ବଢ଼ି ପାଣିରୁ ଉଦ୍ଧାର ହେଲା କୋଟିଏ ଟଙ୍କାର ପ୍ରୀତମ୍
ଦିଲ୍ଲୀରେ ପ୍ରବଳ ବର୍ଷା । ଯମୁନା ନଦୀରେ ଜଳସ୍ତର ଅଧିକ ଥିବାରୁ ପାଣି ଦିଲ୍ଲୀରେ ପ୍ରବେଶ କରିଛି, ଯାହା ପାଇଁ ଅନେକ ଅଞ୍ଚଳ ପାଣିରେ ବୁଡି ରହିଛି। ଗାଜିଆବାଦ ଏବଂ ନୋଏଡାର କେତେକ ଅଞ୍ଚଳରେ ବନ୍ୟା ଜଳ ପ୍ରବେଶ କରିଥିବା ଦେଖାଯାଇଛି। ଫଳରେ ବହୁ ଲୋକ ପାଣି ଭିତରେ ଫସି ରହିଛି। ଏହି ବଢ଼ି ପାଣିରେ ଫସିଥିବା ଗୋଟିଏ ଷଣ୍ଢକୁ ଏନ୍ଡିଆରଏଫ୍(ନ୍ୟାସନାଲ ଡିଜାଷ୍ଟର ରେସପନ୍ସ ଫୋର୍ସ) ଉଦ୍ଧାର କରିଛି। ଯାହାର ଦାମ୍ କୋଟିଏ ଟଙ୍କା। ବେଶ ଜଣାଶୁଣା ଏହି ଷଣ୍ଢର ନାଁ ପ୍ରୀତମ।
ନୋଇଡ଼ା ଅଞ୍ଚଳରୁ ୩ ଷଣ୍ଢକୁ ଏନ୍ଏଡିଆରଏଫ୍ ଉଦ୍ଧାର କରିଥିବା ବେଳେ ଯାହା ଭିତରେ ରହିଛି ପ୍ରୀତମ। ଏନ୍ଡିଆରଏଫ୍ର ୮ମ ବାଟାଲିୟନ ଏହାର ଫଟୋ ଟ୍ୱିଟ କରିବା ପରେ ଚର୍ଚ୍ଚା ଜୋର ଧରିଛି।
ଦିଲ୍ଲୀ ତଳିଆ ଅଞ୍ଚଳରେ ବଢ଼ି ପାଣି ପଶିବା ନେଇ ସତର୍କ ସୂଚନା ଜାରି ପରେ ସମସ୍ତଙ୍କୁ ସୁରକ୍ଷିତ ସ୍ଥାନକୁ ଚାଲିଯିବାକୁ ସଚେତନ କରାଯାଇଥିଲା। ଯାହାପରେ ପ୍ରଶାସନ ଓ ପୁଲିସ ପକ୍ଷରୁ ଗୁରୁବାର ସର୍ଚ୍ଚ ଅପରେସନ ଆରମ୍ଭ ହୋଇଥିଲା। ଗୃହପାଳିତ ପଶୁମାନଙ୍କୁ ସୁରକ୍ଷିତ ସ୍ଥାନକୁ ନେବା ପାଇଁ ଗ୍ରେଟ୍ ନୋଇଡ଼ାରେ ସର୍ଚ୍ଚ ଅପରେସନ ବେଳେ ଏନ୍ଡିଆରଏଫ୍ ଏହି ଉଦ୍ଧାର କାର୍ଯ୍ୟ କରିଛି।
ତେବେ ବନ୍ୟା ପରିସ୍ଥିତି ମଧ୍ୟରେ ଗାଜିଆବାଦ ଏନଡିଆରଏଫ ଟିମ୍ ବର୍ତ୍ତମାନ ପର୍ଯ୍ୟନ୍ତ ଦିଲ୍ଲୀ, ହରିୟାଣା ଏବଂ ପଶ୍ଚିମ ଉତ୍ତରପ୍ରଦେଶରୁ ୫୭୭୩ଲୋକଙ୍କୁ ଉଦ୍ଧାର କରିସାରିଛି। ଏହା ସହିତ ୬୫୦ପଶୁମାନଙ୍କୁ ଉଦ୍ଧାର କରି ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯାଇଛି।
Powered by Froala Editor
