ତାରାତାରିଣୀ ପୀଠରେ ମୁଣ୍ଡନ ଉପରେ କାହିଁକି ରୋକ ଲଗାଯାଇଛି ଜାଣନ୍ତୁ?
ବ୍ରହ୍ମପୁର: ଗଞ୍ଜାମ ଜିଲ୍ଲାରେ ଚୈତ୍ର ମାସରେ ଅନ୍ୟ ମାସ ତୁଳନାରେ ଅପେକ୍ଷାକୃତ ଅଧିକ ଯାନିଯାତ୍ରା ହୁଏ । ଗତ ୩୦ ତାରିଖରେ ଗଞ୍ଜାମ ଜିଲ୍ଲାର ଆରାଧ୍ୟା ଦେବୀ ମା ତାରାତାରିଣୀଙ୍କ ଚୈତ୍ର ମଙ୍ଗଳବାର ଯାତ୍ରା ଆରମ୍ଭ ହୋଇଛି । ଗୋଟିଏ ପାଳି ଶେଷ ହୋଇଥିବା ବେଳେ ଆହୁରି ୪ ପାଳି ଯାତ୍ରା ଅଛି । କରୋନା ସଂକ୍ରମଣ ଦୃଷ୍ଟିରୁ ଜିଲ୍ଲା ପ୍ରଶାସନ ଏହି ଯାତ୍ରା ଉପରେ କଟକଣା ଲଗାଇଛି । ତାରାତାରିଣୀ ପାହାଡ଼ ଉପରେ କି ତଳେ, ମାନସିକ ଧାରୀଙ୍କ ମୁଣ୍ଡନ ସମ୍ପୂର୍ଣ୍ଣ ବନ୍ଦ କରିଛି ଜିଲ୍ଲା ପ୍ରଶାସନ । ମାଚ୍ଚ ୨୪ ରୁ ଜିଲ୍ଲାରେ ଦଣ୍ଡଯାତ୍ରା ଆରମ୍ଭ ହୋଇଛି । ଏଥିଲାଗି ପ୍ରଶାସନ ଏସଓପି ଜାରି କରିଛି । ୫୦ ଦଣ୍ଡୁଆଙ୍କ ବଦଳରେ କେବଳ ୨୫ ଦଣ୍ଡୁଆ ଭାଗ ନେଇପାରିବେ ଓ ସନ୍ଧ୍ୟା ପରେ ନାଚ, ସାଂସ୍କୃତିକ କାର୍ଯ୍ୟକ୍ରମ ଉପରେ ରୋକ ଲଗାଇଛନ୍ତି ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ । ବ୍ରହ୍ମପୁରର ପ୍ରସିଦ୍ଧ ଦ୍ୱିବାର୍ଷିକ ବୁଢ଼ୀ ଠାକୁରାଣୀ ଯାତ୍ରା ଆସନ୍ତା ୯ ତାରିଖରୁ ଆରମ୍ଭ ହେବ । ୭ ଦିନ ଯାତ୍ରା ଲାଗି ପ୍ରଶାସନ ଅନୁମତି ଦେଇଛି ।
