ଗରମ ଗୁଳୁଗୁଳି: ୧୦ଟା ପରେ ଘରୁ ବାହାରିବା ମୁସ୍କିଲ
ଭୁବନେଶ୍ୱର : ଆଜି ବି ଉପକୂଳରୁ ଉପାନ୍ତ ସବୁଠି ଅସହ୍ୟ ଗ୍ରୀଷ୍ମ ଲହରୀ ଆକଳନ। କଲବଲ କରୁଛି ଅସହ୍ୟ ଗରମ ଗୁଳୁଗୁଳି । ଅସମ୍ଭାଳ ତାତିରେ ଅସ୍ତବ୍ୟସ୍ତ ଜନଜୀବନ । ଦିନ ୧୦ଟା ପରେ ଘରୁ ବାହାରିବା ମୁସ୍କିଲ । ମୟୂରଭଞ୍ଜ, କେନ୍ଦୁଝର, ସୁନ୍ଦରଗଡ଼, ସମ୍ବଲପୁର, ସୋନପୁର ଓ ବୌଦ୍ଧ ଜିଲ୍ଲା ପାଇଁ ହିଟ୍ ୱେଭ୍ ୱାର୍ଣ୍ଣିଂ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର ।
ବୁଧବାର ମଧ୍ୟ ବାରିପଦା ରାଜ୍ୟ ତଥା ଦେଶର ଉତ୍ତପ୍ତ ସହର ପାଲଟିଛି। ଏଠାକାର ତାପମାତ୍ରା ୪୪.୫ ଡିଗ୍ରି ରହିଥିଲା, ଯାହାକି ଦେଶରେ ସର୍ବୋଚ୍ଚ। ବାରିପଦା ସମେତ ଉତ୍ତର ପ୍ରଦେଶର ଆହ୍ଲାବାଦ ଓ ମଧ୍ୟପ୍ରଦେଶର ଖଜୁରାଓ ସହରର ତାପମାତ୍ରା ୪୪.୫ ଡିଗ୍ରି ରହିଥିଲା। ବିଶ୍ବର ସବୁଠାରୁ ଉତ୍ତପ୍ତ ୧୫ଟି ସହର ମଧ୍ୟରେ ଭାରତରୁ ୬ଟି ରହିଛନ୍ତି। ବାରିପଦା ବିଶ୍ବର ପଞ୍ଚମ ସ୍ଥାନରେ ରହିଛି। ବାରିପଦା ବ୍ୟତୀତ ଓଡ଼ିଶାର ବଲାଙ୍ଗୀର ସହର ଉତ୍ତପ୍ତ ୧୫ ସହରଗୁଡ଼ିକ ମଧ୍ୟରେ ୧୧ତମ ସ୍ଥାନରେ ରହିଥିଲା । ଆଞ୍ଚଳିକ ପାଣିପାଗ କେନ୍ଦ୍ରର ଆକଳନ, ପ୍ରଚଣ୍ଡ ତାତି ଆଉ ୨୪ ଘଣ୍ଟା ଧରି ଜାରି ରହିବ। ଆସନ୍ତାକାଲି ସକାଳଠାରୁ ପାଗ ସାମାନ୍ୟ ବଦଳିପାରେ। କାଳବୈଶାଖୀ ପ୍ରଭାବରେ ୨୧ରୁ ୨୩ ତାରିଖ ମଧ୍ୟରେ ଓଡ଼ିଶାର ଅଧିକାଂଶ ସହରର ତାପମାତ୍ରା ୨ରୁ ୪ ଡିଗ୍ରି କମିପାରେ।
Powered by Froala Editor
