ନିଜ ପଦରୁ ଇସ୍ତଫା ନ ଦେଇ ବି ମୁଖ୍ୟମନ୍ତ୍ରୀ ବାସଭବନ ବର୍ଷା ବଙ୍ଗଳା ଛାଡି ନିଜ ଘରକୁ ଚାଲିଯାଇଛନ୍ତି ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ । ମହାରାଷ୍ଟ୍ରରେ ଦେଖା ଦେଇଥିବା ରାଜନୈତିକ ସଙ୍କଟ ମଧ୍ୟରେ ଆଜି ମୁଖ୍ୟମନ୍ତ୍ରୀଙ୍କ ବାସଭବନ କୁହାଯାଉଥିବା ବର୍ଷା ବଙ୍ଗଳା ଛାଡି ନିଜ ଘର ମାତୋଶ୍ରୀକୁ ଚାଲିଆସିଛନ୍ତି ଉଦ୍ଧବ । ତେବେ ଉଦ୍ଧବଙ୍କ ପ୍ରତି ନିଜର ସମର୍ଥନ ଜଣାଇବାକୁ ବର୍ଷା ବଙ୍ଗଳା ସାମ୍ନାରେ ବହୁ ସଂଖ୍ୟାରେ ଶିବସେନା କର୍ମୀ ଏକତ୍ରିତ ହୋଇଛନ୍ତି ।
ମହାରାଷ୍ଟ୍ରରେ ସୃଷ୍ଟି ହୋଇଥିବା ରାଜନୀତିକ ସଙ୍କଟ ଦେଖି ଭାଙ୍ଗି ପଡ଼ିଛନ୍ତି ମୁଖ୍ୟମନ୍ତ୍ରୀ ଉଦ୍ଧବ ଠାକରେ। ତାଙ୍କ ଦଳ ଶିବସେନାର ୩୦ରୁ ଅଧିକ ବିଧାୟକ ସରକାର ବିରୋଧରେ ବିଦ୍ରୋହ ଘୋଷଣା କରିଥିବାରୁ ଉଦ୍ଧବ ଠାକରେଙ୍କ ଆସନ ଟଳମଳ ହୋଇଛି। ଏସବୁ ଭିତରେ ଉଦ୍ଧବ ଠାକରେ ରାଜ୍ୟବାସୀଙ୍କୁ ସମ୍ବୋଧନ କରି ଇସ୍ତଫା ଦେବାକୁ ପ୍ରସ୍ତୁତ ଥିବା ମଧ୍ୟ ଘୋଷଣା କରିଛନ୍ତି।

ସେ କହିଛନ୍ତି, “ଯଦି ଜଣେ ବି ଅସନ୍ତୁଷ୍ଟ ବିଧାୟକ ମୋତେ ମୁଖ୍ୟମନ୍ତ୍ରୀ ପଦ ଛାଡ଼ିବାକୁ କହିବେ, ତା’ହେଲେ ମୁଁ ପଦ ସହ ବାସଭବନ ଛାଡ଼ି ଦେବି। ମୁଁ ମୋର ଇସ୍ତଫାପତ୍ର ପ୍ରସ୍ତୁତ କରି ରଖିଛି। ଯେକୌଣସି ଶିବ ସୈନିକ ମୁଖ୍ୟମନ୍ତ୍ରୀ ହୋଇପାରିବେ। ଯଦି ବିଧାୟକମାନେ ଚାହୁଁଛନ୍ତି, ତା’ହେଲେ ମୁଁ ପଦ ଛାଡ଼ିବାକୁ ରାଜି। ବିଗତ ୨.୫ ବର୍ଷ ହେଲା ଆପଣମାନେ ଦେଇଥିବା ସମର୍ଥନ ପାଇଁ ବହୁତ ବହୁତ ଧନ୍ୟବାଦ।

ସୂଚନା ମୁତାବକ ଆଜି ଆଉ ଦୁଇଜଣ ଶିବସେନା ବିଧାୟକ ଗୁଲାବରାଓ ପାଟିଲ ଏବଂ ଯୋଗେଶ କଦମ ଗୌହାଟୀରେ ପହଞ୍ଚିଛନ୍ତି। ଏଠାରେ ସେମାନେ ଏକନାଥ ସିନ୍ଧେଙ୍କ ନେତୃତ୍ୱରେ ବିଦ୍ରୋହୀ ବିଧାୟକଙ୍କ ଦଳରେ ଯୋଗ ଦେଇଛନ୍ତି। ଗତକାଲି ଉଦ୍ଧବ ଠାକରେ ଡକାଇଥିବା ବୈଠକରେ ଏହି ବିଧାୟକମାନଙ୍କ ମଧ୍ୟରୁ ଜଣେ ଭାଗ ନେଇଥିଲେ । ଇତିମଧ୍ୟରେ ଉଦ୍ଧବ ଠାକରେ ବର୍ଷା ଭବନ ଛାଡି ନିଜ ଘରକୁ ଚାଲିଯାଇଛନ୍ତି ।