ଭୁବନେଶ୍ୱର: ପୁଞ୍ଜିପତିଙ୍କୁ ଆକୃଷ୍ଠ କରିବା ଏବଂ ପୁଞ୍ଜିନିବେଶ ପ୍ରସ୍ତାବ କାର୍ୟ୍ୟାନ୍ୱୟନ ଦିଗରେ ନୂଆ କୀର୍ତ୍ତିମାନ ସ୍ଥାପନ କରିଛି ଓଡ଼ିଶା। ପୁଞ୍ଜି ଆଣିବାରେ ଓଡ଼ିଶା ଏବେ ଗୋଟିଏ ପରେ ଗୋଟିଏ ବଡ଼ ରାଜ୍ୟକୁ ପଛରେ ପକାଇବା ଆରମ୍ଭ କରିଛି। ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ) ପକ୍ଷରୁ ଜାରି ରିପୋର୍ଟ ଅନୁସାରେ ପୁଞ୍ଜିନିବେଶ ପ୍ରସ୍ତାବ ପାଇବାରେ ଓଡ଼ିଶା ଦେଶର ତୃତୀୟ ସ୍ଥାନରେ ପହଞ୍ଚିଛି। ପ୍ରଥମ ଦୁଇ ସ୍ଥାନରେ ଉତ୍ତର ପ୍ରଦେଶ ଓ ଗୁଜରାଟ ଅଛନ୍ତି। ତେବେ ଓଡ଼ିଶାର ଅଭିବୃଦ୍ଧି ପ୍ରଥମ ଦୁଇ ସ୍ଥାନରେ ଥିବା ଏହି ରାଜ୍ୟମାନଙ୍କ ଠାରୁ ଢ଼େର ଆଗରେ ରହିଛି। ଓଡ଼ିଶା ପଛକୁ ମହାରାଷ୍ଟ୍ର ୪ର୍ଥ ଏବଂ କର୍ଣ୍ଣାଟକ ୫ମ ସ୍ଥାନରେ ରହିଛନ୍ତି। ୨୦୨୨-୨୩ରେ ଉତ୍ତର ପ୍ରଦେଶ, ଗୁଜରାଟ, ଓଡ଼ିଶା, ମହାରାଷ୍ଟ୍ର ଏବଂ କର୍ଣ୍ଣାଟକ ୫୭.୨% (୨୦୧୭୦୦ କୋଟି ଟଙ୍କା) ପୁଞ୍ଜି ନିବେଶ ପ୍ରସ୍ତାବ ହାସଲ କରିଛନ୍ତି।

ରିପୋର୍ଟ ଅନୁସାରେ, ଉତ୍ତର ପ୍ରଦେଶ ୨୦୨୨ରେ ୧୨.୮% ପୁଞ୍ଜିନିବେଶ ପ୍ରସ୍ତାବ ପାଇଥିବା ବେଳେ ୨୦୨୩ରେ ୧୬.୨% ପାଇଥିଲା। ସେହିପରି ୨୦୨୨ ଓ ୨୦୨୩ରେ ଗୁଜରାଟ ଯଥାକ୍ରମେ ୧୧.୭% ଏବଂ ୧୪% ପ୍ରସ୍ତାବ ପାଇଥିଲା। ତେବେ ଓଡ଼ିଶା ୨୦୨୨ରେ ମାତ୍ର ୨.୨% ପାଇଥିବା ବେଳେ ଚଳିତ ବର୍ଷରେ ୧୧.୮% ପାଇଛି। ମହାରାଷ୍ଟ୍ର ୨୦୨୨ରେ ୧୬.୨% ଓ ୨୦୨୩ରେ ୭.୯% ଏବଂ କର୍ଣ୍ଣାଟକ ଯଥାକ୍ରମେ ୬.୯% ଓ ୭.୩% ପୁଞ୍ଜିନିବେଶ ପ୍ରସ୍ତାବ ପାଇଛି। ଶେଷ ୫ ରାଜ୍ୟ ମଧ୍ୟରେ ହରିୟାଣା, ଆସାମ, ପଶ୍ଚିମବଙ୍ଗ, କେରଳ ଏବଂ ଗୋଆ ରହିଛନ୍ତି।

ଶିଳ୍ପାୟନ ସହିତ କର୍ମନିଯୁକ୍ତି ସୃଷ୍ଟି ଲକ୍ଷ୍ୟରେ ରାଜ୍ୟ ସରକାରଙ୍କ ନିରନ୍ତର ପ୍ରୟାସ ହେତୁ ଏହି ସୁଫଳ ମିଳିଛି। 

Powered by Froala Editor