ଭୁବନେଶ୍ୱର : ମହିଳା ସ୍ୱୟଂ ସହାୟକ ଗୋଷ୍ଠୀଗୁଡ଼ିକ ପାଇଁ ରାଜ୍ୟ ସରକାର ହାତ ଖୋଲା ଖର୍ଚ୍ଚ କରିବାକୁ ନିଷ୍ପତି ନେଇଛନ୍ତି  । ମିଶନ ଶକ୍ତି ପାଇଁ ୫୦ ହଜାର କୋଟିର ବ୍ୟାଙ୍କ ଋଣ ଯୋଗାଣ ସହ ଏସଏଚଜିଗୁଡ଼ିକୁ ୧୨ ଶହ କୋଟିର ସୁଧ ରିହାତି ଦିଆଯିବ  । ଏହାଛଡ଼ା ପ୍ରତି ପଂଚାୟତ, ବ୍ଲକ ଓ ଜିଲ୍ଲାରେ ମିଶନ ଶକ୍ତି ଗୃହ କରାଯିବ  । ସେହିପରି ସାମଗ୍ରୀ ବିକ୍ରି ପାଇଁ ୫୦୦ ଆଉଟଲେଟ କରିବାକୁ ବି ରାଜ୍ୟ ସରକାର ନିଷ୍ପତି ନେଇଛନ୍ତି  । ମିଶନ ଶକ୍ତି ଏବେ ସ୍ୱତନ୍ତ୍ର ବିଭାଗ ହୋଇଥିବାବେଳେ ୫ ବର୍ଷରେ ମିଶନ ଶକ୍ତିର ବଜେଟ ୪୯୭୩ କୋଟି ଟଙ୍କା ହେବବୋଲି କ୍ୟାବିନେଟରେ ଗୁରୁତ୍ୱପୂର୍ଣ୍ଣ ନିଷ୍ପତି ନିଆଯାଇଛି  ।

କ୍ୟାବିନେଟରେ ହୋଇଥିବା ନିଷ୍ପତି ଅନୁଯାୟୀ, ଟାଟା ପାୱାର କମ୍ପାନୀକୁ ବାରଙ୍ଗ ତହସିଲ ଅଂଚଳରେ ଏକ ପାୱାର ପ୍ଲାଂଟ କରିବା ପାଇଁ ୮୭୧ ଏକର ଜମି ଦିଆଯାଇଥିଲା  । ତେବେ ପାୱାର ପ୍ଲାଂଟ ହୋଇନପାରିବାରୁ ସେହି ଜମିକୁ ଇଡ଼କୋ ଫେରାଇ ଆଣିବ  । କ୍ୟାବିନେଟରେ ଆସିଥିବା ଏସଂକ୍ରାନ୍ତ ପ୍ରସ୍ତାବକୁ ମଞ୍ଜୁରୀ ମିଳିଛି  । ଇଡ଼କୋକୁ ଜମି ଫେରସ୍ତ ଆଣିବା ପାଇଁ ରାଜ୍ୟ ସରକାର ୬୨ କୋଟି ୮୩ ଲକ୍ଷ ଟଙ୍କା ପ୍ରଦାନ କରିବେ  । ଯାହାକି ଜମି ଅଧିଗ୍ରହଣ ବାବଦରେ ପ୍ରଦାନ କରାଯିବ  । ଏହି ଜମି ଆସିବା ପରେ ସେହି ଜମିରେ ଶିଳ୍ପ ଭିତିଭୂମିର ବିକାଶ କରାଯିବ  । ଅନୁଗୁଳ ଜିଲ୍ଲାରେ ଏକ ମେଗା ଆଲୁମିନିୟମ ପାର୍କ ପ୍ରତିଷ୍ଠା କରାଯିବ  । ଏହି ପାର୍କର ଭିତିଭୂମି ବିକାଶ ନିମନ୍ତେ  ଇଡ଼କୋକୁ ୪୨୮ କୋଟି ଟଙ୍କା ଅନୁଦାନ ଦିଆଯିବ  । ଆସନ୍ତା ୩ ବର୍ଷରେ ଏହି ଅର୍ଥ ପ୍ରଦାନ କରାଯିବ  ।

