ବିଜେପିର ପୂର୍ବତନ ମୁଖପାତ୍ର ନୂପୁର ଶର୍ମାଙ୍କ ମୁଣ୍ଡ କାଟ ଚିତ୍ରଣ ଭିଡିଓ ଅପଲୋଡ କରିବା ମାମଲାରେ ବିବାଦୀୟ ୟୁଟ୍ୟୁବର ଫୈଜଲ ୱାନୀ ଗିରଫ ହୋଇଛନ୍ତି । ଜାମ୍ମୁ କାଶ୍ମୀର ପୋଲିସ ଫୈଜଲ ୱାନୀକୁ ଗିରଫ କରିଛି।

ପୋଲିସ ସୂଚନା ଅନୁସାରେ ୟୁ-ଟ୍ୟୁବରେ ଫୈଜଲଙ୍କର ଏକ ସ୍ୱାସ୍ଥ୍ୟ ଭିତ୍ତିକ ଚ୍ୟାନେଲ ରହିଛି। ଏହାର ନାଁ ‘ଡିପ୍‌ ପେନ୍‌ ଫିଟନେସ୍‌’। ଗତ ସପ୍ତାହରେ ସେ ତାଙ୍କ ୟୁ-ଟ୍ୟୁବ ଚ୍ୟାନେଲରେ ନିଜେ ଖୋଲା ଦେହରେ ଥାଇ ଏକ ଭିଡିଓ କରିଥିଲେ। ଏଥିରେ ସେ ଏକ ଖଣ୍ଡା ଧରି ନୂପୁର ଶର୍ମାଙ୍କ ବେକ କାଟୁଥିବା ଦୃଶ୍ୟ ରହିଥିଲା। ପ୍ରଫେଟ ମହମ୍ମଦଙ୍କ ବିରୋଧରେ ନୂପୁର ଶର୍ମା ଦେଇଥିବା ବିବାଦୀୟ ବୟାନର ପ୍ରତିବାଦ ସ୍ବରୂପ ଫୈଜଲ ଏଭଳି ଭିଡିଓ କରିଥିଲେ। ତେବେ ଏହି ଭିଡିଓଟିକୁ ନେଇ ବିବାଦ ସୃଷ୍ଟି ହେବାରୁ ସେ ଏହାକୁ ଡିଲିଟ୍ କରି ଦେଇଥିଲେ।

ଫୈଜଲ ବିରୁଦ୍ଧରେ ସଫା କଦଲ ପୋଲିସ ଷ୍ଟେସନରେ ଆଇପିସିର ଧାରା ୫୦୫ ଏବଂ ୫୦୬ ଅନୁସାରେ ଏଫଆଇଆର ରୁଜୁ କରାଯାଇଛି। କଥିତ ରୂପେ ଫୈଜଲ ଯେଉଁ ଭିଡିଓ ୟୁଟ୍ୟୁବରେ ଅପଲୋଡ କରିଥିଲେ, ସେଥିରେ ପ୍ରଫେଟ୍ ମହମ୍ମଦ ଉପରେ ବିବାଦୀୟ ଟିପ୍ପଣୀ ଦେଇ ବିଜେପିରୁ ନିଲମ୍ୱିତ ନୂପୁର ଶର୍ମାଙ୍କ ମୁଣ୍ଡ କଟାଯିବା ଚିତ୍ରଣ କରାଯାଇଥିଲା। ଭାଇରାଲ ହେବା ପରେ ଫୈଜଲ ଭିଡିଓଟିକୁ ହଟାଇ ନେଇଥିଲେ ଏବଂ ନିଜର ଭୁଲ ପାଇଁ କ୍ଷମା ପ୍ରାର୍ଥନା କରିଥିଲେ।

Powered by Froala Editor