ପଞ୍ଚଭୂତରେ ଲୀନ ହୋଇଛନ୍ତି ବଲିଉଡର ଜଣାଶୁଣା ଗାୟକ ତଥା ସଂଗୀତ ନିର୍ଦ୍ଦେଶକ ବାପି ଲାହିରି। ମୁମ୍ବାଇର ଜୁହୁସ୍ଥିତ ପବନ ହଂସ ଶ୍ମଶାନରେ ତାଙ୍କୁ ଶେଷ ବିଦାୟ ଦିଆଯାଇଛି। ପୁଅ ବପା ଲାହିରି ତାଙ୍କୁ ମୁଖାଗ୍ନି ଦେଇଛନ୍ତି। ଏହି ଅବସରରେ ବଲିଉଡର ଅନେକ ନାମୀ ସେଲିବ୍ରିଟୀ ‘ଡିସ୍କୋ କିଙ୍ଗ୍’ ଭାବେ ପରିଚିତ ବାପି ଦା’ଙ୍କୁ ବିଦାୟ ଦେଇଛନ୍ତି।

ବାପି ଲାହିରି ଦୀର୍ଘ ସମୟ ଧରି ଅସୁସ୍ଥ ଥିଲେ, ଯେଉଁଥିପାଇଁ ତାଙ୍କୁ ଦୀର୍ଘ ଦିନ ଧରି ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ସ୍ବାସ୍ଥ୍ୟବସ୍ଥା ବିଗିଡିବାରୁ ଚିକିତ୍ସାଧିନ ଅବସ୍ଥାରେ ଶେଷ ନିଶ୍ଵାସ ତ୍ୟାଗ କରିଛନ୍ତି । ଡାକ୍ତରଙ୍କ କହିବା ମୁତାବକ ଅବଷ୍ଟ୍ରକ୍ଟିଭ୍ ସ୍ଲିପ୍ ଏପନିଆ କାରଣରୁ ତାଙ୍କର ଦେହାନ୍ତ ହୋଇଛି। ବାପିଙ୍କ ବିୟୋଗ ଖବର ଶୁଣି ସେଲିବ୍ରିଟୀ ତାଙ୍କ ଘରକୁ ଅନ୍ତିମ ଦର୍ଶନ ପାଇଁ ପହଞ୍ଚିଥିଲେ।

ସେହିଦିନ ତାଙ୍କ ଝିଅ ଶେଷ ଥର ପାଇଁ ତାଙ୍କ ସହ କଥା ହୋଇଥିଲେ। ବାପାଙ୍କ ମୃତ୍ୟୁ ପରେ ରିମା ପୁରାପୁରି ଭାଙ୍ଗି ପଡିଛନ୍ତି। କାନ୍ଦି କାନ୍ଦି ଅବସ୍ଥା ଖରାପ ହୋଇଯାଇଛି । ରିମାଙ୍କର ଏହି ଭିଡିଓ ଏବେ ସାମ୍ନାକୁ ଆସିଛି ।

ଅନ୍ତିମ ସଂସ୍କାର ପାଇଁ ଲାହିରି ହାଉସରୁ ଏକ ଫୁଲସଜ୍ଜିତ ଟ୍ରକରେ ବାପି ଦା’ଙ୍କ ପାର୍ଥିବ ଶରୀର ଶ୍ମଶାନ ଘାଟକୁ ଅଣାଯାଇଥିଲା। ଅନ୍ତିମ ଯାତ୍ରା ବେଳେ ତାଙ୍କୁ ଫ୍ୟାନ୍ ଶ୍ରଦ୍ଧାଞ୍ଜଳି ଦେବା ପାଇଁ ରାସ୍ତା କଡ଼ରେ ଛିଡ଼ା ହୋଇ ରହିଥିଲା। ବାପିଙ୍କ ଦେହାନ୍ତରେ ଅଳକା ୟାଗନିକ୍, ଅନୁରାଧା ପୋଡୱାଲ, କାଜୋଲ୍, ଅଜୟ ଦେବଗନ୍, ଅକ୍ଷୟ କୁମାର, ପଦ୍ମିନୀ କୋହ୍ଲାପୁରୀ, ଅନୁପମ ଖେର, ଶକ୍ତି କାପୁର, ବିଦ୍ୟା ବାଲାନ, ସୋଫି ଚୌଧୁରୀଙ୍କ ସମେତ ସମଗ୍ର ବଲିଉଡ୍ ଶୋକ ପ୍ରକାଶ କରିଛନ୍ତି।

Powered by Froala Editor