ଶର୍ମିଷ୍ଠାଙ୍କୁ ସ୍ପଟକୁ ନେଲା କ୍ରାଇମବ୍ରାଞ୍ଚ
କଟକ: ବହୁଚର୍ଚ୍ଚିତ କ୍ୟାମେରାମ୍ୟାନ ମାନସ ସ୍ୱାଇଁ ହତ୍ୟା ମାମଲାରେ ଅଭିଯୁକ୍ତଙ୍କ ରିମାଣ୍ଡର ଆଜି ଚତୁର୍ଥ ଦିନ । ଏହି ଘଟଣାକୁ ନେଇ କ୍ରାଇମବ୍ରାଞ୍ଚ ପକ୍ଷରୁ ଚାଲିଛି ଜୋରଦାର ତଦନ୍ତ । ଘଟଣାର ମାଷ୍ଟରମାଇଣ୍ଡ କୁହାଯାଉଥିବା ମୁଖ୍ୟ ଅଭିଯୁକ୍ତ ଶର୍ମିଷ୍ଠାଙ୍କୁ ଆଜି ସ୍ପଟକୁ ନେଇଛି କ୍ରାଇମବ୍ରାଞ୍ଚ ।
ଶର୍ମିଷ୍ଠାଙ୍କ ସମେତ ୪ ଅଭିଯୁକ୍ତଙ୍କୁ ଭଦ୍ରକର ଚାନ୍ଦବାଲିକୁ ନିଆଯାଇଥିବା ସୂଚନା ରହିଛି । ସମସ୍ତ ଅଭିଯୁକ୍ତଙ୍କୁ ସ୍ପଟ୍କୁ ନେଇ କ୍ରାଇମ ସିନ୍ ରିକ୍ରିଏସନ କରିବ କ୍ରାଇମବ୍ରାଞ୍ଚ । ପୋଲିସ ମୁଖ୍ୟାଳୟରୁ କଡା ସୁରକ୍ଷାବଳୟ ମଧ୍ୟରେ ନିଆଯାଇଛି । ପ୍ରଥମେ ଏକ ଗାଡ଼ିରେ ଶର୍ମିଷ୍ଠାଙ୍କୁ ନିଆଯାଇଥିଲା ଏବଂ କିଛି ସମୟ ପରେ ଅନ୍ୟ ୪ ଅଭିଯୁକ୍ତଙ୍କୁ ଘଟଣାସ୍ଥଳକୁ ନେଇଛି ତଦନ୍ତକାରୀ ଟିମ । ତେବେ କିପରି ଏବଂ କେଉଁଠି ଘଟଣା ଘଟିଥିଲା ସେନେଇ ତଥ୍ୟ ହାସଲ କରିବ କ୍ରାଇମବ୍ରାଞ୍ଚ ଟିମ।
ଗତକାଲି ଅଭିଯୁକ୍ତ ରଞ୍ଜନ ନାୟକର ବିବୃତ୍ତିକୁ ଆଧାରକରି ଚଣ୍ଡିଖୋଲ ଯାଇଥିଲା କ୍ରାଇମବ୍ରାଞ୍ଚ । ଘଟଣାସ୍ଥଳରୁ ମାନସଙ୍କ ଏକ ଅଧା ଜଳିଯାଇଥିବା ମୋବାଇଲ୍ ଫୋନ, ଇଅର ଫୋନ୍, ଅଧା ପୋଡିଯାଇଥିବା ଚପଲ,ହତ୍ୟାରେ ବ୍ୟବହୃତ ସାମଗ୍ରୀ,ଅଧା ପୋଡା ଅଖା,ଶାଢ଼ୀ ଆଦି ଘଟଣା ସ୍ଥଳରୁ ଜବତ କରାଯାଇଛି ।
Powered by Froala Editor
