ୱାଶିଂଟନ୍‌: ଆମେରିକାର ଟେକ୍ସାସ୍ ଆଣ୍ଟୋନିଓରେ ଏକ ହୃଦୟ ବିଦାରକ ଘଟଣା ଦେଖିବାକୁ ମିଳିଛି । ଏକ ଟ୍ରକ୍‌ର ଡାଲାରୁ ମିଳିଛି ୪୬ଟି ମୃତଦେହ । ସମସ୍ତେ ମୃତଦେହ ପ୍ରବାସୀ ହୋଇଥିବା ଅନୁମାନ କରାଯାଉଛି । ଏନେଇ ତଦନ୍ତ ଜାରି ରହିଥିବା ସ୍ଥାନୀୟ ପୁଲିସ୍ ପକ୍ଷରୁ ସୂଚନା ଦିଆଯାଇଛି । ମାତ୍ର ଘଟଣା ବିଷୟରେ ଅଧିକ କିଛି ତଥ୍ୟ ଦିଆଯାଉନି । ଯାହାକୁ ନେଇ ଏବେ ବିଭିନ୍ନ ପ୍ରଶ୍ନବାଚୀ ସୃଷ୍ଟି ହୋଇଛି ।

ଟ୍ରକଟି ସହରର ଦକ୍ଷିଣ ପ୍ରାନ୍ତରେ ଥିବା ଏକ ରେଳ ଧାରଣା ପାଖରେ ଥିଲା । ଏହାକୁ ଖୋଲିବା ପରେ ତା’ ଭିତରୁ ଏତେ ସଂଖ୍ୟାରେ ମୃତଦେହ ମିଳିଥିଲା । ପୁଲିସ ଗାଡି ଓ ଆମ୍ବୁଲାନ୍ସ ଟ୍ରକ୍ ଆଗରେ ରହିଛନ୍ତି । ଏଥିରେ ମୃତଦେହ ଲଦାଯାଉଛି ।

ଯେଉଁଠାରୁ ଏହି ମୃତଦେହ ଗୁଡିକ ମିଳିଛି ସେହି ସ୍ଥାନଟି ମେକ୍ସିକୋ ସୀମା ଠାରୁ ୨୫୦ କିଲୋମିଟର ଦୂରରେ ଅବସ୍ଥିତ । ମେକ୍ସିକୋ ବୈଦେଶିକ ମନ୍ତ୍ରୀ ମାର୍ସେଲ ଆବ୍ରାଡ୍‌ଙ୍କ କହିବା ମୁତାବକ, ଟ୍ରକ୍‌ରେ ଥିବା ସମସ୍ତ ବ୍ୟକ୍ତିଙ୍କ ଶ୍ୱାସରୁଦ୍ଧ ହେତୁ ମୃତ୍ୟୁ ହୋଇଥିବା ଅନୁମାନ କରାଯାଉଛି । କାରଣ ଯେଉଁଠାରୁ ଏହି ମୃତଦେହ ମିଳିଛି ସେଠାରେ ଏବେ ପ୍ରବଳ ଗରମ ହେଉଛି । ତେବେ ସେ ଯାହା ବି ହେଉନା କାହିଁକି ଏହା ନିଶ୍ଚିତ ଭାବେ ଏକ ଦୁଃଖଦ ଘଟଣା ବୋଲି ମାର୍ସେଲ୍ କହିଛନ୍ତି ।

ସେପଟେ ସ୍ଥାନୀୟ ବାଣିଜ୍ୟିକ ଦୂତାବାସ ଘଟଣାସ୍ଥଳରେ ପହଁଚିଛନ୍ତି । କେଉଁ କାରଣରୁ ଏମାନଙ୍କ ମୃତ୍ୟୁ ହେଲା ତାହାର ଅନୁସନ୍ଧାନ ଜାରି ରହିଛି । ମୃତକଙ୍କ ପରିଚୟ ଏ ପର୍ଯ୍ୟନ୍ତ ମିଳିନି । ଖୁବ୍‌ଶୀଘ୍ର ସମସ୍ତଙ୍କୁ ଚିହ୍ନଟ କରାଯିବ ବୋଲି ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଥିବା ଏକ ଜାତୀୟ ଗଣମାଧ୍ୟମରେ ପ୍ରକାଶ ପାଇଛି ।

Powered by Froala Editor