ଭାରତୀୟ ଶିଖ ସୈନ୍ୟଙ୍କ ପାଇଁ ତିଆରି ହେଲା ସ୍ୱତନ୍ତ୍ର ଡିଜାଇନର ହେଲମେଟ୍ । ଯାହାକୁ ଶିଖ୍ ସୈନ୍ୟ ପଗଡି ଉପରେ ବି ପିନ୍ଧିପାରିବେ । କାନପୁରରେ ଥିବା ଗ୍ଲୋବାଲ ଡିଫେନ୍ସ ଏଣ୍ଡ ହୋମଲାଣ୍ଡ ସିକ୍ୟୁରିଟି କମ୍ପାନି ଏମକେୟୁ ଏହି ସ୍ବତନ୍ତ୍ର ପ୍ରକାରର ହେଲମେଟ୍ ତିଆରି କରିଛି । ହେଲମେଟର ନାଁ ବୀର୍ ରଖାଯାଇଛି ଓ ଏହାର ଟେକନିକାଲ ନାଁ ରହିଛି କାଭରୋ ଏସସିଏଚ୧୧୧ ।

ଏହାକୁ ଏପରି ଡିଜାଇନ କରାଯାଇଛି ଯେ, ଏହା ପ୍ରତିକୂଳ ପରିସ୍ଥିତି ଓ ଗୁଳି ଦାଉରୁ ସୈନିକର ମୁଣ୍ଡକୁ ସୁରକ୍ଷା ଦେଇପାରିବ । ଏହା ମୁଣ୍ଡକୁ ଲେଭଲ-୩ ସ୍ତରୀୟ ସୁରକ୍ଷା ପ୍ରଦାନ କରିଥାଏ । ଏହା ଉଭୟ ବୁଲେଟ୍ ଓ ଅନ୍ୟାନ୍ୟ ବିପଜ୍ଜନକ ବସ୍ତୁ ଦାଉରୁ ମୁଣ୍ଡକୁ ସୁରକ୍ଷା ଦେଇଥାଏ । ଏଥିରେ ସୈନିକମାନଙ୍କ ପାଇଁ ଜରୁରୀ ସେନସର, ଫ୍ଲାସ ଲାଇଟ୍, କମ୍ୟୁନିକେସନ ସିଷ୍ଟମ ଲଗାଯାଇପାରିବ ।

ପୂର୍ବରୁ ଶିଖ ସୈନ୍ୟମାନେ ନିଜର ପଗଡ଼ି ଯୋଗୁଁ ମିଲିଟାରୀ ହେଲମେଟ ପିନ୍ଧିପାରୁନଥିଲେ । ଫଳରେ ସେମାନେ ବିଭିନ୍ନ ବିପଜ୍ଜନକ ସମସ୍ୟାର ସମ୍ମୁଖୀନ ହେଉଥିଲେ । ଏବେ ଏହି ସ୍ବତନ୍ତ୍ର ହେଲମେଟ ଆସିବା ପରେ ସେମାନେ ଅଧିକ ସୁରକ୍ଷିତ ମନେକରିବେ । ଏହି ସ୍ୱତନ୍ତ୍ର ହେଲମେଟ୍ ପାଇଁ ଶିଖ୍ ସୈନ୍ୟଙ୍କ ଭିତରେ ଖୁସିର ଲହରି ଖେଳିଯାଇଛି । ନିଜ ପରମ୍ପରା ସହ ଦେଶର ସୁରକ୍ଷା ଉଭୟ ବଜାୟ ରଖିପାରିବେ ବୋଲି କହିଛନ୍ତି ।

Powered by Froala Editor