ଆଲୁମିନିୟମ ପ୍ରକଳ୍ପ ହେଲେ ଅନେକ ଡାଉନଷ୍ଟ୍ରିମ ଶିଳ୍ପ ପ୍ରତିଷ୍ଠା ସହ ନିଯୁକ୍ତି ସୁଯୋଗ ସୃଷ୍ଟିହୋଇପାରିବ  । ବିଦ୍ୟାଳୟ ଓ ଗଣଶିକ୍ଷା ବିଭାଗ ପକ୍ଷରୁ ୨୪ଟି ବେସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟକୁ ଗ୍ରାଂଟ ଇନ ଏଡ଼ ପ୍ରଦାନ ପାଇଁ ଆସିଥିବା ପ୍ରସ୍ତାବକୁ ମଧ୍ୟ କ୍ୟାବିନେଟ ମଞ୍ଜୁରୀ ପ୍ରଦାନ କରିଛନ୍ତି  । ୨୦୧୩ ଗ୍ରାଂଟ ଇନ ଏଡ଼ ଆଇନ ଅନୁସାରେ ସେମାନେ ଅନୁଦାନ ପାଇବାକୁ ଯୋଗ୍ୟ ବିବେଚିତ ହୋଇଛନ୍ତି  । ୨୦୨୨ ଜାନୁଆରୀ ପହିଲାରୁ ପିଛିଲା ଭାବେ ଏହି ଅନୁଦାନ ମିଳିବ  । ଏହାଦ୍ୱାରା ୪୭ ଜଣ ଶିକ୍ଷକ ଉପକୃତ ହେବେ ଓ ରାଜ୍ୟ ସରକାର ପ୍ରତିବର୍ଷ ୬୮ ଲକ୍ଷ ଟଙ୍କା ଏହା ପାଇଁ ଖର୍ଚ୍ଚ କରିବେ  । ଅନ୍ୟ ଏକ ଗୁରୁତ୍ୱପୂର୍ଣ୍ଣ ପ୍ରସ୍ତାବ କ୍ରମେ ଆସନ୍ତା ୫ ବର୍ଷ ପାଇଁ ରାଜ୍ୟରେ ଚାଲିଥିବା କ୍ଲଷ୍ଟର ବୋରୱେଲ ସ୍କିମକୁ ଅନୁମୋଦନ କରାଯାଇଥିବାବେଳେ ଏହାଦ୍ୱାରା ୧ ଲକ୍ଷ ନୂତନ ବୋରୱେଲ ଖନନ କରାଯିବାର ଲକ୍ଷ୍ୟ ରହିଛି  । ଫଳରେ ୫ ଲକ୍ଷ ହେକ୍ଟର ଖରିଫ ଓ ୨ ଲକ୍ଷ ହେକ୍ଟର ରବି ଚାଷଜମିକୁ ଜଳସେଚିତ କରାଯାଇପାରିବ  । ଏଥିପାଇଁ ୫ ବର୍ଷରେ ୪୧୯୮ କୋଟି ଟଙ୍କା ଖର୍ଚ୍ଚ କରାଯିବ  । ଜଳସମ୍ପଦ ବିଭାଗ ପକ୍ଷରୁ ଆସିଥିବା ଏହି ପ୍ରସ୍ତାବକୁ ମଂଜୁରୀ ମିଳିଛି  । ଏହାଦ୍ୱାରା ୧ ଲକ୍ଷରୁ ଅଧିକ କୃଷକ ପରିବାର ଉପକୃତ ହେବେ  । ଏତଦବ୍ୟତୀତ ଆସନ୍ତା ୩ ବର୍ଷ ମଧ୍ୟରେ ୧୨୮୦ଟି ନୂତନ ଚେକଡ୍ୟାମ ପାଇଁ ପ୍ରସ୍ତାବ ଆସିଥିବାବେଳେ ତାହାକୁ କ୍ୟାବିନେଟ ଅନୁମୋଦନ କରିଛନ୍ତି  । ଏଥିପାଇଁ ୮୧୧ କୋଟି ଟଙ୍କା ଖର୍ଚ୍ଚ ହେବ  । 

Powered by Froala Editor