ଦିନଥିଲା ହାତରେ ଘଣ୍ଟା ପିନ୍ଧାଯାଉଥିଲା ସମୟ ଦେଖିବା ପାଇଁ। ଧୀରେ ଧୀରେ ଡ୍ରେସ୍‌ ସହ ମ୍ୟାଚ୍‌ କରି କେବେ ଚେନ୍‌ ତ କେବେ ଲେଦର ପୁଣି କେବେ ଭଳିକି ଭଳି କଲରଫୁଲ୍‌ ପ୍ଲାଷ୍ଟିକ୍‌ ବ୍ୟାଣ୍ଡ୍‌ ଥିବା ଘଣ୍ଟା ପାଲଟିଲା ଷ୍ଟାଇଲ୍‌ ଷ୍ଟେଟ୍‌ମେଣ୍ଟ। ତେବେ ଏବେର ଘଣ୍ଟା ଆଉ କେବଳ ସମୟ ଦେଖିବା ଅବା ଫ୍ୟାଶନ୍‌ରେ ସୀମିତ ନାହିଁ ବରଂ ଏହାର ସ୍ଥାନ ନେଇଛି ସ୍ମାର୍ଟ ଓ୍ବାଚ୍‌। ମୋବାଇଲ୍‌ରେ ଆସୁଥିବା ନୋଟିଫିକେଶନ୍‌ରୁ ଆରମ୍ଭ କରି ଫିଟ୍‌ନେସ୍‌ ଟ୍ରାକ୍‌ କରିବା ପର୍ୟ୍ୟନ୍ତ ବିଭିନ୍ନ ଫ୍ୟାସିଲିଟି ପାଇଁ ଏହା ପାଲଟିଛି ଅଧିକାଂଶ ଯୁବପିଢ଼ିଙ୍କ ପ୍ରଥମ ପସନ୍ଦ। 

ଘଣ୍ଟା ପିନ୍ଧିବା ଅଧିକାଂଶଙ୍କର ଆବଶ୍ୟକତା ହୋଇଥିବା ବେଳେ ଆଉ କେତେକଙ୍କ ପାଇଁ ସଉକ। ତେବେ ଏବେର ସ୍ମାର୍ଟ ଓ୍ବାଚ୍‌ କିନ୍ତୁ ବଦଳାଇ ଦେଇଛି ଘଣ୍ଟାପିନ୍ଧାର ପରିଭାଷା। ସମୟ ଦେଖିବା, ସ୍ମାର୍ଟ ଏବଂ ଷ୍ଟାଇଲିଶ୍‌ ଲୁକ୍‌ ପାଇବା ସହ ଆହୁରି ଅନେକ ଉପଯୋଗିତା ଏହାକୁ କରାଇପାରିଛି ଅଧିକ ଲୋକପ୍ରିୟ।

ନାହିଁ ବ୍ୟାଟେରି କିଣିବା ଟେନ୍‌ସନ୍‌: କେବଳ ଯେ ଏହାକୁ ଅପରେଟ୍‌ କରିବା ବେଶ୍‌ ସହଜ ତା’ ନୁହେଁ, ବରଂ ଏହା ଚାର୍ଜେବଲ୍‌ ହୋଇଥିବାରୁ ବାରମ୍ବାର ବ୍ୟାଟେରି କିଣିବାର ଟେନ୍‌ସନ୍‌ ବି ନାହିଁ। ଏଣୁ ଏହାକୁ ବ୍ୟବହାର କରିବାକୁ ଅନେକେ ଭଲ ପାଉଛନ୍ତି।

ସାଜିଛି ଟ୍ରାକର: ସ୍ବାସ୍ଥ୍ୟ ପ୍ରତି ସଚେତନ ଥିବା ପ୍ରତ୍ୟେକଙ୍କ ପାଇଁ ସ୍ମାର୍ଟ ଓ୍ବାଚ୍‌ ଏକ ବରଦାନ ସଦୃଶ। କାରଣ ଦିନକୁ ଆପଣ କେତେ ଷ୍ଟେପ୍‌ ଚାଲିଲେ, କେତେ କ୍ୟାଲୋରି ବର୍ନ କଲେ, ହାର୍ଟ ରେଟ୍‌ଠାରୁ ଆରମ୍ଭ କରି ବ୍ଲଡ୍‌ପ୍ରେସର ପର୍ୟ୍ୟନ୍ତ ସବୁକିଛି ଏଥିରୁ ଜାଣି ହେଉଛି ଖୁବ୍‌ ସହଜରେ। ତେଣୁ ଜିମ୍‌ ଯାଉଥିବା ଯୁବପିଢ଼ିଙ୍କର ଏହା ପ୍ରତି କ୍ରେଜ୍‌ ଖୁବ୍‌ ଅଧିକ। ଏଥିରେ ଥିବା ଡିଜିଟାଲ୍‌ ହେଲ୍‌ଥ ସେନ୍‌ସର ଦ୍ୱାରା ହୃଦ୍‌ରୋଗର ପୂର୍ବ ସୂଚନା ମଧ୍ୟ ଜାଣି ହୋଇ ପାରୁଥିବାରୁ ଯଥା ସମୟରେ ଚିକିତ୍ସା ସହଜ ହୋଇପାରୁଛି ଏବଂ ରୋଗୀର ଜୀବନ ରକ୍ଷା ହୋଇପାରୁଛି। ଏଥିରେ ରୋଗୀକୁ ମେଡିସିନ୍‌ ଖାଇବାର ସମୟ ସୂଚନା ଦେବାର ମଧ୍ୟ ସୁବିଧା ରହିଛି। କେତେକ ସ୍ମାର୍ଟଓ୍ବାଚ୍‌ରେ ପଡ଼ିଯିବା କ୍ଷଣି ଆମ୍ବୁଲାନ୍ସ ସହ ପରିବାର ଲୋକଙ୍କୁ ସୂଚନା ପହଞ୍ଚାଇବାର ସୁବିଧା ମଧ୍ୟ ଉପଲବ୍ଧ। କେବଳ ଏତିକି ନୁହେଁ, ଏଥିରେ ଯୁବତୀମାନଙ୍କୁ ମାସିକ ଋତୁସ୍ରାବ ସୂଚନା ବା ମେନ୍‌ଷ୍ଟ୍ରୁଆଲ୍‌ ପିରିୟଡ୍‌ ରିମାଇଣ୍ଡର ଦେବା ପାଇଁ ମଧ୍ୟ ସୁବିଧା ରହିଛି।

