କୋଭିଡ ମୁକାବିଲା ପାଇଁ ରାଜ୍ୟମାନଙ୍କୁ କେନ୍ଦ୍ର ଦେଲା ୮୮୭୩.୬ କୋଟି ଟଙ୍କା
ନୂଆଦିଲ୍ଲୀ: କୋଭିଡ-୧୯ ମୁକାବିଲା ପାଇଁ ରାଜ୍ୟମାନଙ୍କୁ ୮୮୭୩.୬ କୋଟି ଟଙ୍କା ପ୍ରଦାନ କରିଛି କେନ୍ଦ୍ର ସରକାର । କୋଭିଡର ମୁକାବିଲା ଏବଂ କଣ୍ଟେନମେଣ୍ଟ ପଦକ୍ଷେପ ଗ୍ରହଣ କରିବା ପାଇଁ ରାଜ୍ୟ ସରକାର ରାଜ୍ୟ ବିପର୍ଯ୍ୟୟ ମୁକାବିଲା ପାଣ୍ଠି (ଏସଡିଆରଏଫ)ରୁ ୫୦ ପ୍ରତିଶତ ଅର୍ଥ ଉପଯୋଗ କରିପାରିବେ ବୋଲି କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ କୁହାଯାଇଛି । ଜୁନ ମାସରେ ମିଳୁଥିବା କିସ୍ତିକୁ କେନ୍ଦ୍ର ସରକାର ଆଗୁଆ କରି ରାଜ୍ୟମାନଙ୍କୁ ଏସଡିଆରଏଫ ପାଇଁ ପାଣ୍ଠି ଲିଲିଜ କରିଥିବାର ସ୍ପଷ୍ଟ କରାଯାଇଛି । କେନ୍ଦ୍ର ସରକାରଙ୍କ ଦ୍ୱାରା ରିଲିଜ କରାଯାଇଥିବା ୮,୮୭୩.୩ କୋଟି ଟଙ୍କାରୁ ୪,୪୬୩ କୋଟି ଟଙ୍କା ରାଜ୍ୟମାନେ କଣ୍ଟେନମେଣ୍ଟ ପଦକ୍ଷେପ ପାଇଁ ଉପଯୋଗ କରିପାରିବେ ବୋଲି କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ କୁହାଯାଇଛି । ଡାକ୍ତରଖାନାରେ ଅକ୍ସିଜେନ ପ୍ରସ୍ତୁତି ଓ ସଂରକ୍ଷଣ ପ୍ଲାଣ୍ଟ, ଭେଣ୍ଟିଲେଟର, ଏୟାର ପୁ୍ୟରିଫାୟର, ଆମ୍ବୁଲାନ୍ସ ସେବା ସୁଦୃଢ଼ୀକରଣ, ପିପିଇ, ଟେଷ୍ଟିଂ ପ୍ରୟୋଗଶାଳା, ଟେଷ୍ଟିଂ କିଟ, କଣ୍ଟେନମେଣ୍ଟ ସମ୍ବନ୍ଧୀୟ ବିଭିନ୍ନ ପଦକ୍ଷେପ ନିମନ୍ତେ ରାଜ୍ୟମାନେ ଏହି ପାଣ୍ଠି ଉପଯୋଗ କରିପାରିବେ ।
Powered by Froala Editor
