ପଦ୍ମପୁର: ପଦ୍ମପୁର ଉପନିର୍ବାଚନରେ ନିଜ ନିଜର ପ୍ରାର୍ଥୀ ଜିତିବେ ବୋଲି ବିଜେଡି ଓ ବିଜେପି ମଧ୍ୟ ଦମ୍ଭୋକ୍ତି ବାଢ଼ିବାରେ ଲାଗିଛନ୍ତି। ଚଳିତ ଉପନିର୍ବାଚନରେ ମୋଟ ୮୧.୨୯ ପ୍ରତିଶତ ମତଦାନ ହୋଇଛି । ଆଉ ଏତେ ସଂଖ୍ୟକ ମତଦାନ ହୋଇଥିବାରୁ ଜିତିବାକୁ ନେଇ ଉଭୟ ବିଜେଡି ଓ ବିଜେପି ନିଜ ନିଜ ସପକ୍ଷରେ ଯୁକ୍ତି ବାଢ଼ିବାରେ ଲାଗିଛନ୍ତି।
ବିଜେଡି ଉପସଭାପତି ତଥା ବରିଷ୍ଠ ନେତା ଦେବୀପ୍ରସାଦ ମିଶ୍ର କହିଛନ୍ତି ଯେ, ପଦ୍ମପୁର ଉପନିର୍ବାଚନରେ ବିଜେଡିର ନିଶ୍ଚୟ ବିଜୟ ହେବ । ୨୦୧୯ରେ ବିଜେଡିର ଜିତିବା ବ୍ୟବଧାନ ୫ହଜାରରୁ ଅଧିକ ଥିଲା । ଚଳିତ ଉପନିର୍ବାଚନରେ ଏହି ଜିତିବା ବ୍ୟବଧାନ ବହୁଗୁଣିତ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ବାଚନ ପ୍ରଚାର ପରେ ଦଳର ବିଜୟ ବ୍ୟବଧାନ ବହୁଗୁଣରେ ବୃଦ୍ଧି ପାଇଛି । ପଦ୍ମପୁରରେ ଦଳର ପ୍ରଦର୍ଶନ ବେଶ୍ ଭଲ ରହିବ । ଯାହାର ପ୍ରଭାବ ୨୦୨୪ ସାଧାରଣ ନିର୍ବାଚନରେ କ’ଣ ରହିବ ତାହା ରାଜନୀତିକ ସମୀକ୍ଷକ ଓ ମିଡିଆ ଆକଳନ କରିବ । କିନ୍ତୁ ବିଜେଡି ପ୍ରାର୍ଥୀ ବର୍ଷା ସିଂ ବରିହା ବହୁ ଭୋଟ୍ ବ୍ୟବଧାନରେ ନିଶ୍ଚିତ ଜିତିବେ ବୋଲି ଶ୍ରୀ ମିଶ୍ର ଦମ୍ଭୋକ୍ତି ବାଢ଼ିଛନ୍ତି।

ଉଲ୍ଲେଖଯୋଗ୍ୟ,  ପଦ୍ମପୁରରେ ୩୧୯ଟି ବୁଥରେ ନିର୍ବାଚନମଣ୍ଡଳୀର ୮୧.୨୯ ପ୍ରତିଶତ ଭୋଟର ନିଜର ମତାଧିକାର ସାବ୍ୟସ୍ତ କରିଛନ୍ତି ।ଧାମନଗର ଉପନିର୍ବାଚନରେ ମତଦାନ ହାର ୨୦୧୯ ସାଧାରଣ ନିର୍ବାଚନ ତୁଳନାରେ ପ୍ରାୟ ୩ ପ୍ରତିଶତ କମ୍ ରହିଥିଲାବେଳେ ପଦ୍ମପୁର ଉପନିର୍ବାଚନରେ ମତଦାନ ହାର ୨୦୧୯ ସାଧାରଣ ନିର୍ବାଚନ ତୁଳନାରେ ଅଧିକ ୨.୨୪% ରହିଛି । ସେହିପରି ୨୦୧୯ ସାଧାରଣ ନିର୍ବାଚନରେ ମତଦାନ ହାର ୭୯.୦୫% ( ୨ଲକ୍ଷ ୧ହଜାର ୯୨୮) ଥିବାବେଳେ ୨୦୧୪ରେ ୭୯.୧୬%, ୨୦୦୯ରେ ୭୫.୫୧%, ୨୦୦୪ରେ ୭୪.୦୯% ଓ ୨୦୦୦ ମସିହା ବିଧାନସଭା ନିର୍ବାଚନରେ ପଦ୍ମପୁରରେ ମତଦାନ ହାର ୬୪.୧୯% ରହିଥିବା ଜଣାପଡ଼ିଛି।

Powered by Froala Editor