ଫୋନ୍‌ର ଛୋଟ ରୂପ: ଏଥିରେ ଆପଣ ୧୨ କିମ୍ବା ୨୪ ଘଣ୍ଟିଆ ଟାଇମ୍‌ ସେଟ୍‌ କରିପାରିବେ। ଆଲାର୍ମ ମଧ୍ୟ ସେଟ୍‌ କରିପାରିବେ। ମୋବାଇଲ୍‌ରେ ଆସୁଥିବା କଲ୍‌ ରିସିଭ୍‌ କରିପାରିବେ, ମେସେଜ୍‌, ସୋସିଆଲ୍‌ ମିଡିଆର ବିଭିନ୍ନ ନୋଟିଫିକେଶନ୍‌ ପାଇପାରିବେ ଏବଂ ଇନ୍‌ଷ୍ଟାଣ୍ଟ ରିପ୍ଲାଏ କରିପାରିବେ। ଏଥିରେ ବିଭିନ୍ନ ଆପ୍‌ ମଧ୍ୟ ବ୍ୟବହାର କରିପାରିବେ। କେବଳ ଏତିକି ନୁହେଁ, କେତେକ ସ୍ମାର୍ଟ ଓ୍ବାଚ୍‌ରେ ସ୍ମାର୍ଟ ଆପ୍‌ ବେସ୍‌ଡ ଇ-ପେମେଣ୍ଟ ସିଷ୍ଟମ ମଧ୍ୟ ଉପଲବ୍ଧ। ତେଣୁ ଆପଣ ଏହା ସାହାଯ୍ୟରେ କ୍ୟାଶଲେସ୍‌ ଶପିଂର ବି ଫାଇଦା ଉଠେଇ ପାରିବେ।

ଅନ୍ୟାନ୍ୟ ସୁବିଧା : ହଠାତ୍‌ ଫୋନ୍‌ ନ ମିଳିଲେ ଅବା ହଜିଗଲେ ଆପଣ ‘ଫାଇଣ୍ଡ ଫୋନ୍‌’ ଆପ୍ଲିକେଶନ୍‌ ଦ୍ୱାରା ନିଜ ଫୋନ୍‌କୁ ସହଜରେ ଖୋଜିପାରିବେ। ଏହାଛଡ଼ା ବର୍ତ୍ତମାନ ଆସୁଥିବା ବିଭିନ୍ନ ଲାଟେଷ୍ଟ ସ୍ମାର୍ଟଓ୍ବାଚ୍‌ରେ ଏସି, ଫ୍ୟାନ୍‌, ଲାଇଟ୍‌, ଡୋର୍‌, ମାଇକ୍ରୋଓ୍ବେବ୍‌ ଓଭନ୍‌, ଟିଭି, ଫ୍ରିଜ୍‌ ଭଳି ସ୍ମାର୍ଟ ହୋମ୍‌ ଆପ୍ଲାଏନ୍‌ସେସ୍‌ଗୁଡିକୁ କଣ୍ଟ୍ରୋଲ୍‌ କରିବାର ଅପ୍ସନ ମଧ୍ୟ ଉପଲବ୍ଧ।

ଟପ୍‌ ବ୍ରାଣ୍ଡ: ଗ୍ଲୋବାଲ ସ୍ମାର୍ଟଓ୍ବାଚ୍‌ ମାର୍କେଟ ତରଫରୁ ହୋଇଥିବା ଏକ ସର୍ଭେରୁ ଜଣାପଡ଼ିଛି ଯେ, ୨୦୨୧ରେ ବିକ୍ରି ହୋଇଥିବା ସମୁଦାୟ ହାତ ଘଣ୍ଟାର ପ୍ରାୟ ୪୦%ରୁ ଊର୍ଦ୍ଧ୍ୱ ହେଉଛି କେବଳ ସ୍ମାର୍ଟ ଓ୍ବାଚ୍‌। ତେବେ ଗ୍ଲୋବାଲ୍‌ ମାର୍କେଟରେ ସବୁଠୁ ଅଧିକ ବିକ୍ରି ହେଉଥିବା ଟପ୍‌ ୯ ସ୍ମାର୍ଟ ଓ୍ବାଚ୍‌ ବ୍ରାଣ୍ଡ ହେଉଛି ଆପଲ୍‌, ସାମ୍‌ସଙ୍ଗ୍‌, ହୁଆଇ, ଇମୁ, ଆମାଜ୍‌ଫିଟ୍‌, ଗାର୍ମିନ୍‌, ଫିଟ୍‌ବିଟ୍‌, ଜାଓମି, ନଏଜ୍‌; ଯାହାମଧ୍ୟରୁ ଆମ ଦେଶରେ ସବୁଠୁ ଅଧିକ ବିକ୍ରି ଏବଂ ଲୋକପ୍ରିୟତା ହାସଲ କରିଛି ନଏଜ୍‌ କମ୍ପାନୀର ସ୍ମାର୍ଟଓ୍ବାଚ୍‌।

Powered by Froala Editor