ନୂଆଦିଲ୍ଲୀ: ଲୋକମାନଙ୍କ ବ୍ୟକ୍ତିଗତ ତଥ୍ୟ ଲିକ୍ ହେଲେ ସଂସ୍ଥାକୁ ୨୫୦ କୋଟି ଟଙ୍କା ପର୍ଯ୍ୟନ୍ତ ଜରିମାନା ଗଣିବାକୁ ପଡ଼ିବ। ତଥ୍ୟରେ ହେର‌ଫେର ହେଲେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଆଜି ସଂସଦରେ ଗୃହୀତ ହୋଇଥିବା ବ୍ୟକ୍ତିଗତ ତଥ୍ୟ ସୁରକ୍ଷା ବିଲ୍‌ରେ ଏଭଳି ବ୍ୟବସ୍ଥା ରହିଛି। ମଣିପୁର ପ୍ରସଙ୍ଗକୁ ନେଇ ବିରୋଧୀ ଦଳ ସଦସ୍ୟମାନେ କକ୍ଷତ୍ୟାଗ କରିଥିବା ବେଳେ ବାଚନିକ ଭୋଟ୍‌ରେ ଏହି ବିଲ୍‌ ପାରିତ ହୋଇଛି। ସୋମବାର ଏହି ବିଲ୍ ଲୋକସଭାରେ ପାରିତ ହୋଇଥିଲା। ଆଇଟି ମନ୍ତ୍ରୀ ଅଶ୍ବିନୀ ବୈଷ୍ଣବ କହିଛନ୍ତି ଯେ ଘରୋଇ ଓ ସରକାରୀ ସଂସ୍ଥା କିଭଳି ନାଗରିକମାନଙ୍କ ତଥ୍ୟ ସଂଗ୍ରହ ଓ ପ୍ରକ୍ରିୟାକରଣ କରିବେ ସେଥିପାଇଁ ବିଲ୍‌ରେ ବ୍ୟବସ୍ଥା ରହିଛି।

ବିଲ୍‌କୁ ଅତି ସରଳ ଭାଷାରେ ପ୍ରସ୍ତୁତ କରାଯାଇଥିବାରୁ ତାହାକୁ ସାଧାରଣ ନାଗରିକମାନେ ମଧ୍ୟ ସହଜରେ ବୁଝିପାରିବେ। ସେ କହିଛନ୍ତି ଯେ ଏହି ବିଲ୍‌ ଅନୁସାରେ ବିଭିନ୍ନ ସଂସ୍ଥା ଲୋକମାନଙ୍କ ତଥ୍ୟକୁ ଯେଉଁ କାରଣ ପାଇଁ ନେଇଛନ୍ତି କେବଳ ସେହି କାମରେ ବ୍ୟବହାର କରିପାରିବେ। ଅନ୍ୟ କାର୍ଯ୍ୟରେ ତଥ୍ୟ ବ୍ୟବହାର କଲେ ତାହାକୁ ଆଇନର ଉଲ୍ଲଂଘନ ବିଚାର କରାଯିବ। ଲୋକମାନଙ୍କୁ ନ୍ୟାୟ ପ୍ରଦାନ କରିବା ଲାଗି ତଥ୍ୟ ସୁରକ୍ଷା ବୋର୍ଡ ଗଠନ କରାଯିବ। ସେଥିରେ ବିଶେଷଜ୍ଞମାନଙ୍କୁ ନିଯୁକ୍ତି ଦିଆଯିବ। ବୋର୍ଡରୁ ନ୍ୟାୟ ନମି‌ଳିଲେ ଲୋକମାନେ ଟିଡିସାଟ୍‌ ଓ ସୁପ୍ରିମ୍‌ କୋର୍ଟରେ ଆବେଦନ କରିପାରିବେ ବୋଲି ସେ କହିଛନ୍ତି। ନାଗରିକମାନଙ୍କ ସ୍ବାର୍ଥର ସୁରକ୍ଷା ଦିଗରେ ଏହା ଏକ ବହୁତ ବଡ଼ ପଦକ୍ଷେପ ବୋଲି ଆଇଟି ରାଷ୍ଟ୍ରମନ୍ତ୍ରୀ ରାଜୀବ ଚନ୍ଦ୍ରଶେଖର କହିଛନ୍ତି। ଏହି ବିଲ୍‌ ନବସୃଜନ ଅର୍ଥନୀତି ଓ ପ୍ରଶାସନକୁ ଆହୁରି ସୁଦୃଢ଼ କରିବ ବୋଲି ସେ କହିଛନ୍ତି। 

ବ୍ୟକ୍ତିଗତ ତଥ୍ୟ ସୁରକ୍ଷା ବିଲ୍‌ରେ ଏଭଳି ବ୍ୟବସ୍ଥା ରହିଛି ଯାହା ଦ୍ବାରା ନାଗରିକମାନଙ୍କ ସ୍ବାର୍ଥର ସୁରକ୍ଷା ‌ହୋଇପାରିବ ଏବଂ ସେହି ତଥ୍ୟକୁ ଆଇନଗତ ଭାବେ ବାଣିଜ୍ୟିକ କାର୍ଯ୍ୟରେ ମଧ୍ୟ ବ୍ୟବହାର କରଯାଇପାରିବ। ଅନ୍‌ଲାଇନ୍ ସଂସ୍ଥାଗୁଡ଼ିକ ଦ୍ବାରା ଲୋକମାନଙ୍କ ତଥ୍ୟର ଯେଉଁ ଅପବ୍ୟବହାର ହେଉଛି ତାହାକୁ ରୋକିବା ଲାଗି ଏଥିରେ ପ୍ରୟାସ କରାଯାଇଛି। ଛଅ ବର୍ଷ ପୂର୍ବେ ସୁପ୍ରିମ୍‌ କୋର୍ଟ ‘ଗୋପନୀୟତାର ଅଧିକାର’କୁ ମୌଳିକ ଅଧିକାର ବୋଲି କହିଥିଲେ। 

Powered by Froala Editor