeg)
ଆସନ୍ତା ସେପ୍ଟେମ୍ବର ୧୮ରୁ ୨୨ ପର୍ଯ୍ୟନ୍ତ ସଂସଦର ସ୍ବତନ୍ତ୍ର ଅଧିବେଶନ । କେନ୍ଦ୍ର ସରକାର ୫ ଦିବସୀୟ ସ୍ବତନ୍ତ୍ର ଅଧିବେଶନ ଡାକିଛନ୍ତି । ଏପରି ହଠାତ୍ ୫ ଦିନିଆ ଅଧିବେଶନ ଡାକିବାର ପଛର କାରଣ ଜଣାପଡ଼ିନାହିଁ। କିନ୍ତୁ ସଂସଦୀୟ ବ୍ୟାପାର ମନ୍ତ୍ରୀ ପ୍ରହ୍ଲାଦ ଯୋଶୀ ବିଶେଷ ଅଧିବେଶନ ବସିବାକୁ ଯାଉଥିବା ଟ୍ୱିଟରରେ(ଏବେ ଏକ୍ସ) ସୂଚନା ଦେଇଛନ୍ତି। ଏହା ହେବ ୧୭ତମ ଲୋକସଭାର ୧୩ତମ ଅଧିବେଶନ । ସେହିପରି ରାଜ୍ୟସଭାର ଏହା ହେବ ୨୬୧ତମ ଅଧିବେଶନ ।
ଚଳିତ ବର୍ଷ ମୌସୁମୀ ଅଧିବେଶନ ଠିକ ଭାବେ ଚାଲିପାରି ନଥିବାରୁ ଅଧିକାଂଶ କାର୍ଯ୍ୟ ଦିବସ ବାଧାପ୍ରାପ୍ତ ହୋଇଥିଲା । ଏଥର ସ୍ବତନ୍ତ୍ର ଅଧିବେଶନରେ ୧୦ରୁ ଅଧିକ ମହତ୍ତ୍ବପୂର୍ଣ୍ଣ ବିଲ୍ ଉପସ୍ଥାପନା କରିବା ପାଇଁ ଲକ୍ଷ୍ୟ ରଖିଛନ୍ତି କେନ୍ଦ୍ର ସରକାର ।
ଆସନ୍ତା ସେପ୍ଟେମ୍ବର ୯ ଓ ୧୦ରେ ରାଜଧାନୀ ଦିଲ୍ଲୀରେ ଆୟୋଜିତ ଜି ୨୦ ଶିଖର ସମ୍ମିଳନୀର କିଛି ଦିନ ପରେ ଏହା ଆୟୋଜିତ ହେବ । ସଂସଦର ଏହି ସ୍ବତନ୍ତ୍ର ଅଧିବେଶନ ୫ଟି କାର୍ଯ୍ୟଦିବସ ରହିବ ।
ସମ୍ବିଧାନର ୪୪ତମ ସଂଶୋଧନ ଅଧିନିୟମର ଅନୁଚ୍ଛେଦ ୩୫୨ (୮) ଅନୁସାରେ ଲୋକସଭାର ସ୍ବତନ୍ତ୍ର ଅଧିବେଶନ ଆୟୋଜନ ହୋଇଥାଏ । ଯଦି ଲୋକସଭାରେ ଅତି୍ କମରେ ଦଶ ଜଣ ସଦସ୍ୟ ରାଷ୍ଟ୍ରପତି (ଯଦି ଲୋକସଭା ଅଧିବେଶନରେ ନାହାନ୍ତି) ବା ଅଧ୍ୟକ୍ଷ (ଯଦି ଲୋକସଭା ଅଧିବେଶନରେ ଅଛନ୍ତି)ଙ୍କୁ ଲେଖନ୍ତି ତେବେ ଲୋକସଭାର ବିଶେଷ ଅଧିବେଶନ ଡକାଯାଇଥାଏ ।
ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା, ୫ ଦିନିଆ ଅଧିବେଶନର ଏଜେଣ୍ଡା ସରକାର ସାର୍ବଜନୀନ କରି ନାହାନ୍ତି। ସେହିପରି ଅଧିବେଶନ ସଂସଦର ନୂଆ ବିଲଡିଂରେ ବସିବ କି ପୁରୁଣା ବିଲଡିଂରେ ବସିବ, ସେକଥା ମଧ୍ୟ ସ୍ପଷ୍ଟ ହୋଇନି। ଲୋକସଭା ଓ ରାଜ୍ୟସଭାର ଯୁଗ୍ମ ଅଧିବେଶନ ମଧ୍ୟ ବସିବାର କାର୍ଯ୍ୟକ୍ରମ ନାହିଁ। ୫ ଦିନିଆ ଅଧିବେଶନରେ ସରକାର କୌଣସି ଗୁରୁତ୍ୱପୂର୍ଣ୍ଣ ବିଲ୍ ଆଣିବାର ସମ୍ଭବନା ନଥିବା ଗୋଟିଏ ଜାତୀୟ ଗଣମାଧ୍ୟମରେ ପ୍ରକାଶ ପାଇଛି।
Powered by Froala Editor