ବିନା ଭିସାରେ ଭାରତରେ ପଶି ଦୁଇ ଜଣ ଚୀନ ନାଗରିକ ବିହାରରେ ନେପାଳ ସୀମା ଅତିକ୍ରମ କରିବାକୁ ଉଦ୍ୟମ କରୁଥିବା ବେଳେ ସେମାନଙ୍କୁ ଗିରଫ କରାଯାଇଛି । ବିନା ଭିସାରେ ଏହି ଦୁଇ ଚୀନ୍‌ ନାଗରିକ ଦିଲ୍ଲୀ-ଏନସିଆର ଅଞ୍ଚଳରେ ପ୍ରାୟ ପନ୍ଦର ଦିନ ଧରି ରହିଥିଲେ। କିନ୍ତୁ ସେମାନେ ବିହାର ସୀମା ଦେଇ ନେପାଳରେ ପ୍ରବେଶ କରିବାକୁ ଚାହୁଁଥିବା ବେଳେ ସୁରକ୍ଷାକର୍ମୀଙ୍କ ହାତରେ ଧରାପଡ଼ିଛନ୍ତି।

ବିହାରର ସିତାମରହିର ଏସପି ହରିକିଶୋର ରାୟ କହିଛନ୍ତି, ଦୁଇ ବିଦେଶୀ ନାଗରିକଙ୍କୁ ରବିବାର ସଶସ୍ତ୍ର ସୀମା ବଳ(ଏସଏସବି) ପ୍ରଥମେ ଅଟକ ରଖିଥିଲା। ଗିରଫ ୨୮ ବର୍ଷୀୟ ଲୁ ଲାଙ୍ଗ ଓ ୩୪ ବର୍ଷୀୟ ୟୁଆନ ହାଇଲଙ୍ଗଙ୍କ ଠାରୁ ଚାଇନିଜ ପାସପୋର୍ଟ ମିଳିଛି। କିନ୍ତୁ ସେମାନଙ୍କ ପାଖରେ କୌଣସି ଭିସା ନଥିଲା। ସେମାନେ ଗୋଟିଏ ଟ୍ୟାକ୍ସି ଯୋଗେ ପ୍ରଥମେ ବିହାର-ନେପାଳ ସୀମାନ୍ତରେ ପହଞ୍ଚିଥିଲେ। ଏହାପରେ ଚାଲିଚାଲି ସୀମା ପାର କରିବାକୁ ଚେଷ୍ଟା କରୁଥିବା ବେଳେ ଏସଏସବି ଉଭୟଙ୍କୁ ଧରିବାକୁ ସକ୍ଷମ ହୋଇଥିଲା।

ପଚରାଉଚରା ସମୟରେ ଚୀନ୍‌ ନାଗରିକମାନେ ପ୍ରକାଶ କରିଥିଲେ ଯେ ସେମାନେ ନେପାଳରେ ହିଚକିଙ୍ଗ୍‌ କରୁଥିବା ଭାରତୀୟ ଅଞ୍ଚଳରେ ପ୍ରବେଶ କରିଥିଲେ ଏବଂ ନୋଏଡା ଯାଇଥିଲେ। ଯେଉଁଠାରେ ସେମାନେ ଜଣେ ପରିଚିତ ବ୍ୟକ୍ତିଙ୍କ ଘରେ ରହିଥିଲେ।

ସଶସ୍ତ୍ର ସୀମା ସୁରକ୍ଷା ବଳ (ଏସଏସବି) କହିଛି ଯେ ସେମାନଙ୍କର ମୋବାଇଲ୍‌ ଫୋନ୍‌ ରେକର୍ଡ ଏବଂ ଅନ୍ୟାନ୍ୟ ଜିନିଷର ପରୀକ୍ଷାରୁ ଜଣାପଡିଛି ଯେ ଏହି ଚୀନ୍‌ ନାଗରିକମାନେ ଏକ ଆର୍ଥିକ ଠକେଇ ରାକେଟର ଅଂଶ ବିଶେଷ ଅଟନ୍ତି। ସେମାନଙ୍କୁ ପୁଲିସକୁ ହସ୍ତାନ୍ତର କରାଯାଇଛି।